दक्षिण कोरियामा फुटबल सुरु
सोल — कोरोना भाइरस संक्रमणको महामारीयता दक्षिण कोरियामा शुक्रबारदेखि व्यवसायिक फुटबल सुरु भएको छ । पहिलो दिनको खेलमा डिफेन्डिङ च्याम्पियन जियोनबक मोटर्सले कप विजेता सुवान ब्लुविंग्सलाई १–० हरायो ।
त्यसमा डंग गुक लीले ८४ औं मिनेटमा गोल गरे । खेल भएको ४२ हजार ४ सय ७७ दर्शक क्षमताको जियोन्जु विश्वकप रंगशाला खालि थियो र दर्शकलाई प्रवेश गर्न दिइएको थिएन् ।
रंगशालामा खेलाडी, खेल पदाधिकारी र पत्रकार मात्र थिए । यसअघि प्राय: खासै चर्चा नहुने पहिलो डिभिजनको फुटबल के–लिग सबैको आकर्षण पनि बनेको छ । यो खेल टेलिभिजनबाट हेर्न अन्तर्राष्ट्रिय रूपमै ठूलो माग पनि रहेको थियो ।
महामारीका कारण विश्व फुटबल हुन नसकेको स्थितिमा के–लिग फेरि सुरु हुने पहिलो ठूलो प्रतियोगिता हो । खेलका क्रममा गोलमा खुसीयाली मात्र नभएर खेलाडीबीच कुराकानीलाई पनि प्रोत्साहद दिइएको थिएन् ।
सन् २००२ को विश्वकपका तीन खेल आथित्य गरेको जियोन्जु रंगशालामा पत्रकारको दीर्घा भने भरिएको थियो । अन्तर्राष्ट्रिय मिडियाले पनि यो खेललाई ठूलो महत्त्व दिएको छ ।
प्रकाशित : वैशाख २६, २०७७ १७:५४