कान्तिपुर वेबसाईट
AdvertisementAdvertisement

ग्वार्डिओला सिटीमै रहने

एएफपी

म्यानचेस्टर — म्यानचेस्टर सिटी व्यवस्थापक पेप ग्वार्डिओलाले आफू क्लबमै रहनेमा विश्वस्त रहेको बताउँदै युरोपेली फुटबल महासंघ (यूईएफए) ले लगाएको प्रतिबन्धविरुद्ध लड्ने प्रतिबद्धता जनाएका छन् ।

सिटीले मंगलबार राति इंग्लिस प्रिमियर लिगमा वेस्ट ह्याममाथि २–० को जित रचेपछि उनको यो प्रतियोगिता आएको हो । युरोपेली प्रतियोगिताबाट दुई वर्षको प्रतिबन्ध लागेयता सिटीले खेलेको यो पहिलोपल्ट हो ।


त्यस जितमा रोड्री र केभिन डी ब्रुयनले १–१ गोल गरे । यस खेलबाट प्राप्त ३ अंकपछि सिटीले लिग तालिकाको दोस्रो स्थानमा आफ्नो पकड बलियो बनाएको छ । सिटीको २६ खेलबाट ५४ अंक भएको छ । ‘केही पनि समाप्त भएको छैन । हामी अपिल गर्ने क्रममा छौं, किनभने हामीमाथि लागेको प्रतिबन्ध अन्यायपूर्ण छ । जसरी हामीले मैदानमा प्रत्येक खेलमा संघर्ष गर्ने गरेका छौं, त्यसरी नै यो प्रतिबन्धको निर्णयप्रति पनि लड्ने छौं,’ खेलपछि स्काई स्पोर्टससँग कुराकानी गर्दै ग्वार्डिओलाले थपे, ‘मलाई के तथ्यमा पूरा विश्वास छ भने अन्त्यमा सत्य के हो त्यो बाहिर आउने छ । हामी अर्को सिजन पनि च्याम्पियन्स लिग खेलिरहेका हुनेछौं । अबको सिजनमा के हुनेछ, त्यसको अवस्था जस्तै भए पनि म सिटीमै रहने छु ।’


स्पेनी प्रशिक्षकले जस्तै दाबी गरे पनि अबको वास्तविक खेल सिटीका लागि फुटबलको मैदानमा नभएर बाहिर युरोपेली कोर्टमा हुनेछ, त्यसकै निर्णयले क्लबको भविष्य तय हुनेछ ।


सिटीका कार्यकारी प्रमुख फेरेरन सोरिनोले पनि क्लबमाथि लागेको प्रतिबन्ध फुकुवा गर्न सबै प्रकारको प्रयास हुने बताए । उनले भने, ‘सिटीमा समर्थक दुई तथ्यमा ढुक्क भए हुन्छ । पहिलो तथ्य, हामीले केही पनि खराब गरेका छैनौं ।’ उनले क्लब कोर्ट अफ आर्बिटेसन (कास) मा जाने पनि बताए । उनले थपे, ‘दोस्रो तथ्य के हो भने हामीले आफूमाथि लागेको प्रतिबन्ध हटाउन कुनै पनि प्रकारको प्रयास छाड्ने छैनौं । सिटी समर्थकले त्यसमा कुनै दुविधा नराखे हुन्छ ।’ प्रकाशित : फाल्गुन ९, २०७६ ०८:५५

ADVERTISEMENT
प्रतिक्रिया
पठाउनुहोस्
ADVERTISEMENT

८४ वर्षमा एल्बम

कान्तिपुर संवाददाता

काठमाडौँ — ‘माया लुकाई लुक्दैन...’, ‘कोइलीले सम्झाइदियो...’ जस्ता गीतका अग्रज स्रष्टा संगीतकार तथा गायक जगतमर्दन थापाले ८४ वर्षको उमेरमा गीति एल्बम ‘म मक्किएको धुरी खाँबो’ ल्याएका छन् ।

गायक थापाको ८४ औं जन्मोत्सवको अवसरमा बिहीबार राजधानीमा अग्रज संगीतकार प्रेमध्वज प्रधान, गीतकार यादव खरेल, चलचित्रकर्मी प्रकाश सायमी, थापाका छोरा मोहित मर्दन लगायतले लोकार्पण गरे । एल्बमको शीर्ष गीत र ‘फेरि साथ मेरै...’ को म्युजिक भिडियो पनि समारोहमा सार्वजनिक गरियो ।

कार्यक्रममा निकै जोसिला देखिएका गायक थापाले आधा दर्जन गीत प्रस्तुत गरे । भारतीय गायिका लिली सिंहको स्मरण गर्दै उनले विसं. २०१९ सालतिर नै भारतमा रेकर्ड भएका उनका गीत ‘भन लौ नढाँटी...’, ‘जुनेली रातमा कति बसूँ...’ जस्ता गीत पनि सुनाए । एल्बममा नै समावेश रत्नशमशेर थापाको शब्द तथा शक्ति वल्लभको संगीत रहेको ‘आली आली हरियाली...’, सहदेव ढुंगानाको शब्द र मनोहर सुनामको संगीत रहेको ‘दैव संजोग...’ लगायतका गीत प्रस्तुत गर्दा हल नै तालीले गुन्जायमान भएको थियो ।

उनलाई गायिका सरिता शाही र जिना रसाइलीले गायनमा साथ दिएका थिए । गायक थापासँगै बालगायक आयुष्मान विष्टले पनि प्रधानको स्वर रहेको ‘तारा मात्र होइन...’ लगायतका गीत गाएका थिए । गीतसंगीत सिर्जनामा आफ्नो उत्तिकै लगाव रहेको खुलाउँदै थापाले साथ दिने सबैप्रति आभार व्यक्त गर्दै छैटौं एल्बमका लागि पनि तयारी सुरु भएको जनाए ।

गायक प्रधान र सायमीले थापाको संगीतप्रतिको साधनाको खुलेरै प्रशंसा गरे । गायक थापालाई संगीतले झन स्वस्थ बनाएको बताउँदै प्रधानले ‘जो पायो त्यसले थापाको उमेरमा गाउन नसक्ने’ जिकिर गरे । भने, ‘यो उमेरमा गायन निकै कठिन छ । जगतमर्दन थापाको प्रयास निकै प्रशंनीय छ ।’

गीतकार हर्क साउदको शब्द तथा कल्याण सिंहको संगीत रहेको शीर्ष गीतमा गायक थापालाई स्वरमा दिपेशकिशोर भट्टराईले साथ दिएका छन् । निकेश खड्काको निर्देशन रहेको गीतको भिडियोमा विकास धमलाको सम्पादन र बुद्ध थापाको छायांकन छ । भिडियोमा टीका पहाडी, विक्रम श्रेष्ठ, नवीन पौडेलको अभिनय रहेको छ ।

प्रकाशित : फाल्गुन ९, २०७६ ०८:५०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×