शनिबार एफए कप फाइनल : चेल्सीविरुद्ध आर्सनल

कान्तिपुर संवाददाता

काठमाडौँ — विश्व फुटबलको सबैभन्दा पुरानो प्रतियोगिता एफएकपको फाइनल शनिबार हुँदैछ र इंग्लिस फुटबलको सबैभन्दा प्रतिष्ठित कप उपाधिका लागि दुई लन्डन क्लब भिड्दै छन्, चेल्सी र आर्सनल ।

खेल वेम्बलीमा हुनेछ र नेपाली समय अनुसार राति १०:१५ मा सुरु हुनेछ । लन्डन डर्बी सावित फाइनल हुने वेम्बलीमा कोरोना भाइरस संक्रमणबाट बच्ने आचारसंहिता अनुसार दर्शक हुने छैनन् ।

आर्सनलले सेमिफाइनलमा डिफेन्डिङ च्याम्पियन म्यानचेस्टर सिटीलाई हराएको थियो भने चेल्सीले म्यानचेस्टर युनाइटेडको चुनौती समाप्त पारेको थियो । दुवै क्लबका व्यवस्थापक आफ्नो पहिलो सिजनमा छन् ।

त्यसैले चेल्सीका फ्रायन्क लाम्पार्ड र आर्सनलमा मिखेल आर्टेटा दुवै घरेलु सिजनको अन्त्य उपाधिसँगै गर्न चाहन्छन् । चेल्सी यस अगाडि नै इंग्लिस प्रिमियर लिगको शीर्ष चारमा रहेर युरोपेली च्याम्पियन्स लिगमा छनोट भइसकेको छ ।

त्यसैले यो चेल्सीका लागि सिजन अन्त्य गर्ने सबैभन्दा राम्रो अवसर हुनेछ । आर्सनलका लागि भने यो सिजन निराशाजनक रहेको छ, त्यसैले उसले एफएकप जितेर केही राहत महसुस गर्न सक्छ ।

आर्सनलका लागि यसपल्टको सिजनको प्रदर्शन प्रिमियर लिग सुरु भएयताका २५ वर्षमा सबैभन्दा खराव रहेको छ र शीर्ष छ स्थानमा पनि रहन असफल रहेको छ ।

प्रकाशित : श्रावण १७, २०७७ ०८:१४
प्रतिक्रिया
पठाउनुहोस्

बाढीपीडितलाई चाउचाउकै भर

मोहन बुढाऐर, गणेश चौधरी

धनगढी, टीकापुर — कैलालीको भजनी नगरपालिका–३ कुसमघाटकी भावना सोपका ७ वर्षमुनिका चार छोराछोरी छन् । बुधबारको डुबानबाट विस्थापित भएका उनीहरूले तीन दिनदेखि भात–रोटी खान पाएका छैनन् । बच्चाहरू बारम्बार आमासँग भात मागिरहेका छन् ।

कैलालीको भजनीमा शुक्रबार केही परिवारलाई उद्धार गरिँदै । तस्बिर सौजन्य : गंगा चौधरी

दाल–चामल र पकाउने भाँडासमेत नहुँदा उनले छोराछोरीलाई पकाएको खाना खुवाउन सकेकी छैनन् । ‘चाउचाउ, बिस्कुटले बच्चाहरू पेट दुख्यो भन्न थाले,’ उनले भनिन्, ‘अहिले त चाउचाउ खानै मन गर्दैनन् । भात केले पकाउने ? बाढीले समस्यामा पार्‍यो ।’

बुधबार बाढी बस्ती पसेर डुबानमा परेका भावनाको परिवारलाई सुरक्षाकर्मीले उद्धार गरेर स्थानीय सुरक्षित गृहमा पुर्‍याएको हो । उनीहरूले राहतका नाममा शुक्रबारसम्म चाउचाउ, बिस्कुट र पानी मात्रै पाएका छन् । डुबानबाट विस्थापित भएका ४५ परिवारलाई कुसमघाटमा राखिएको छ । वडा कार्यालयले उनीहरूलाई चाउचाउ, बिस्कुट र खानेपानीको मात्रै व्यवस्था मिलाउन सकेको छ ।

उक्त सुरक्षित गृहमै रहेका अर्का बाढीपीडित प्रभातकुमार सोपले उद्धारपछि चाउचाउ, बिस्कुट र पानीका बोतलबाहेक कसैबाट अरू खानेकुरा नपाएको बताए । भजनी–७ का रञ्जित लामाले त चाउचाउ र बिस्कुट पनि पाउन नसकेको गुनासो गरे । ‘कसैले ड्राइफुड, पानी र त्रिपाल पाइरहेका छन्,’ उनले भने, ‘कोहीले त्यही पनि पाउन सकेका छैनन् ।’

वडाध्यक्ष विक्रम चौधरीले अहिलेसम्म उद्धार चलिरहेकाले ड्राइफुड र पानीको व्यवस्था मात्रै मिलाउन सकेको बताए । ‘पानीको सतह फेरि बढेको छ । जनताको जीउज्यानको चिन्ता बढेको छ । अन्य व्यवस्था गर्नतिर ध्यान पुर्‍याउन सकिएको छैन,’ उनले भने । उद्धार सकिएपछि मात्रै खाद्यान्न, भाँडाकुँडा र लुगाकपडालगायतको व्यवस्था मिलाउनतिर लाग्ने उनले बताए ।

बुधबार स्थानीय नदी र खोलाहरूमा आएको बाढी पस्दा डुबानमा परेका भजनी र टीकापुर नगरपालिका, जानकी र जोशीपुर गाउँपालिकाका ५ हजारभन्दा बढी परिवारको उद्धार गरिएको थियो । भजनीका नगरप्रमुख शेरबहादुर चौधरीले बाढीपीडित कसैलाई पनि भोको र नांगो हुन नदिने दाबी गरे । ‘अहिलेसम्म उद्धार चलेकाले कोही भोकभोकै पनि बसेका होलान् । अब राहत वितरणमा ध्यान दिन सुरु गरेका छौं,’ उनले भने । एकद्वार प्रणालीबाट राहत वितरणमा जोड दिइएको उनले बताए । अन्य संघसंस्थाले आफ्नो किसिमले राहत वितरण गर्दा कसैले पाउने कसैले नपाउने अवस्था हुन सक्ने उनले बताए ।

विस्थापित परिवारलाई स्थानीय विद्यालय, सुरक्षित गृह र हुलाकी सडकमा राखिएको छ । उनले हुलाकी सडक पनि असुरक्षित नै भएकाले त्यहाँबाट सुरक्षित स्थानमा सार्नका लागि विकल्पमा छलफल भइरहेको उनले बताए । बुधबार बाढीले बगाएर बेपत्ता भएका भजनीका तीनै जनाको शव फेला परेको छ । यसअघि ११ वर्षीय स्केल चौधरीको शव बिहीबार फेला परेको थियो ।

प्रकाशित : श्रावण १७, २०७७ ०७:५९
पूरा पढ्नुहोस्
प्रतिक्रिया
पठाउनुहोस्
×