ग्वार्डिओला र मेसीद्वारा लाखौं युरो सहयोग

(एजेन्सी)

बार्सिलोना — म्यानचेस्टर सिटीका व्यवस्थापक पेप ग्वार्डिओलाले कोरोना भाइरसबाट बच्न संघर्षरत आफ्नो देश स्पेनलाई चिकित्सकीय सामग्री खरिदमा सहयोग होस भनेर १० लाख युरो प्रदान गरेका छन् ।

बार्सिलोनाका पूर्व प्रशिक्षक रहेका ग्वार्डिओलाले यो रकम मेडिकल कलेज अफ बार्सिलोनालाई प्रदान गरेका हुन् र यो रकम कोरोना भाइरस संक्रमितको उपचारमा चाहिने सामग्री किन्न प्रयोग हुनेछ ।


यस्तै बार्सिलोनाको हस्पिटल क्लिनिकले लियोनल मेसीबाट पनि सहयोग प्राप्त भएको जनाएको छ । हस्पिटलले ट्विट गर्दै भनेको छ, ‘लियो, धन्यवाद, सहयोगका लागि ।’


बार्सिलोना कप्तान मेसीले कति रकम सहयोग गरेका हुन् भनेर हस्पिटलले खुलासा गरेको छैन । तर, क्याटलान स्पोर्टस डेलीका अनुसार मेसीले पनि १० लाख युरो दिएका छन् ।


स्पेन कोरोना भाइरसको संक्रमणबाट सबभन्दा प्रभावित देशमध्ये रहेको छ । यस भाइरसको संक्रमणबाट मृत्यु हुनेको सूचीमा स्पेन तेस्रो देशमा छ । चीन र इटालीपछि स्पेनमा धेरैको ज्यान गएको छ ।अहिलेसम्म त्यहाँ ४० हजार भन्दा बढी यस भाइरसबाट संक्रमति भइसकेका छन् । प्रकाशित : चैत्र १२, २०७६ ०८:५१

ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

सुरक्षा सामग्री नभएको भन्दै अस्पताल बन्द

प्रकाश बराल

बागलुङ — कोरोना भाइरस संक्रमणको जोखिम बढिरहेका बेला बागलुङको एक निजी अस्पताल बन्द भएको छ । सदरमुकामस्थित मुक्तिनाथ हस्पिटल एन्ड रिसर्च सेन्टर ‘सामग्री अभाव’ को कारण देखाउँदै बन्द भएको हो । अस्पतालले गेटमा सूचना टाँसेर केही दिनका लागि अस्पताल बन्द गरिएको जानकारी दिएको छ ।

अत्यावश्यक सामग्री नहुँदा सेवाप्रवाह गर्न नसकेर बन्द गरिएको अस्पताल व्यवस्थापन समितिका अध्यक्ष सन्तोष रावलले बताए । ‘अत्यावश्यक सुरक्षा सामग्री चार दिनदेखि मगाएको आएको छैन,’ उनले भने, ‘सामान आयो भने सञ्चालनमा ल्याउँछौं ।’

अस्पताल बन्द गरिएपछि चौतर्फी टिप्पणी हुन थालेको छ । बागलुङ नगरपालिकाका प्रमुख जनकराज पौडेलले उक्त कार्य खेदजनक र गैरजिम्मेवार भएको बताए । ‘सामग्री नभए इमरजेन्सी सेवा दिन सकिन्छ,’ उनले भने, ‘सेवा नै बन्द गर्नु मानवीयताविरुद्धको काम हो ।’ सामग्री अभावबारे नगरपालिकासँग समन्वय नगरेको भन्दै उनले कारबाही प्रक्रिया अघि बढाउने बताए ।

स्वास्थ्य कार्यालय बागलुङका प्रमुख सुरज गुरौले पनि अस्पताल बन्द गरिनु आपत्तिजनक रहेको प्रतिक्रिया दिए । ‘यस्तो बेला आइसोलेसन कक्ष वा अन्य सेवाप्रवाहमा भए पनि साथ दिनुपर्ने थियो,’ उनले भने ।

२५ बेड क्षमताको अस्पतालमा एक डाक्टरसहित ११ जना कर्मचारी कार्यरत छन् । अध्यक्ष रावलले निजी अस्पतालका कर्मचारीलाई सुरक्षा सामग्री नभएको र बिमा रकम पाउने/नपाउने अन्योल भएकाले बन्द गर्नुपरेको बताए ।

प्रकाशित : चैत्र १२, २०७६ ०८:४९
पूरा पढ्नुहोस्
प्रतिक्रिया
पठाउनुहोस्
×