बार्सिलोनामाथि मेसीको ‘बमसेल’ अब कानुनी युद्धमा- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

बार्सिलोनामाथि मेसीको ‘बमसेल’ अब कानुनी युद्धमा

फुटबलमा भाग्यले कति बेला कस्तो कोल्टे फेर्छ, थाहा नै हुन्न । बार्सिलोनामा अहिले एकपछि अर्को उथलपुथल भइरहेको छ । लियोनल मेसीले बार्सिलोना छोड्न चाहेका छन् ।
गार्जियन

बार्सिलोना — जतिबेला ६ पटकका बालोन डे’अर विजेता लियोनल मेसीले बार्सिलोनालाई मंगलबार राति फ्याक्समार्फत भने, ‘अब म क्लब छोड्न चाहन्छु ।’ यो क्याटलन क्लबमाथि ‘बमसेल’ नै रह्यो । मेसीको इच्छा छोड्ने मात्र थिएन, उनी बिनामूल्य जानेक्रममा थिए ।

यस्तोमा अब मेसी र बार्सिलोनाको भिडन्त कानुनी युद्धमा परिवर्तन हुने भएको छ । अब कानुनी लडाइँ हुनेछ, दुई पक्षबीच रहेको अनुबन्धमा किनबेचको चर्को मूल्य अझै कायम छ कि समाप्त भइसक्यो ?

मेसीले बार्सिलोनाका लागि चारपल्ट च्याम्पियन्स लिग जिते । उनी क्लब इतिहासमै सबैभन्दा बढी गोल गर्ने खेलाडी हुन् । यी अर्जेन्टिनी खेलाडी चाहन्छन्, अनुबन्ध तत्काल खारेज होस् । अनुबन्धको एक बुँदामा भनिएको छ, खेलाडीले चाहेमा क्लब छोड्न सक्छन् । युरोपेली च्याम्पियन्स लिगमा बार्सिलोना बायर्न म्युनिकको हातबाट ८–२ ले पराजित भएपछि खेलाडी र क्लबबीचको सम्बन्ध अझ कमजोर हुन थालेको थियो । त्यसयता प्रशिक्षक क्विक सेटिन बर्खास्तगीमा परे । रोनाल्ड कोम्यान उनको स्थानमा आइसके ।

कोम्यानले नै अबदेखि बार्सिलोनामा मेसीको स्थान विशेष नहुने बताएपछि स्थिति प्रतिकूल हुन सुरु भएको हो । बार्सिलोनाले सन् २००७ यता कुनै पनि उपाधि जित्न नसकेको सिजन यसपालि हो । यी ३३ वर्षीय खेलाडीले बार्सिलोना छाड्ने के निर्णय गरे, क्लबका वर्तमान अध्यक्ष जोसेप मारिया बार्टोमेउको विरोधमा क्याम्प नोउ बाहिर समर्थकले प्रदर्शन पनि गरिसकेका छन् । बार्सिलोनाका लागि पछिल्लो दशक सबैभन्दा सफल समय रहेको छ । यो समयका सबैभन्दा प्रमुख र निर्णायक खेलाडी मेसी नै रहेका छन् ।

क्याम्प नोउको बाहिर मेस्सीको समर्थनमा भएको प्रदर्शन तस्बिर : रोयटर्स

ती समर्थकले भनिरहेका छन्, ‘मेसी कुनै पनि हालतमा बार्सिलोनामै रहनुपर्छ ।’ बार्सिलोनाले अहिलेसम्म औपचारिक रूपमा मेसीको नयाँ चाललाई लिएर प्रतिक्रिया दिएको छैन । तर क्लबले के बुझेको छ भने मेसीले आफू खुसी क्लब छाड्ने सक्ने बुँदाको औचित्य जुनमा नै सकिसकेको छ । त्यसैले सन् २०२१ सम्म कायम रहेको अनुबन्ध नसकिएसम्म मेसी बार्सिलोनामै रहनुपर्छ । स्पेनी खेल दैनिक मार्काले लेखेको छ, ‘सैद्धान्तिक रूपमा यो बुँदा जुन १० मै खारेज भइसकेको छ ।’

तर कोरोना भाइरस संक्रमणको महामारीका बेला फुटबल अवरुद्ध भएको स्थितिमा खेलाडीले यसलाई अलग्गै किसिमले व्याख्या गर्न सक्छन् । यसबाहेक मेसी र बार्सिलोनाबीचको अनुबन्धमा उनलाई कुनै क्लबले किन्न चाहेमा कम्तीमा ७० करोड युरो तिर्नुपर्ने उल्लेख छ । क्लब मान्छ भने अब लागू हुने भनेको यही हो । मार्काले अगाडि लेखेको छ, ‘अब बार्सिलोनामा मेसीको भविष्य के हुनेछ भन्ने सबै सम्भावना यही कानुनी अप्ठ्यारोमा अडिएको छ ।’

क्याम्प नोउको बाहिर मेस्सीको समर्थनमा भएको प्रदर्शन तस्बिर : रोयटर्स

सन् २००४ मा मेसीले १७ वर्षको उमेरमा बार्सिलोनाका लागि डेब्यु गरेका थिए । त्यसयता उनले कीर्तिमानी ६ सय ३४ गोल गरिसकेका छन् । मेसीले बार्सिलोना छोड्न चाहेपछि उनको नयाँ गन्तव्य कहाँ हुनेछ, त्यसबारे चर्चा सुरु भइसकेको छ । सबैको पहिलो अनुमान हो, मेसी जान सक्ने भनेको इंग्लिस प्रिमियर लिगमा हो । त्यसमा पनि म्यानचेस्टर सिटीमा । पहिलो कारण त पेप ग्वार्डिओला नै भए किनभने उनी बार्सिलोनाको प्रशिक्षक छँदाको समय मेसीका लागि स्वर्णिम मानिन्छ ।

फेरि सिटी नै यस्तो क्लब हो, जसले मेसीको मोटो न मोटो तलब बेहोर्न सक्छ । अर्को इंग्लिस क्लबले पनि मेसीलाई अनुबन्ध गर्न इच्छुक देखिएको छ । इंग्ल्यान्डबाहिर केही क्लब यस्ता पनि छन्, जसले मेसीलाई अनुबन्ध गर्न सक्छन् र यसमा सबैभन्दा अगाडि रहेको छ, पेरिस सेन्ट जर्मेन (पीएसजी) । इटालीको इन्टर मिलान पनि मेसीलाई अनुबन्ध गर्न सक्ने क्लब मानिएको छ । यसबीच समाचार के पनि आइरहेको छ भने बार्सिलोना कुनै प्रकारको कानुनी झमेलामा फस्न चाहँदैन ।

किनभने यस्तो भएमा यसले नयाँ सिजन क्लबको प्रदर्शनमा फरक पार्ने अनुमान छ । बरु उसले नयाँ प्रस्ताव के ल्याउन लागेको छ भने जुन क्लबले मेसीका लागि २० करोड पाउन्ड तिर्नेछ, क्लब आफ्ना स्टार खेलाडीलाई छाड्न तयार हुनेछ । स्पेनी मिडियाका अनुसार कानुनी लडाइँ सुरु भयो भने त्यसको निर्णय जता पनि जान सक्नेछ । त्यसअनुसार बार्सिलोनाले चर्को मूल्य पाउन पनि सक्छ या मूल्य शून्य पनि हुन सक्नेछ । बार्सिलोना जोखिम नउठाउने मनसायमा पनि पुगेको छ ।

प्रकाशित : भाद्र ११, २०७७ १०:४२
प्रतिक्रिया
पठाउनुहोस्

हत्या आरोपमा प्रहरी हिरासतमा रहेका युवकको मृत्यु

आफन्तले प्रहरीकै कुटाइले ज्यान गएको आरोप लगाइरहँदा प्रहरीले भने उनी किड्नीका बिरामी भएकाले त्यसैका कारण मृत्यु भएको दाबी गरेको छ ।
शिव पुरी

रौतहट — गरुडास्थित इलाका प्रहरी कार्यालयले कर्तव्य ज्यान मुद्दामा हिरासतमा राखेका एक युवकको बिहीबार बिहान उपचारको क्रममा मृत्यु भएको छ । युवकका बुबाले प्रहरीको कुटाइबाट छोराको मृत्यु भएको आरोप लगाएका छन् ।

साउन ३१ गते राति गरुडा नगरपालिका–८ जिगडियाका १७ वर्षीय निरञ्जन रामको घाँटी रेटी हत्या भएको थियो । हत्याको आरोपमा भोलिपल्ट पक्राउ गरिएका गाउँकै १९ वर्षीय विजय महराको उपचारका क्रममा वीरगन्जमा मृत्यु भएको हो ।

‘प्रहरीको ज्यादतीले मेरो छोराको ज्यान गयो,’ बुवा पनिलाल महराले भने, ‘पक्रेको दिनदेखि छोरालाई भेट्न पाइएन । अस्पताल भर्ना गरेको खबर पाएर जाँदा पनि प्रहरीले भेट्न दिएन । छोरामा रोग थिएन । अहिले कुटेरै मार्‍यो ।’

विजयको पिसाब र दिसामा समस्या देखिएपछि गरुडास्थित अनमिका अस्पताल लगिएको प्रहरीले जनाएको छ । तर, त्यहाँ उपचार सम्भव नभएपछि चिकित्सकले बाहिर लैजान सुझाव दिएका थिए । अनमिकाका चिकित्सक आरबीप्रसादका अनुसार विजयको दिसा–पिसाबबाट रगत बगेको पाइएको थियो । ‘हेमोग्लोबिनको मात्रा पनि कम हुँदै गएको थियो । पिसाबमा रगत जमेको पाइयो,’ उनले भने, ‘विजयलाई कतै केही समस्या छ भनेर सोधेका थियौं । उनले पिसाब गर्दा रगत बग्यो भने । त्यसै बेला उनलाई बाहिर लैजान प्रहरीलाई सुझाव दियौं ।’

तीन दिनअघि निरञ्जन राम हत्या संघर्ष समितिले पत्रकार सम्मेलन गरी विजयलाई प्रहरीले हिरासतमा कुटपिट गरी घाइते बनाएको जनाएको थियो । हत्या आरोपमा प्रहरीले विजयसहित सात जनालाई कर्तव्य ज्यान मुद्दा लगाएको छ ।

नेपाल उत्पीडित जातीय संघ रौतहटका जिल्ला अध्यक्ष नाथुराम परियारले प्रहरीको ज्यादतीले सीमा नाघेको बताए । ‘हत्यापछि जाहेरी लिएर जाँदा महिला र दलितमाथि गरुडा प्रहरीले दुर्व्यवहारसमेत गर्‍यो,’ उनले भने, ‘हिरासतमा मरणासन्न हुने गरी विजयलाई कुटेर मार्ने प्रहरीमाथि कारबाही हुनुपर्छ ।’ दलित फाउन्डेसनका अभियन्ता मनोज रामले पनि विजयलाई अपराध कबुल गराउने निहुँमा हिरासतमा तीन सुरक्षाकर्मीले बुट र लाठीले हानेर घाइते बनाएको आरोप लगाए ।

विजयको पिसाबमा समस्या आएपछि भदौ ४ गते उपचारका लागि वीरगन्जस्थित नेसनल मेडिकल कलेज पठाइएकोमा बिहीबार बिहान मृत्यु भएको गरुडाका डीएसपी ज्ञानकुमार महतोले बताए । उनले विजयलाई कुटपिट नगरिएको दाबी गरे । ‘पहिलेदेखि नै किड्नीको समस्या रहेछ । हिरासतमा हुँदा पिसाब फेर्न समस्या भएपछि उनलाई वीरगन्ज पठाइएको हो,’ उनले भने, ‘यहाँ कुनै किसिमको कुटपिट भएको छैन । रोगले नै मृत्यु भएको हो ।’ विजयका पत्नी र सात महिनाकी छोरी छन् ।

प्रकाशित : भाद्र ११, २०७७ १०:३१
पूरा पढ्नुहोस्
प्रतिक्रिया
पठाउनुहोस्
×