एसियाली खेलकुदलाई तयारी तीव्र- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

एसियाली खेलकुदलाई तयारी तीव्र

लक्ष्मी लम्साल

बेइजिङ — चीनले कोभिड १९ महामारीबीच झेजियाङको प्रान्तको ह्याङझोमा हुने १९ औं संस्करणको एसियाली खेलकुद प्रतियोगिताको तयारी जारी रहेको जनाएको छ ।

एसियाली खेलकुद हुने ठ्याक्कै दुई वर्ष बाँकी छ । सन् २०२२ मा हुने प्रतियोगिताको दुईवर्षे काउन्टडाउन सुरु भएको छ। ह्याङझोले सन् २०१५ को सेप्टेम्बरमा ओसिएबाट आयोजना अधिकार पाएको थियो ।

खेलकुद तयारीबारे अघिल्लो साता आयोजित समन्वय समितिको तेस्रो भर्चुअल कन्फ्रेन्समार्फत जानकारी दिइएको हो । एसियाली ओलम्पिक कमिटी (ओसिए) का आजीवन मानार्थ उपाध्यक्ष एवं एसियाली ओलम्पिक काउन्सिल समन्वय समितिका अध्यक्ष राजा रणधिर सिंहले बैठकमा ह्याङझो खेलकुदको तयारीमा प्राप्त चरणबद्ध उपलब्धिबारे जानकारी गराएका थिए। उनले तयारीप्रति प्रशंसा गर्दै उत्कृष्ट एसियाली खेलकुद आयोजना हुने विश्वास दिलाएका थिए ।

ह्याङझो एसियाली खेलकुद आयोजक समितिका उपमहासचिव, ह्याङझो सहरका उपमेयर छन वेइ चियाङलगायतले कोरोना भाइरसका बाबजुद प्रतियोगिता आयोजनाका लागि तयारीहरू यथावत राखिएको बताए । उपमेयर वेइ चियाङले भने, ‘यस वर्षको सुरुदेखि नै कोभिड महामारी देखा परे तापनि लक्षित तयारीमा कुनै तलमाथि भएको छैन र समयमै संरचना निर्माणको काम पूरा हुनेछ ।’

चिनियाँ खेल अधिकारीहरूले एसियाली खेलकुदलाई नयाँ उचाइमा लैजान प्रयास गरिने प्रतिबद्धता जनाए । मुख्य रंगशालाको रूपमा ‘बिग लोटस’ को नाम दिइएको रंशगाला निर्माण भएको छ । १२ वटा नयाँ खेलस्थल निर्माण गरिएकोमा यो एक हो । ५३ खेल प्रतियोगिताका लागि सन् २०२० को अन्त्यसम्म ४२ वटा निर्माण सम्पन्न गर्ने लक्ष्य छ भने बाँकी २०२१ मार्चसम्म सक्ने आयोजकको लक्ष्य छ । एसियन खेलाडी भिलेजको निर्माण कार्य पनि चलिरहेको जनाइएको छ ।

अधिकांश रंगशाला संरचन २०२१ मा बनिसक्ने चिनियाँ अधिकारीहरूले जानकारी गराएका छन् ।

सन् २०२२ को सेप्टेम्बर १० देखि २५ सम्म चीनले तेस्रो पटक एसियाली खेलकुदको आयोजना गर्दै छ । यसअघि १९९० मा ११औं एसियाली खेलकुद बेइजिङ र १६ औं एसियाली खेलकुद सन् २०१० मा ग्वाङझोमा भएका थिए ।

एसियाली खेलकुदमा ४० खेलमा १० हजार बढी खेलाडीले प्रतिस्पर्धा गर्नेछन् ।

प्रकाशित : भाद्र २८, २०७७ ०९:१२
प्रतिक्रिया
पठाउनुहोस्

कोरोना संक्रमण भित्रिन नदिन चिनियाँ हवाई क्षेत्रको सतर्कता

लक्ष्मी लम्साल

बेइजिङ — कोभिड-१९ महामारीको घरेलु मामिला घटे पनि बाहिरी मुलुकबाट भित्रिनेको संख्या यथावत् रहेपछि चीनको नागरिक उड्डयन ब्युरोले अन्तर्राष्ट्रिय हवाई उडानमा अझै कडाइ गर्न थालेको छ।

ब्युरोले अन्तर्राष्ट्रिय हवाई उड्डयनका प्रतिउडानमा यात्रुको संख्या ७५ प्रतिशतभन्दा कम हुनुपर्ने नियम जारी गरेको हो। साथै हरेक एअरलाइन्स कम्पनीले सबै यात्रुको कडाइका साथ स्वास्थ्य परीक्षण गर्नुपर्ने आदेश पनि ब्युरोले दोहोर्‍याएर दिएको छ।

गत अगस्टदेखि बाह्य मुलुकमा कोभिड-१९ महामारीको स्थिति गम्भीर बन्दै गएको चीनको ठहर छ। अन्तर्राष्ट्रिय हवाई उड्ययन बढ्दै गइरहेको बेला विदेशबाट संक्रमित भित्रिने क्रम बढिरहेको निष्कर्षमा चीन पुगेको छ। चिनियाँ राष्ट्रिय स्वास्थ्य आयोगले मंगलबार मध्यरातिसम्मको तथ्यांक सार्वजनिक गरेअनुसार कुल ८ जना संक्रमित भेटिएका छन् जुन सबै आयातित संक्रमित हुन्।

चीनमा महामारी फैलिएलगत्तै हरेक प्रान्तले आ-आफ्नो बस्तुस्थितिअनुसार कोरोना नियन्त्रणको नीति अख्तियार गरेका थिए भने हाल कोरोना शून्य भएका क्षेत्रले होसियारीपूर्वक पर्यटकीय क्षेत्रहरू खोल्नेदेखि जनजीवन सामान्य बनाउँदै लगेका छन्।

यो सेप्टेम्बरबाट चिनियाँ नयाँ शैक्षिक सत्र सुरू भएको छ। सोहीबमोजिम पूर्ण सतर्कताका साथ स्कुलहरू खुलेका छन् भने राजधानी बेइजिङमा सडकमा निस्किँदा अनिवार्य मास्क लगाउनुपर्ने नियम हटाइएको छ। यद्यपि सार्वजनिक यातायात वा कार्यालय वा भीडहरूमा प्रवेश गर्दा मास्क लगाउनैपर्ने नियम छ। चीनमा कूटनीतिक तथा अन्तर्राष्ट्रिय सभा सम्मेलनका पूर्वनिर्धारीत कार्यक्रमहरू भिडियो कन्फरेन्सबाट चलाइएका छन्।

प्रकाशित : भाद्र १७, २०७७ १४:१४
पूरा पढ्नुहोस्
प्रतिक्रिया
पठाउनुहोस्
×