बायर्नलाई ‘ट्रेबल’ उपलब्धिको अवसर- खेलकुद - कान्तिपुर समाचार

बायर्नलाई ‘ट्रेबल’ उपलब्धिको अवसर

एजेन्सी

लिस्बन — सन् २०२० बायर्न म्युनिकका लागि सधैं सम्झनलायक हुन सक्नेछ । बार्सिलोनालाई अविश्वसनीय रूपमा ठूलो अन्तरले हराएयता बार्यनले लियोनलाई पनि सजिलै पराजित गरेको छ ।यसका लागि बायर्नले पक्कै पनि खेलको सुरुमा संघर्ष गर्नुपर्‍यो, तर जतिबेला जित हात पर्‍यो, त्यतिबेला यसलाई सजिलो जित भन्न सकिने छ ।

अब बायर्नसामु दुर्लभ ऐतिहासिक उपलब्धिको अवसर छ । त्यो भनेको ‘ट्रेबल’ उपाधिको मौका हो । सर्ज जेनाब्रीको दुई र रोबर्ट लेवान्डोवस्कीको एक गोलमा बायर्न म्युनिकले बुधबार लियोनलाई ३–० ले हराएर युरोपेली च्याम्यिन्स लिगको फाइनल यात्रा तय गर्‍यो । अब उपाधिको भिडन्तमा बायर्नले पेरिस सेन्ट जर्मेन (पीएसजी) को सामना गर्नेछ । स्टाडियो जोसे एल्भाल्डेमा भएको खेलमा लियोनले सुरुमा पाएको दुई मौका सदुपयोग गर्न सकेन । अन्त्यमा फ्रान्सेली क्लब त्यसको चर्को मूल्य तिर्न बाध्य रह्यो र प्रतियोगिताबाट बाहिरियो ।

त्यसलगत्तै जेनाब्रीले १८ औं मिनेटमा पहिलो गोल गरे भने खेलले आधा घण्टाको समय छुँदा दोस्रो गोल थपे । लेवान्डोवस्कीले ८८ औं मिनेटमा तेस्रो गोल गरे । यो उनको सिजनको ५५ औं गोल रह्यो । बायर्नले च्याम्पियन्स लिगका १० खेलमा ४२ गोल गरिसकेको छ । त्यसमा बार्सिलोनामाथि प्राप्त ८–२ को जित पनि पर्छ । अब बायर्नसामु घरेलु लिग र कपसँग च्याम्पियन्स लिग जित्ने अवसर आएको छ । बायर्नले जर्मन बुन्डेसलिगा र जर्मन कप दुवै जितिसकेको छ ।

जितपछि प्रतिक्रिया दिँदै बायर्न प्रशिक्षक हान्सी फ्लिकले फाइनल प्रवेशका लागि आफ्नो टिमले कडा मिहिनेत गर्नुपरेको बताए । उनको भनाइ थियो, ‘हामीलाई थाहा थियो, सेमिफाइलन सजिलो हुन्न । लियोनले सुरुमा नै हामीलाई दबाबमा राख्न सफल रह्यो । म्यानचेस्टर सिटी र युभेन्ट्सविरुद्ध लियोनले त्यसै जित निकालेको थिएन ।

लियोन प्राविधिक र रणनीतिक दुवै रूपमा बलियो छ । त्यसैले सुरुमा हामीलाई पक्कै पनि केही गाह्रो भयो ।’

उनले थपे, ‘हाम्रो डिफेन्सले पनि आजको खेलमा राम्रो गर्‍यो । यो नै हाम्रो टिमको सबैभन्दा बलियो पक्ष हो । तर पनि म के मान्छु भने लियोनले राम्रो खेलेको हो । अन्त्यमा हामी सबै खुसी छौं र अझ राम्रो गर्न प्रेरित छौं ।’

उनले बायर्नका लागि अहिले सपना साकार हुने स्थिति रहेको माने । प्रशिक्षक फ्लिकले अब आफ्नो टिमको ध्यान आइतबार हुने फाइनलमा केन्द्रित हुने र त्यसअगाडि आफ्ना खेलाडीलाई तयार गर्ने चुनौती रहेको बताए ।

घरेलु फ्रान्सेली लिग वानमा यसपल्ट राम्रो गर्न नसकेको लियोनका लागि च्याम्पियन्स लिगमा सेमिफाइनलसम्मको यात्रा भने सम्झनलायक रहनेछ । हारपछि प्रतिक्रिया दिँदै लियोनका ब्राजिली खेलाडी मार्सेलोले भने, ‘आज हामी सुरुमै गोल गर्न चुक्यौं र यसको मूल्य पनि चुकायौं । हाम्रो आक्रमणमा केही कमजोरी देखियो । तर मलाई टिमको प्रदर्शनमा गर्व छ । हामीले आज बायर्नका रूपमा निकै बलियो टिमको सामना गर्‍यौं र उसकै स्तरमा प्रदर्शन गर्न पनि सफल रह्यौं ।’

प्रकाशित : भाद्र ५, २०७७ ११:०५
प्रतिक्रिया
पठाउनुहोस्

युरोपा लिग फाइनल शुक्रबार : इन्टरविरुद्ध सेभिया

हिमेश

काठमाडौँ — कोरोना भाइरस संक्रमणको कारण बिथोलिने सम्भावनाबाट गुज्रेको थियो, युरोपा लिग पनि । तर धन्न, यस्तो भएन । शुक्रबार राति यसको फाइनल हुँदैछ ।  नेपाली समय अनुसार राति पौने एक बजे खेल हुनेछ, जर्मन सहर कोलोनमा ।

प्रतियोगिताले नकआउट ‘मिनी टुर्नामेन्ट’ को रूप लिएयता अब दुई टिमको मात्र चुनौती बाँकी रहेको छ ।

एकातर्फ सिरी ‘ए’ मा लामो र समृद्ध इतिहास बोकेको इन्टर मिलान छ भने अर्कोतर्फ युरोपा लिग विशेषज्ञ मानिएको स्पेनी ला लिगाको सेभिया छ । युरोपा लिग युरोपको दोस्रो ठूलो क्लब प्रतियोगिता हो र यसमा सेभियालाई महारथ प्राप्त छ । यो प्रतियोगिताको सबैभन्दा सफल हो, सेभिया, उसले यो उपाधि पाँच पल्ट जितिसकेको छ ।

अब पालो छैटौं अवसरको हो । प्रश्न यहाँनिर नै हो, के सेभियाको यात्रालाई इन्टरले रोक्न सक्छ त ? कम्तीमा कागजमा इन्टर नै बलियो छ । सेमिफाइनलमा इन्टरले साख्तरलाई एकपक्षीय रूपमा ५–० ले हराएको थियो । खासमा इन्टर च्याम्पियन्स लिगमा खेल्नु पर्ने टिम हो, तर अहिले युरोपा लिगमा छ । तर पनि उसले यो प्रतियोगितालाई ठूलो महत्त्व दिइरहेको छ ।

एन्टोनियो कोन्टेले भनिसकेका छन्, ‘हामी यो उपाधि जसरी पनि जित्न चाहन्छौं ।’ इटालीको सिरी ‘ए’ मा यसपल्ट विजेता युभेन्ट्सपछि इन्टर दोस्रो स्थानमा रहेको थियो, त्यो पनि खालि एक अंकको दूरीले । इन्टर अर्को सिजन लिग उपाधिका लागि युभेन्ट्सलाई कडा चुनौती दिने पक्षमा छ र यसका लागि पहिलो खुडकिलो रहेको छ, यही युरोपा कप ।

कोन्टेले इंग्लिस प्रिमियर लिगमा खेलेको केही खेलाडीलाई बटुलेर बलियो टिम बनाएको छ र यसमा सबैभन्दा मुख्य खेलाडी रहेका छन्, रोमेलु लुकाकु । उनी म्यानचेस्टर युनाइटेडमा उति साह्रो जम्न सकेनन, तर इन्टरका लागि यी फरवार्ड खुबै लयमा छन् । इन्टरको प्रदर्शन धेरै हदसम्म यही खेलाडीमा भर पर्नेछ ।

स्पेनी ला लिगामा चौथो स्थानमा रहेको सेभियाले पनि फाइलनसम्मको यात्रामा बलिया बलिया टिम म्यानचेस्टर युनाइटेड र रोमा जस्ता टिमलाई हराएको थियो । प्रशिक्षक लुलियन लोपेटेगुइको नेतृत्वमा सेभिया टिम एक प्रकारले पुनर्निर्माणको क्रममा छ । निश्चित छ, युरोपेली क्लब फुटबलको प्रशंसक हो भने यो हेर्न छुटाउन हुने खेल होइन ।

प्रकाशित : भाद्र ५, २०७७ १०:४७
पूरा पढ्नुहोस्
प्रतिक्रिया
पठाउनुहोस्
×