खेलाडीको लकडाउन डायरी : को के गर्दैछन् ?- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

खेलाडीको लकडाउन डायरी : को के गर्दैछन् ?

नमिता दाहाल

काठमाडौँ — कोभिड–१९ (कोरोना भाइरस)को जोखिम नियन्त्रणका संंसारभरका खेलकुद प्रतियोगिताहरु बन्द गरिएका छन् । खेलकुद प्रतियोगिता बन्द भएसँगै खेलाडीहरु पनि फुसर्दिला भएका छन् । फुर्सदको यो समयमा प्राय खेलाडीहरु घरमै सेल्फ आइसोलेसनमा छन् । सरकारले नेपालभर एक साताका लागि लकडाउन गरेपछि सधैं खेलमा व्यस्त हुने खेलाडीहरु यतिबेला घरभित्रै सिमित भएका छन् । 


फुटबलका भरत खवास लकडाउन पछि घरमै सेल्फ आइसोलेसनमा छन् । अरुबेला खेल र जागिरबाट फुर्सद नहुने उनी फुर्सदिला भएका छन् । नयाँनयाँ किताबहरु पढिरहेका छन् । उनी यतिबेला भागवत गीता पढ्दैछन् । सेल्फ आइसोलेसनमा बस्दा समयको सदुपयोग गर्न उनले किताब पढ्ने र घरका सदस्यहरुसँग समय बिताइरहेका छन् । उनले भने, ‘किताब पढेर सेल्फ आइसोलेसनको सदुपयोग गर्दैछु ।’


यसरी सेल्फ आइसोलेसनमा बसेका खवासले सरकारद्वारा अपनाइएको लकडाउनको सम्मान गर्दै घरमै बस्न सम्पूर्णलाई आग्रह गरे । उनले आफू सुरक्षित भइ अरुलाई पनि सुरक्षित रहन आग्रह गरे । ‘स्वास्थ्य भन्दा ठूलो केही हैन । आफ्नो स्वास्थ्यको ख्याल गरी कोरोनाबाट बचौं ।’


करातेकी सुनिता मर्हजन पनि लकडाउनपछि काम र खेल दुवै नभएपछि फुर्सदमा छिन् । लकडाउन लामो छुट्टिजस्तो लागेको बताउने उनी घरपरिवारसँग समय बिताउँदै छिन् । व्यस्त तालिकाबाट परिवारसँग समय बिताउन पाएकोमा खुसी लागेको बताइन् । उनले भनिन्, ‘कोरोना महामारीले सबैमा नराम्रो असर पारिरहेको छ । तर हामीजस्ता व्यस्त मानिसहरुका लागि भने परिवारसँग समय बिताउने अवसर पनि भएको छ ।’


उनी परिवारका सबैजनासँगै भएर एकअर्काको स्वास्थ्यको ख्याल पनि राखिरहेको बताइन्। रमाइलो सँगै सबैलाई सजग रहन र स्वास्थ्यको ख्याल राख्न पनि उनले आग्रह गरिन् । ‘कोरोनालाई सहज रुपमा नलिऔं । आफ्नो र परिवार सबैको ख्याल गरौंं ।’


करातेका नविन रसाइली पनि घरमै छन् । समाचार पढ्ने र स्वास्थ्यको ख्याल गरी घरमै व्यायाम गर्दै बसेका छन् । सन् २०२० मा हुने भनिएको ओलम्पिकमा नेपालको तर्फबाट नकआउट चरणको माध्यमबाट छानिएका उनी कोरोनाका कारण ओलम्पिक सर्ने भएपछि फुर्सदमा छन् । सरकारले अपनाएको सर्तकताको पालना गर्दै घरमा बसेको उनले बताए । उनले भने, ‘खेलकुद सबै बन्द भयो । प्रशिक्षण पनि बन्द भयो । अहिले घरमा समाचार पढने, टेलिभिजन हेर्ने गर्दैछु ।’ अहिलेको नाजुक अवस्थामा सबैले सरकारले अपनाएको नियमको कार्यान्वयन गर्दै घरमा बसेर सजगता अपनाउनु नै बेस रहेको बताए । कोभिड–१९ विरुद्ध सरकारको अभियान सफल बनाउन सबैलाई आग्रह गरे । भने, ‘सबैजना घरमा बसौं । स्वास्थ्यको ख्याल गरी सरकारी नीतिको सम्मान गरौंं ।’


सबै खेल बन्द भएसँगै फुर्सदिला बनेका सबै खेलाडी आफ्नो स्वास्थ्यको ख्याल गर्दै सेल्फ आइसोलेसनमा छन् । कोरोना महामारीबाट बच्न अहिले आफ्नो स्वास्थ्यको हेरविचार र ख्याल नै सबैको मुख्य चासोको विषय बनेको छ ।


भलिबलकी रेश्मा भण्डारी पनि हाल घरको सेल्फ आइसोलेसनमा छिन् । फुर्सदको समयमा घरको काममा परिवारलाई सहयोग गर्ने र फिल्म हेरेर समय बिताइरहेकी छिन् । ‘घरको काम गर्ने, फिल्म हेर्ने, गीतहरु सुन्ने आदि गरेर दिन बितिरहेको छ ।’ सरकारले घर बाहिर ननिस्कनु भनेपछि नियम पालना गरिरहेको उनले बताइन् । भनिन्, ‘घरमा नै बसेर रमाइलो गर्नुस् । बाहिर नजानुस् । यसो गरेमा कोरोना रोकथाममा सहयोग पुग्छ ।’ चाँडै भाइरस निर्मूल भएमा सबैलाई सजिलो हुने र छिट्टै यो अवस्था हटोस् भन्ने कामना पनि गरिन् ।


नेपालमा पनि कोभिड–१९ को संक्रमण बढ्दै गएकाले स्वास्थ्यमा विचार पुर्‍याउन सबै खेलाडीको ध्यानाकर्षण भइरहेको छ । सबैजना कसरी कोरोनालाई नर्मूल पार्न सकिन्छ भन्नेमा जोड दिइरहेका छन् ।


क्रिकेटका सन्दिप लामिछाने पनि हाल घरमा सेल्फ आइसोलेसनमा रहेका छन् । इन्स्टाग्राम मार्फत आइसोलेसनको तेस्रो दिन बिताइरहेको भन्दै पोस्ट सेयर गरेका छन् । पोस्ट मार्फत उनले सबैलाई सुरक्षित रहन समेत आग्रह गरेका छन्।


क्रिकेट खेलाडी भुवन कार्की अहिले सम्पूर्ण काम बन्द गरेर घरमा बसेका छन् । उनले फिल्म, खेल सम्बन्धित भिडियो हेर्दै लकडाउनको समय उपयोग गरिरहेका छन् । उनले भने, ‘अहिले सबै बन्द छ । घरमा परिवारसँग समय बिताउने, फिल्म हेर्ने, खेलकुदका राम्रा राम्रा भिडियो हेर्ने गरिरहेको छु ।’


त्यस्तै क्रिकेट खेलाडी रूबिना क्षेत्री झापास्थित घरमै छिन् । फुर्सदको समयमा उनी घरमा सम्भव भएजति शारीरिक कसरत गर्दैछिन् । उनले भनिन्, ‘घरमै हलुका कसरत गर्दैछु । परिवारसँग रमाइलो गर्ने, फिल्म र भिडियोहरु हेर्दै दिन बिताउँदैछु ।’ यसरी फुर्सदमा रहँदा समयको सदुपयोग गर्दैै आफूमा लुकेका कला छन् भने प्रस्फुटन गर्न सकिने उनले बताइन् । कोरोनाको नडराइ सामाना गर्न र भ्रमपूर्ण खबरहरुको पछि नलागी सजगता अपनाउनु नै उत्तम रहने उनले सुनाइन् ।

प्रकाशित : चैत्र १३, २०७६ १७:५२
प्रतिक्रिया
पठाउनुहोस्

खेलमा कोरोनाको प्रभाव

कोरोनाका कारण विश्वभरीका महत्वपूर्ण खेलकुद प्रतियोगिता स्थगित
नमिता दाहाल

काठमाडौँ — कोरोना महामारीका कारण सार्वजनिक सभा समारोहहरु सबै बन्द छन् । कोरोना भाइरस (कोभिड–१९) खेलमा पनि उत्तिकै हाबी भइरहेको छ । संसारभरी नै खेलहरु स्थगित भइरहेका छन् । कोरोना प्रभावका कारण अहिले विश्व खेलकुद जगतमा नै ब्रेक लागेको छ ।

खेलकुदको महाकुम्भ मानिने ओलम्पिक पनि के हुने हो भन्नेमा प्रश्न उठ्न थालेको छ । जुलाईबाट हुने भनिएको खेल कोरोनाका कारण स्थगित हुन्छ या हुँदैन भन्नेमा विश्व खेल जगतको ठूलो ध्यानाकर्षण गराइरहेको छ ।
नेसनल बास्केटबल एसोसियसन (एनबीए) अमेरिकाले आफ्ना खेलकुदका सम्पूर्ण कार्यक्रमहरु अप्रिल १२ सम्मका लागि स्थगित गरेको छ । मेजर लिग सोसर(एमएलएस) अमेरिकाले पनि आफ्नो खेल तालिका पछि सारेको हो । कोरोनाको प्रकोपका कारण नेसनल हक्की लिगले पनि आफ्नो यो सिजन रोक्ने जानकारी दिएको छ । त्यस्तै फिफाले पनि हाल आफ्नो सम्पूर्ण कार्यक्रमहरुलाई पछाडि सारेको हो ।
कोरोनाका कारण इंग्ल्यान्ड र श्रीलंकाबीच हुने टेस्ट क्रिकेट पनि स्थगित भएको छ । प्रिमियर लिगसहित इंग्ल्यान्डका सम्पूर्ण फुटबल प्रतियोगिताहरु पनि स्थगित भए । पीएसजी र डर्टमन्ड बीचको खेल बन्द रंगशालामा खेलाइयो । बंगलादेशमा पनि वर्ल्ड ११ र एसिया ११ को खेल स्थगित भयो । केही खेलाडी तथा प्रशिक्षकमा कोरोना पुष्टि भइसकेको छ । उनीहरु क्वारेन्टाइनमा स्वास्थ्य लाभ गरिरहेका छन् ।
यसरी विश्वभरी सन्त्रास मच्चाइरहेको कोरोनाको प्रभावबाट नेपाली खेलकुद पनि अछुत रहन सकेन । नेपालमा कोरोनाको संक्रमण नभए पनि यसको त्रास रहेका कारण सावधानीका लागि खेलकुदका कार्यक्रमहरु बन्द गर्ने भनिएको छ । ‘खेलकुद कार्यक्रमहरुमा भिडभाड हुने भएकाले यसमा जोखिम नलिन खेलकुद कार्यक्रमहरु बन्द गर्न लागिएको हो,’ राष्ट्रिय खेलकुद परिषद्ले विज्ञप्तिमार्फत भनेको छ ।
कोरोना आतंक नबढेको भए अहिले ईपीएल चलिरहेको हुन्थ्यो । पहिलोपटक डबल राउन्ड रोबिनमा हुन लागेको राष्ट्रिय महिला लिगको पनि चलिरहेको हुन्थ्यो ।
कोरोनाले सबै क्षेत्रमा असर पार्‍यो । खेलकुदको सबै विधा अहिले कोरोनाको चपेटामा छ । यसबाहेक नेपालमा यसै मार्च अन्तिम साता विश्वकप छनोट फुटबल अन्तर्गतका दुई खेल हुँदै थिए । नेपालले २६ मार्चमा चाइनिज ताइपेई र ३१ मा अस्ट्रेलियासँग खेल्ने तालिका थियो । तर यी खेल पनि फुटबलको सर्वोच्च निकाय फिफादेखि एएफसीसम्मले अहिले सम्पूर्ण छनोट खेल स्थगित गरेपछि यो खेल पनि नहुने भएको हो ।

यसवर्ष घरेलु मैदानमा ठूला प्रतियोगिता हुने भनिएको थियो । जसले गर्दा नेपाली खेलप्रेमी दर्शक पनि निकै उत्साहित देखिन्थे । तर खुसी भने कोरोनाले लग्यो । यसै सन्दर्भमा पाल्पा घर भइ हाल कलंकी बसोबास गर्ने दुर्गा कार्की भन्छन्, ‘ईपीएलमा क्रिस गेल आउँछ उसले खेलेको प्रत्यक्ष हेर्न पाइने भयो भनेर खुसी थिएँ । अब कोरोनाले इपीएल नै स्थगित भयो ।’
यस्तैमा ईपीएलका प्रबन्ध निर्देशक अमिर अख्तरले पनि ईपीएल स्थगित भएको घोषणा गर्दा निकै दुःखी देखिन्थे । प्रायः खेलहरु स्थगित भएपछि खेलाडी पनि फुर्सदिला देखिन्छ । सबै खेल स्थगित भएपछि खेलाडी तथा खेलकुद संघका सबै सदस्यहरु फुर्सदिला भएका हुन् ।

फुटबल खेलाडी भरत खवास भने हाल आर्मीको नियमित प्रशिक्षण गरिरहेका छन् । ‘कोरोनाले गर्दा सबै खेलहरु रोकिएपछि हाल फुर्सदमा नै छु । तर हाम्रो आर्मीको नियमित प्रशिक्षण भने गरि रहेको छु,’ खवासले भने ।

राष्ट्रिय क्रिकेट टोली भने भर्खरै इर्स्टन रिजन खेलेर आएको छ । ईपीएल नहुने भएपछि अहिले क्रिकेट खेलाडी पनि फुर्सदिला देखिएका छन् । तर नेपालले भने अप्रिलमा विश्वकप छनोट लिग २ को त्रिकोणत्मक सिरिज नामिबियामा खेल्दै छ ।

राष्ट्रिय पुरुष भलिबल टोलीको बंगलादेशमा हुने एभीसी सेन्ट्रल जोन पनि पछि सरेको छ । जसका कारण एक हप्ताभन्दा बढी प्रशिक्षण गराइसकेको प्रशिक्षण पनि हाल रोकिएको छ ।

नेपालमा मुख्यतः हुने खेल भनेको फुटबल र क्रिकेट नै हुन् तर अहिले भने दुवै खेलका सम्पूर्ण खेलहरु स्थगित भएका छन् । एन्फाले कोरोना संक्रमणका कारण आफ्नो जिल्ला स्तरीय संघहरुलाई पनि अब तय हुने खेलहरु नर्गन आग्रह गरेको छ ।
अहिले चीनपछि सबैभन्दा बढी कोरोनाको संक्रमण देखिएको इटालीमा हो । इटालीमा भने केही खेल स्थगित भएका छन् भने केही खेल खाली स्टेडियममा भइरहेका छन् ।
नेपालमा भने भर्खरै केही खेलकुद कार्यक्रमहरु सम्पन्न भएका छन् । जसमा सताक्षी गोल्डकप, राइनो गोल्डकप, बाग्मती गोल्डकप, बुढासुब्बा गोल्डकप, खप्तड गोल्डकप, माइभ्याली गोल्डकप र भर्खरै सम्पन्न भएको आहा रारा फुटबल प्रतियोगिता सम्पन्न भएका छन् ।

हाल भने नेपालमा बी डिभिजन अन्तर्गतका खेलहरु भइरहेको छ । त्यस्तै सर्लाहमिा राजर्षि जनक गोल्डकप, झापामा प्रदेश नम्बर–१ स्तरीय सुखानी सहिद स्मृती महिला फुटबल, उदयपुरमा कटारी मेयर कप जस्ता खेलहरु भने भइरहेका छन् ।

स्थगित भएका केही महत्वपूर्ण खेलहरु :
एभरेस्ट प्रिमियर लिग(इपीएल)–चैत १ देखि हुने भनिएको
तिलोत्तमा गोल्डकप–चैत १ देखि भनिएको
राष्ट्रिय महिला लिग–चैत ३ देखि हुने भनिएको
पुरुष टोलीको प्रशिक्षण– एक साताभन्दा बढी प्रशिक्षण भएको
भरतपुर गोल्डकप–चैत ६ गतेदेखि नारायणगढको क्याम्पस चौरमा हुने भनिएको
सुदुरपश्चिम राजधानी गोल्डकप–चैत २२ देखि २८ गतेसम्म कैलालीमा हुने भनिएको
सुदूरपश्चिमा गौरीगंगा गोल्डकप–चैत २९ गतेबाट हुने भनिएको
गणेशमान सिंह स्मृति बक्सिङ–गण्डकी प्रदेश ५, कर्णाली र सुदुरपश्चिमको छनोटसँगै चैत १८ देखि २२ गतेसम्म तय भएको राष्ट्रिय प्रतियोगिता

राष्ट्रिय तथा अन्तर्राष्ट्रिय स्तरमा फैलिएको कोरोना भाइरसले अझै खेलमा के कति असर पार्छ भनेर यकिन भन्न सक्ने अवस्था भने छैन । विश्व स्वस्थ्य संगठनले विश्वव्यापी स्वास्थ्य संकटकाल घोषणा गरिसकेको छ । कोरोना भाइरस एकपछि अर्को देशमा आक्रान्त रुपमा फैलिरहेको छ । भाइरसको जोखिम बढेको हुँदा नेपालले पनि सुरक्षित हुन खेलहरु स्थगित गरेको खेलकुद परिषद्ले बताएको छ ।

प्रकाशित : चैत्र ३, २०७६ १६:३६
पूरा पढ्नुहोस्
प्रतिक्रिया
पठाउनुहोस्
×