फरक भूमिकामा खेलाडी

धेरै खेलाडीले अनलाइनको माध्यमबाट निःशुल्क फिटनेस कक्षा सञ्चालन गरिरहेका छन् आफ्नो सामाजिक दूरी कायम राख्दै । यसले निश्चित छ, अरूलाई शारीरिक रूपमा फिट रहन मदत गर्नेछ । अझ ओलम्पिक नरहेको वर्षमा अन्य खेलाडीलाई लयमा रहन पनि यसले मदत गर्नेछ ।

पूर्व म्याराथन विश्व कीर्तिमानधारी पाउल राडक्लिफ अहिले विश्व एथलेटिक्सका लागि अनलाइन कोर्सको तयारीमा छिन् । उनले भनेकी छन्, ‘अहिले सबैले सामाजिक दूरी कायम राख्ने प्रयास गरिरहेका छन् । त्यसैले रमाइलोका लागि सही, सबैले आफूलाई शारीरिक रूपमा व्यस्त राख्नुपर्छ । यसले पछि स्थिति सामान्य भएपछि नियमित काममा फर्कन मदत गर्छ ।’

राडक्लिफले यसअघि मानिसलाई सक्रिय राख्न पारिवारिक दौडको आयोजना गर्ने गरेकी थिइन् । अब भने यस्तै कामका लागि उनले अनलाइनको मद्दत लिने गरेकी छन् । अधिकांश प्रतियोगिता रद्द भएको वा सारिएको स्थितिमा विश्व एथलेटिक्समा तत्काल कुनै पनि प्रतिस्पर्धा हुने स्थिति छैन ।

त्यसैले खेलाडीले विशेषतः नयाँ पुस्ताका लागि आफ्नो अनुभव सुनाउने काम पनि गरिरहेका छन् । जमैकाका दुईपल्टकी १०० मिटर दौड च्याम्पियन सेली एना फ्रेसरले अहिले अनलाइनमा साना बच्चाहरूका लागि कथा सुनाउने काम गरिरहेकी छन् ।

यस्तै अस्ट्रेलियाकी हर्डल्स च्याम्पियन सेली पियरसनले भने विद्यार्थीका लागि कक्षा सञ्चालन गरिहेकी छन् । यो प्रवृत्तिले अन्य धेरै खेलाडीलाई पनि केही न केही गरिरहन प्रेरित गरेको छ । यसैक्रममा इंग्ल्यान्डका क्रिकेट खेलाडी जस बटलरले इन्स्ट्राग्राममा घरमै रहेर कसरी शारीरिक अभ्यास गर्ने भनेर सिकाइरहेका छन् । त्यस काममा उनलाई श्रीमती लुइसीले पनि मद्दत गरिरहेकी छन् ।

उनी आफैं व्यावसायिक ट्रेनर हुन् । बटलरको कामलाई धेरैले मन पराएका छन् । यता जर्मनीमा लङजम्पका विश्व च्याम्पियन मलिका मिहाम्बोले विद्यालय छाडेपछि कसरी खेलकुदलाई आफ्नो जीवनको भाग बनाउन सकिन्छ भनेर युट्युबमा अनलाइन कक्षा चलाइरहेकी छन् ।

उनी भन्छिन्, ‘सबै अभिभावकले आफ्ना सन्तान गलत बाटोमा नलागोस् भनेर यस्तो प्रयास गर्नैपर्छ । हामीले यस्तो काममा अलिकति मात्र सहयोग गर्न सक्छौं भने त्यो धेरै राम्रो हो । खेलकुदप्रति आकर्षित गर्न सके म धेरै खुसी हुने थिएँ ।’