कराते प्रशिक्षण स्थगित- खेलकुद - कान्तिपुर समाचार

कराते प्रशिक्षण स्थगित

कान्तिपुर संवाददाता

काठमाडौँ — सरकारले खेलकुद प्रशिक्षण सुरु नगर्ने निर्णय गरेपछि टोकियो ओलम्पिकको तयारीमा रहेका कराते खेलाडीको प्रशिक्षण स्थगित गरिएको छ ।

सरकारले भदौ १ गतेदेखि खुला गर्ने तयारी गरेको क्षेत्रहरू राजधानी उपत्यकामा बढिरहेको कोरोना संक्रमित दरलाई मध्यनजर गरी सोमबार मन्त्रिपरिषद् बैठकले थप १५ दिन यथावत् राख्ने निर्णय गरेको थियो ।

कोरोनाको महामारीकै कारण १ वर्ष सारिएको ग्रीष्मकालीन ओलम्पिक अर्को वर्ष जापानमा हुँदै छ । त्यसका लागि करातेबाट छनोट प्रतियोगिताका लागि छानिएका दुई खेलाडीलाई राखेपको मौखिक स्वीकृतिमा सरकारको स्वास्थ्य सुरक्षा मापदण्ड पूरा गरी गत असार ७ देखि सातदोबाटोस्थित कराते एकेडेमीमा प्रशिक्षणमा राखिएको थियो । प्रशिक्षक दीपक श्रेष्ठले काठमाडौं उपत्यकामा कोरोना संक्रमित बढिरहेको र सरकारको निर्देशनअनुसार मंगलबारदेखि स्थगित गरिएको जानकारी दिएका छन् ।

कोरोना महामारी र सरकारले लागू गरेको लकडाउनपछि घरेलु खेलकुद गतिविधि ५ महिनादेखि ठप्पप्रायः छ । सरकारले भदौ १ देखि प्रशिक्षण सुरु गर्न सकिने निर्णय साउन ५ गते गरेको थियो । त्यहीअनुसार ओलम्पिक तयारीमा रहेका खेलका खेलाडीसहित फुटबल र क्रिकेट खेलको प्रशिक्षण सुरु गर्न सम्बन्धित संघले तयारी थालेका थिए ।

प्रकाशित : श्रावण २८, २०७७ ०७:४९
प्रतिक्रिया
पठाउनुहोस्

बासेलमाथि साख्तरको जित

एजेन्सी

ग्लेसेनकिरचेन — साख्तर डोनेस्कले बासेलमाथि ४–१ को जित निकाल्दै मंगलबार युरोपा लिगको सेमिफाइनल स्थान निश्चित गरेको छ । अब फाइनल प्रवेशका लागि सन् २००९ को विजेताले इन्टर मिलानसँग खेल्नेछ ।

साख्तरका लागि जुनियर मारेस, टासन, एलान प्याट्रिक र डोडोले गोल गरे । रिकी भानले खेलको अन्त्यतिर बासेलका लागि एक गोल फर्काए । तर त्यो सान्त्वना मात्र साबित भयो । युक्रेनी च्याम्पियनले खेलमा अन्य धेरै अवसर गुमाएको थियो । ती सबैमा सफल रहेको भए बासेलमाथि अझ ठूलो अन्तरको जित सम्भव हुने थियो ।

प्रकाशित : श्रावण २८, २०७७ ०७:४८
पूरा पढ्नुहोस्
प्रतिक्रिया
पठाउनुहोस्
×