न्युयोर्क — रोजर फेडेरर सन् २०२० मा सर्वाधिक कमाउने खेलाडी सूचीको शीर्ष स्थानमा परेका छन् । फोर्ब्सले शुक्रबार निकालेको सर्वाधिक कमाउने खेलाडी सूचीमा उनी पहिलो पल्ट नम्बर १ मा परेका हुन् ।
फोर्ब्सका अनुसार यो वर्ष उनले कर तिर्नु अगाडि कमाएको रकम १० करोड ६३ लाख अमेरिकी डलर रहेको छ । विश्व टेनिसका लेजेन्ड स्विस खेलाडीले कीर्तिमान २० ग्रान्ड स्लाम जितेका छन् ।
सन् १९९० मा विश्व टेनिसमा प्रवेश गरेका फेडेरर सन् २०१५ मा सर्वाधिक कमाउने सूचीको पाँचौं स्थानमा थिए । पछिल्लो १२ महिनामा उनले प्रायोजक र पुरस्कार राशिबाट यति धेरै रकम कमाएका हुन् ।
सन् २०१३ मा उनी दोस्रो स्थानमा थिए र यो २०२० लाई छाडेर उनको सबैभन्दा बढी कमाएको वर्ष रहेको थियो ।
यस वर्षको सूचीमा दोस्रो स्थानमा पोर्चुगिज फुटबल स्टार क्रिस्टियानो रोनाल्डो रहेका छन् । उनले १०५ मिलियन अमेरिकी डलर कमाएका छन् । त्यस्तै १०४ मिलियन अमेरिकी डलर कमाइसहित बार्सिलोना स्टार लियोनल मेसी तेस्रो स्थानमा रहँदा नेइमार ९५.५ मिलियन अमेरिकी डलर सहित चौथो स्थानमा रहेका छन् । त्यस्तै अमेरिकी बास्केटबल खेलाडी लेब्रोन जेम्स ८८.२ मिलियन अमेरिकी डलर कमाइसहित पाँचौं स्थानमा रहेका छन् ।
प्रकाशित : जेष्ठ १७, २०७७ ०६:४३