सुदूरपश्चिम-११ सेमिफाइनलमा
सर्लाही — सुदूरपश्चिम–११ सोमबार वाग्मतीमा जारी चौथो राजर्षि जनक कप फुटबल प्रतियोगिताको सेमिफाइनलमा पुगेको छ । सोमवारको खेलमा सुदूरपश्चिमले एनआरटी क्लबलाई २–१ गोलले पराजित गरेको हो ।
प्रतिस्पर्धात्मक खेलको ११ औं मिनेटमा सुदूरपश्चिमको तर्फबाट पहिलो गोल भयो । सुदूरका विक्रमसिंह ठकुरीको पासमा विकास लामाले गोल गर्दै टोलीलाई अग्रता दिलाए । अग्रता लिएपछि दर्शकसमेत सुदूरपश्चिमको पक्षमा लागेका थिए । बराबरी गर्न आक्रामक बनेका एनआरटीले गोलका लगि झन्डै आधा घण्टा कुर्नुपर्यो । खेलको ४२ औं मिनेटमा एनआरटीले खेलमा बराबरीमा ल्यायो । एनआरटीका प्रकाश बुढाथोकीको पासमा दर्शन गुरुङले गोल गरेपछि टोली खेलमा फर्कन सफल भयो ।
पहिलो हाफको बराबरीपछि दुवै टिम रणनीति परिवर्तन गर्दै आक्रामक रूपमा प्रस्तुत भए । ५३ औं मिनेटमा सुदूरपश्चिमका फिलिप तामाङको प्रहार विपक्षी खेलाडीले रोक्ने मौकै पाएनन् । एनआरटीका गोलकिपरसमेत अल्मलिए । २–१ ले अघि बढेको सुदूरपश्चिमले आक्रामक खेललाई निरन्तरता दियो ।
खेलमा फर्कने मौका पाए पनि एनआरटीलेगोल थप्न सकेन । पटक–पटकको प्रहार सुदूरपश्चिमका खेलाडीले रोकेका थिए । म्यान अफ द म्याच फिलिप तामाङ भए । उनले १० हजार रुपैयाँ प्राप्त गरे । मंगलबार आयोजक वाग्मती नगरपालिका र कञ्चनजंघा फुटबल क्लब सिक्किमबीच प्रतिस्पर्धा हुनेछ ।
प्रकाशित : फाल्गुन २७, २०७६ ०८:३१