मैदान बाहिरको लडाइँमा सिटी
काठमाडौँ — इंग्लिस फुटबलमा सायद म्यानचेस्टर सिटीमाथि सहानुभूति राख्नेभन्दा त्यसका विरोधी नै धेरै छन् । धेरैअघि म्यानचेस्टर युनाइटेडका लिजेन्ड व्यवस्थापक सर एलेक्स फर्गुसन भन्थे, ‘सिटी भनेको हल्ला बढी गर्ने छिमेकी हो ।’
उनले यतिसम्म भने कि आफ्नो जीवनकालमा सिटीले सफलता चाखेको हेर्न पाइने छैन । फर्गुसनको त्यो इच्छा त पूरा भएन नै, किनभने पछिल्ला केही सिजन सिटीले एकपछि अर्को सफलता हात पारेको छ अनि राम्रो फुटबल खेलिरहेको छ ।
भनिरहनुपर्दैन, सिटी माथि उठेको हेर्न चाहनेमा फर्गुसन पर्दैनथे । अहिले पनि सिटीको प्रिमियर लिग प्रतिद्वन्द्वी क्लब र त्यसका व्यवस्थापक खुसुखुसु सिटीले अबका दुई सिजन युरोपमा खेल्न नपाउने भएपछि आफूलाई कस्तो फाइदा हुन्छ भनेर हिसाब गरिरहेका छन् । त्यसमा युनाइटेड पर्छ नै । सँगै यो हिसाबको जोडघटाउमा संलग्न छन्, चेल्सी, टोटेनहम र आर्सनल जस्ता परम्परागत शक्तिदेखि सेफिल्ड युनाइटेडसम्म । सिटीको अनुपस्थितिमा लिगको पाँचौंमा आउनेको पनि भाग्य खुल्नेछ ।
सबैको एउटै लक्ष्य छ, कम्तीमा सिटीले खेल्न नपाउने भएपछि सिर्जना भएको स्थितिको फाइदा लिने । फेरि यसमा अन्यथा लिनुपर्ने नै के छ र ? बेलायती मिडिया पनि किन हो, सिटीमाथि सहानुभूति राख्न चाहँदैन । फर्गुसन जस्तै यी मिडिया पनि सिटीकै विरोधमा छन् । त्यसैले त गार्डियनदेखि डेलीमेल अनि मिररदेखि सन सबैले सिटीलाई उडाउने काम गरिरहेका छन् । सबैको आशय छ, सिटीमा खाडीतिरको लगानी नआएको भए पनि स्थितिमा खासै ठूलो फरक पर्ने थिएन । यसले क्लबको लोकप्रियता वा विरोधमा कुनै फरक पर्दैनथ्यो ।
सिटीले पछिल्लो समय जति पनि सफलता पाएको छ, त्यो सबै अप्राकृतिक छ । अझ भनौं, यो सबै खाडीतिरको लगानीले मात्र सम्भव भएको हो । नत्र, सिटीसँग न इतिहास छ न गर्विलो संस्कृति नै । अहिले त सिटी भनेको सफलता उत्पादन गर्ने कारखाना भएको छ, जसमा ज्यान छैन । सिटीले जति पनि सफलता हात पारेको छ, त्यो त क्षणिक हो वा सबै पैसाले मात्र सम्भव भएको हो । युरोपेली फुटबल महासंघ (यूईएफए) ले सिटीमाथि दुईवर्ष युरोपमा खेल्न नपाउने गरेर लगाएको प्रतिबन्ध पनि ठीक नै हो भनेर पनि यी मिडियाले लेखिरहेका छन् ।
वास्तवमै अधिकांश बेलायती मिडिया किन सिटी विरोधी भए । बुझिनसक्नु छ । प्रिमियर लिगमा भर्खरै सिटीले वेस्ट ह्यामलाई हरायो, इतिहादमा भएको खेलमा । यति महत्त्व र संगीन मोडमा भएको खेलमा पनि इतिहाद स्टेडियम भने खाली–खाली थियो । तिनै बेलायती मिडियाले भने पनि सिटीको समर्थनको धरातल कमजोर छ भन्ने त देखियो नै । जति त्यस दिनको खेलमा इतिहाद पुगे, धेरैले भने यूईएफएमाथि रिस नै पोखे । अझ केही समर्थकले त सिटीमाथि षडयन्त्र भएको माने । तिनीहरूको तर्क हो, यूईएफएलाई सिटीको सफलता देखिनसक्नु हुन्छ । अबुधाबी युनाइटेड ग्रुपका रूपमा यूएईको लगानी र त्यसले दिएको सफलता हेर्न नसकेर नै यूईएफएले सिटीलाई कारबाही गर्न खोजेको आरोप ती समर्थकको छ । सिटीका विरोधी इंग्ल्यान्डमै मात्र छैनन्, पूरा युरोपमा छ । तिनीहरू पनि चाहन्छन्, सिटीलाई रोक्नैपर्छ । त्यसैले त बार्सिलोनाले खुलेर सिटीमाथि लागेको दुईवर्ष प्रतिबन्धको समर्थन नै गर्यो । अरु ठूला क्लबको मनसाय पनि यस्तै यस्तै होला ।
म्यानचेस्टर सिटीका प्रशिक्षक पेप ग्वार्डिओला तस्बिर : रोयटर्स
वेस्ट ह्यामविरुद्धको खेलपछि सिटीको औपचारिक धारणा भने बाहिर आएको छ र यसले तय गरेको छ । अब खेल मैदानभित्र हुनेछैन, मैदानबाहिर हुनेछ । यूईएफएले सिटीलाई दुईवर्ष युरोपमा खेल्न नपाउने गरेर प्रतिबन्ध लगाउनु पछाडिको स्पष्ट कारण हो, आर्थिक आचारसंहिता उल्लंघन गर्नु । सामान्य बोलीको भाषामा भन्दा सिटीमा यसरी पैसा खन्याइएको छ कि त्यसको सही हिसाबकिताब छैन । यस्तो काम रोकिएन भने युरोपेली क्लब फुटबलको समीकरण सधैंका लागि बिग्रिने छ ।
अनि त्यसको पनि अर्थ हो, यस्तै क्रम जारी रहे, त्यही क्लब मात्र सफल हुनेछ, जोसँग पैसा छ । त्यसमाथि यसरी मनपरी खोलो बगे जस्तै पैसा पनि बगाउन सक्ने भनेका त खाडीकै केही देश न हुन् । सिटीका समर्थकले भने यसको विरोधमा गज्जबको तर्क प्रस्तुत गरेका छन् । तिनीहरूको तर्क हो, यस्तो काम सक्नेले त गर्ने हो, नसक्नेले चुप लाग्ने हो । केही समयअघि यस्तै काम चेल्सीमा भएको थियो । तर रिस भने खाली सिटीमै मात्र किन ?
लिगको त्यो पछिल्लो खेलपछि सिटीका सीईओ फेरानो सोरिनोको भनाइ अगाडि आएको हो । उनको पूरा अन्तर्वार्ता क्लबको वेबसाइटमा राखिएको छ । त्यसमा उनले भनेका छन्, यूईएफएले क्लबमाथि ठू–ठूला आरोप त लगाएको छ र त्यसमा कुनै सत्यता भने छैन । उनले भने औपचारिक रूपमा घोषणा गरेका छन्, सिटी कोर्ट अफ आर्बिटेसन अफ स्पोर्टस (कास) मा जानेछ । उनलाई के पनि पूरा विश्वास छ भने यही कासले सिटीलाई निर्दोष पनि साबित गर्नेछ ।
सोरिनोले सिटीसमर्थक इंगित गर्दै भनेका छन्, ‘हाम्रा समर्थक दुई तथ्यमा ढुक्क भए हुन्छ । पहिलो त हामीमाथि जति पनि आरोप लागेका छन्, त्यसमा कुनै सत्यता छैन । दोस्रो तथ्य के भने क्लबले आफूलाई निर्दोष साबित गर्न कुनै कसर छोड्ने छैन । हाम्रा सबै समर्थक हाम्रै पक्षमा छन् भनेर पनि हामी निश्चिन्त छौं । हामीले यो महसुस पनि गरिरहेका छौं । हाम्रासामु जति चुनौती तेर्सिएको छ, हामीले त्यसलाई एक ढिक्का भएर सामना गर्नेछौं ।’
दुईवर्षको प्रतिबन्धपछि सबैभन्दा ठूलो प्रश्न व्यवस्थापक पेप ग्वार्डिओलाको भविष्यसँग जोडिएको छ । धेरैको अनुमान छ, अब ग्वार्डिओला सिटीमा बस्ने छैनन् । तर उनी आफैंले भने स्थिति जस्तै तयार भए पनि अर्को सिजन सिटीमै रहनेछन् । त्यो पनि शतप्रतिशत । अझ उनलाई त आफ्नो पुरानो क्लब बार्सिलोनामाथि पनि रिस उठेको छ । उनले पनि बुझ्न सकेका छैनन्, बार्सिलोना आफैं समस्या छ, किन उसलाई फेरि अर्को क्लबको समस्यामा टाउको दुखाउनुपर्ने भनेर ?
मूल प्रश्न भने त्यो होइन । बरु के हो भने अबका केही दिनमा सिटीलाई लिएर के हुने हो त ? कतै सिटीले यसअघि जितेका केही उपाधि खोसिने त होइन ? अनि जति बेला उसले गलत गरेको आरोप लागेको समय छ, त्यति बेला किनेका सबै खेलाडी बेच्नु पो पर्ने हो कि ? वा यूईएफएको कारबाहीमा समर्थन गर्दै प्रिमियर लिग आयोजकले सिटीलाई थप कारबाही गर्दै घटुवा गरेर तेस्रो डिभिजनमा झारिने त होइन ? त्यो भनेको डिभिजन वानतिर ।
यी सबैको उत्तर अबका केही दिनमा पक्कै पाइनेछ । सिटी पनि चाहन्छ, आफू कासमा गएपछि आफ्नोमाथि लागेको आरोपमा निर्णय आओस् । निर्णय आउन ढिला भए, जति बेलासम्म निर्णय आउने छैन त्यति बेलासम्म आफ्नो अर्को सिजन च्याम्पियन्स लिग खेल्ने अधिकार कायम होस् । स्पष्ट छ, अबका केही दिन क्लबका लागि निकै महत्त्वपूर्ण हुनेछ । तर फेरि तिनै बेलायती मिडियालाई विश्वास गर्ने हो भने मैदान बाहिर खेलिने अबको खेल सिटीका लागि सजिलो पक्कै हुने छैन ।
प्रकाशित : फाल्गुन १०, २०७६ ०८:४४