मछिन्द्रको सान निरन्तर

मछिन्द्रले साता अघिमात्र निर्णायक खेलमा त्रिभुवन आर्मी क्लबलाई पराजित गर्दै सहिद स्मारक ए डिभिजन लिगको उपाधि जितेको थियो । फरवार्ड विमल घर्तीमगरले पेनाल्टीमार्फत तेस्रो मिनेटमा गरेको गोल निर्णायक बन्यो । मछिन्द्रका विदेशी खेलाडी अडेलाजा सोमिडेलाई थ्रीस्टारका अशोक खवासले बक्सभित्र लडाएपछि मछिन्द्रले पेनाल्टीको अवसर पाएको थियो ।

उपाधि जितेको मछिन्द्रले नगद ६ लाख रुपैयाँ र उपविजेतामै चित्त बुझाएको थ्रीस्टारले नगद ३ लाख रुपैयाँ पायो । खेलको ९ औं मिनेटमा विशाल राई ‘बी’ को हेड बल थ्रीस्टारका गोलकिपर पूर्ण चेम्जोङले जोगाए । २३ औं मिनेटमा थ्रीस्टारका लालरामले डिबक्सभित्रबाट गरेको कडा प्रहार बार नजिकैबाट बाहिरिन पुग्यो । ३९ औं मिनेटमा अशोक खवासको पासमा लालरामले गरेको अर्को प्रहार पनि खेर गयो ।

४३ औं मिनेटमा मछिन्द्रका गोलकिपर विशाल श्रेष्ठ बिट भएको अवस्थामा लालरामले गरेको प्रहार गोल लाइनमा रहेका डिफेन्डर देबेन्द्र तामाङले बचाए । ४६ औं मिनेटमा रेजिन सुब्बाको पासमा विमान राईको प्रहार अकासिएको थियो । ६६ औं मिनेटमा मछिन्द्रका एन्ड्रेस नियाको प्रहार रिबाउन्ड भएको थियो । उक्त बललाई पुनः विशाल राईले कडा प्रहार गरे पनि किपर चेम्जोङले पञ्च गरेर जोगाए ।

७४ औं मिनेटमा थ्रीस्टारका मिक्चेन तामाङको फ्रिकिक प्रहार पोस्ट बारमा लागेर बाहिरिएको थियो । विजेता टिमका डिफेन्डर देबेन्द्र तामाङ म्यान अफ फाइनल भई नगद १० हजार रुपैयाँ प्राप्त गरे । प्रतियोगितामा सर्वोत्कृष्ट खेलाडीको पुरस्कार थ्रीस्टारका कप्तान विक्रम लामाले जिते । उनले नगद ५० हजार रुपैयाँ प्राप्त गरे ।

उत्कृष्ट गोलकिपर मछिन्द्रका विशाल श्रेष्ठ, उत्कृष्ट फरवार्ड रेजिन सुब्बा, मिडफिल्डर थ्रीस्टारका रूपेश केसी, डिफेन्डर मछिन्द्रका विदेशी खेलाडी पिटर सेगुन, प्रशिक्षक विजेता टिमका प्रवेश कटुवाल र सर्वाधिक गोलकर्ता सन्जोग राई घोषित भए । प्रतियोगिताको उदीयमान खेलाडीको पुरस्कार आयोजक सतासीधाम स्पोर्टिङ क्लबका सञ्जित राईले पाए । विद्यागत उत्कृष्ट सबै खेलाडीहरूलाई जनही २० हजार रुपैयाँका दरले नगद पुरस्कार प्राप्त गरे ।

४ गतेदेखि सुरु भएको गोल्डकपमा ‘ए’ डिभिजनका चारसहित आठ टिमको सहभागिता रहेको थियो । गोल्डकप स्थानीय सतासीधाम स्पोर्टिङ क्लबले आयोजना गरेको थियो ।