अन्योलमा झापा गोल्डकप

पर्वत पाेर्तेल

काँकडभिट्टा — अखिल नेपाल फुटबल संघ (एन्फा) को वार्षिक प्रतियोगिता क्यालेन्डरअनुसार झापा गोल्डकप फागुन १६ देखि हुनुपर्ने हो । तर प्रतियोगिता आयोजनाको सुरसारै छैन ।

चौथो संस्करणसम्म आयोजित प्रतियोगिता यो वर्ष हुँदैन कि भन्ने धेरैले लख काट्न थालेका छन् । झापा फुटबल क्लबका संरक्षक जलकुमार गुरुङ केही दिनभित्रमा प्रतियोगिताबारे टुंगो लाग्ने बताउँछन् । उनी भन्छन्, ‘एन्फाको क्यालेन्डर अनुसार चाहिँ नहुने पक्का हो । तर प्रतियोगिता नगर्ने भन्ने हैन ।’ प्राविधिक समस्याले प्रतियोगिता समयमा हुन नसकेको सुनाए ।


२०७२ सालमा झापा गोल्डकप सुरु भएको थियो । पहिलो संस्करणमा त्रिभुवन आर्मी क्लब विजेता बनेको थियो । आयोजक झापालाई हराउँदै आर्मीले ६ लाख पुरस्कार जितेको थियो । दोस्रो संस्करण मनाङले जित्यो । तेस्रो र चौथो संस्करण पुनः आर्मीको पोल्टामा पर्‍यो ।


तेस्रो संस्करण आइपुग्दा पुरस्कार राशि झन्डै दोब्बर भएको थियो । विजेताले १२ लाख ५१ हजार र उपविजेताले ६ लाख पाएका । चौथो संस्करणमा विजेता र उपविजेता राशिमा ५–५ हजार वृद्धि गरिएको थियो । गोल्डकप अन्योलमा परेपछि झापाली फुटबलप्रेमीहरू चिन्तित छन् । ‘झापा गोल्डकप देशकै प्रतिष्ठाको खेलकुद हो,’ झापा फुटबल टिमका पूर्व प्रशिक्षक प्रवेश कटुवाल भन्छन्, ‘निरन्तरता दिइनुको विकल्प छैन ।’


जिल्ला फुटबल संघ झापाका अध्यक्ष तथा वरिष्ठ प्रशिक्षक भगिरथ आलेका अनुसार प्रतियोगितालाई एन्फाको क्यालेन्डरमा पार्न आफूले सिफारिस गरेको बताउँछन् । उनले भने, ‘हुँदैन कि भन्ने हल्ला सुन्दैछु, यो महत्त्वपूर्ण प्रतियोगिता हो, निरन्तरता दिइनुपर्छ ।’

झापा गोल्डकप आयोजक समितिका अध्यक्ष महेन्द्रकुमार गिरीले प्रतियोगितालाई अझ बढी महत्त्वसाथ गर्ने योजना बनिरहेको बताए । ‘प्रतियोगितालाई सार्क राष्ट्रस्तरको बनाउने योजनामा छौं,’ उनले भने, ‘मुलुककै प्रतिष्ठित प्रतियोगिता बनाउने योजना छ ।’ उनले कहिलेदेखि प्रतियोगिताले निरन्तरता पाउने भन्नेबारे खुलाएनन् ।


खेलाडी अन्यत्रै

झापा गोल्डकपको अन्योल भएसँगै झापा फुटबल क्लबसम्बद्ध खेलाडी र प्रशिक्षक अन्यत्रै आबद्ध हुन थालेका छन् । ती खेलाडीहरू विभिन्न ‘ए’ डिभिजन क्लबमा आबद्ध भएका छन् । सहिद स्मारक लिगसँगै आइतबरा सताक्षी गोल्डकप जितेको मछिन्द्र क्लबमा प्रशिक्षकसहित ७ झापाका खेलाडी आबद्ध छन् । विशाल राई, देवेन्द्र तामाङ, योगेश गुरुङ, रेजिन सुब्बा, विमान राईलगायत छन् । प्रशिक्षक प्रवेश कटुवालले मछिन्द्रको प्रशिक्षण जिम्मेवारी सम्हालेका छन् ।


झापाका फरवार्ड कर्ण लिम्बू संकटामा आबद्ध भइसके । पूजन उपरकोटी मनाङ, संजोग राई र निशान खड्का थ्रीस्टार, दिलेन लोक्ताम जावलाखेल र गिल्सन कन्दङ्वा हिमालयन शेर्पासँग अनुबन्धित छन् । प्रशिक्षक कटुवालका अनुसार प्रायः ‘ए’ डिभिजन क्लबहरूमा झापाका खेलाडी छन् । प्रकाशित : फाल्गुन १३, २०७६ ०८:०२

ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

पाथीभरा म्याराथन आज

आनन्द गौतम

ताप्लेजुङ — पाथीभरा म्याराथन प्रतियोगिता मंगलबार हुँदै छ । म्याराथनका लागि नाम चलेका स्वदेशी खेलाडी ताप्लेजुङ आएका छन् । पाथीभरा म्याराथन मेची पर्यटन महोत्सवको अन्तिम दिन प्रतियोगिता गर्न लागिएको हो । यो महोत्सवको मुख्य आकर्षण रहनेछ । पुरुषतर्फ खुला म्याराथन तथा महिलातर्फ हाफ म्याराथन हुनेछ ।

म्याराथनका लागि गत वर्षका विजेता आर्मी क्लबका वेदबहादुर सुनुवारदेखि तीर्थवहादुर बस्नेत, पश्चिम रुकुमका दुर्गा बुढा, गोरखाका सयनराज गुरुङ, सिक्किमका अमर सुब्बालगायतका धावकले नाम लेखाएका छन् । महिलातर्फ आर्मीकी सरिता वासी, भैरवी दल गणका सविता विक, जुम्लाकी सुनमाया बुढा, धादिङकी रसिला तामाङलगायत खेलाडी छन् । खुलातर्फ ९३ र हाफ म्याराथनमा २४ खेलाडीले नाम लेखाएका छन् । उनीहरूको स्वास्थ्य परीक्षण गरेर तयारी अवस्थामा राखिएको आयोजकले जनाएको छ ।

सदरमुकाम फुङलिङको तोक्मेस्थित सेनाको ब्यारेकदेखि फुङलिङ बजारको वीरेन्द्रचोक हुँदै उकालीपानी– सुकेटार–देउराली–काफ्लेपाटी–पाथीभरा मन्दिर भएर पुनः ब्यारेकको मैदानमा आइपुग्नुपर्नेछ । महिलाले भने सोही रूट काफ्लेपाटीसम्म पुगेर फर्कनुपर्नेछ । खुलातर्फ ४७ र महिला हाफतर्फ २७ किलोमिटर दूरी रहेको म्याराथन उपसमितिका संयोजक योगेन्द्र गुरुङले बताए । महिलाको तुलनामा पुरुषतर्फ ४.५ किमि दूरी चुनौतीपूर्ण छ । यो काफ्लेपाटीदेखि पाथीभरा मन्दिरसम्मको हो । पाथीभरा मन्दिर ३ हजार ७ सय ९४ मिटर उचाइमा अवस्थित छ । काफ्लेपाटी २४ सय मिटर उचाइमा छ । काफ्लेपाटीसम्म मोटरेवल सडकमात्रै छ ।

पुरै मोटरबाटो भएर दौडाउँदाको दूरी लामो हुने भएकाले भालुगौंडेदेखि काफ्लेपाटीसम्म मोटरबाटो छोडेर पैदलमार्ग र फर्कंदा सुकेटारदेखि ओरालो पैदलमार्ग दौडाउने आयोजक समितिका लक्ष्मी काफ्ले बताउँछन । पाथीभरा मन्दिरमा स्वयंसेवक पठाइएको आयोजकले जनाएको छ । खेलाडीको सम्भावित दुर्घटनालगायतका पक्षलाई ध्यानमा राखेर धावनमार्गका विभिन्न स्थानमा ६ वटा एम्बुलेन्स तयारी गरिएको छ । उनका अनुसार काफ्लेपाटीसम्म मोटरसाइकलबाट स्कटिङ गरिनेछ ।

पाथीभरा क्षेत्रको हिउँ पन्छाउने र दौडमार्ग सुरक्षित गर्ने काम भएको माथिल्लो फेदी होटल व्यवसासी संघका अध्यक्ष इन्द्रनारायण भट्टराईले बताए । उनका अनुसार रमितेदेखि पाथीभरासम्म सामान्य हिउँ भएकाले सोमबार प्रहरी र व्यवसायीले पन्छाउने काम गरिएको छ । ‘सोमबार राति फेरि हिउँ पर्‍यो भने मंगलबार बिहानै गएर पन्छाउन तयारी अवस्थामा छौं,’ उनले भने, ‘सकेसम्मको व्यवस्थापन हामी स्थानीयले गर्छौं ।’

खुलातर्फका विजेताले १ लाख ५१ हजार, उपविजेताले १ लाख ११ हजार र तेस्रोले ५१ हजार रुपैयाँ पुरस्कार प्राप्त गर्नेछन् । महिला हाफ विजेताले ८१ हजार, उपविजेताले ५१ हजार र तेस्रोले ३१ हजार प्राप्त गर्नेछन् । दुवैतर्फका टपटेनलाई जनही ५ हजारले पुरस्कृत गरिने पाथीभरा देवी मन्दिर क्षेत्र संरक्षण तथा सम्वर्द्धन समितिले जनाएको छ ।

प्रकाशित : फाल्गुन १३, २०७६ ०७:५८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×