ईपीएल जुन १७ बाट
लन्डन — इंग्लिस प्रिमियर लिग (ईपीएल) जुन १७ बाट सुरु हुने भएको छ । त्यसअघि कोरोना संक्रमणबाट जोगिन लिगका सबैखाले प्रक्रिया पूरा गरिनेछ ।
जुन १७ मा दुई खेल हुनेछन्, एस्टन भिल्लाविरुद्ध सेफिल्ड युनाइटेड र म्यानचेस्टर सिटीविरुद्ध आर्सनल । दुवै खेल लिग रोकिनुअगाडि स्थगित गरिएका थिए । यी खेल सकिँदा सबै टिमले २९ चरणका खेल पूरा गर्नेछन् ।
जुन १९ देखि २१ बीच इंग्लिस फुटबलको माथिल्लो डिभिजनका अन्य खेल हुनेछन् । मार्च ९ मा ईपीएलमा लेस्टर र एस्टन भिल्लाबीच खेल भएको थियो । यो नै स्थगित हुनुअगाडिको अन्तिम खेल थियो । कोरोना महामारीका कारणा त्यसपछि इंग्लिस फुटबलको माथिल्लो चार डिभिजनका लिगका कुनै पनि खेल भएका थिएनन् ।
ईपीएलमा हुन बाँकी ९२ खेल टेलिभिजनमा प्रत्यक्ष प्रसारण गरिनेछ र यसमध्ये केही खेल बीबीसीमा पनि देखाइनेछ । यस्तै खेलको समय पनि फेरिएको छ ।
लिगका प्रमुख कार्यकारी रिचार्ड मास्टर्सले लिग सुरु भए पनि रंगशालामा दर्शक हुन नसक्नु सबैभन्दा दुःखद पक्ष रहेको बताएका छन् । टोटनहमका लागि खेल्ने इंग्लिस कप्तान ह्यारी किनले भने फुटबल सुरु हुनु नै ठूलो भएको बताएका छन् ।
प्रकाशित : जेष्ठ १६, २०७७ ०७:३०