जागिर, चोट र गोल

२०६३ सालमा संकटाबाट करिअर सुरु गरेका भरतले त्यो सिजनको लिगमा सरस्वतीविरुद्ध ५–० को जितबाट शीर्ष लिगमा गोलको खाता खोलेका थिए । संयोगले त्यो पनि खेलको पहिलो गोल नै थियो । यो सिजनको चौथो गोलसँगै ५० गोलको कोसेढुंगा भेट्टाएका २८ वर्षीय भरतले भने, ‘यो लिगमा गोल गर्न एकदमै गाह्रो त पक्कै हुन्छ ।

सुखदुःख सबैले सहयोग गरे, प्रोत्साहन दिए र यहाँसम्म आइपुगें । ५० गोल गरें । यो नै अन्तिम होइन, १०० गोल गरेका सन्तोष दाइ (साहुखल) लाई पछ्याउने कोसिस गर्नेछु । तर सजिलो पक्कै छैन ।’ च्यासलका फरवार्ड सन्तोष यसैपालि आधुनिक लिगमा १०० गोल गर्ने पहिलो भएका थिए । उनको गोलसंख्या १०३ पुगेको छ ।

आधुनिक लिग (२०४६ यता) मा सन्तोष साहुखल, रमेश बुढाथोकी, वसन्त थापा, जीवेश पाण्डे, सुरेन्द्र तामाङ, अनिल गुरुङ, गणेश लावतीपछि ५० गोल पूरा गर्ने आठौं खेलाडी बनेका हुन्, भरत । हरैंचा, मोरङका भरत एन्फा एकेडेमीमा हुर्किएका खेलाडी हुन् । भरत र जुमनु राईको अग्रपंक्ति २०६८ सालमा खुबै जमेको थियो । त्यो सिजनको लिगमा १४ गोल गरेपछि भरत नेपाली सेनाको अधिकृत तहमा भर्ती हुँदै त्रिभुवन आर्मी क्लबमा पुगेका थिए । उनले पुलिसअघि एक सिजन फ्रेन्ड्सबाट पनि खेल्न भ्याए ।

प्रायजसो भरतको खेल हेर्न उनका पत्नी रुमा अवाले रंगशाला धाउने गर्थिन् । यसपालि पनि उनी १० महिनाकी छोरी स्वर्णिकालाई लिएर प्यारापिटमा हुटिङ गरिरहेकी हुन्थिन् । मंगलबार बिहान ८ः४५ बजे सातदोबाटोमा सुरु भएको खेलमा भने उनी आइनन् । ‘बिहान खेल भयो । ल्याउने मान्छे नभएर छोरी आइनन्,’ भरतले भने, ‘५० औं गोल छोरीप्रति समर्पित गर्न चाहन्छु ।’

भरतले राष्ट्रिय टिमबाट १० गोल गरेका छन्, जुन सर्वाधिक गोलकर्ता नीराजन रायमाझी र हरि खड्का (१३ गोल) नजिक छ । ‘मान्छेलाई जति भए पनि सन्तुष्टि हुँदैन,’ भरतले भने, ‘५० गोल खासै लक्ष्य थिएन । हरि र नीराजन दाइको रेकर्ड तोड्ने लक्ष्य छ । सेनाको तालिम र चोटले कति खेल छुटाउनुपर्‍यो । तर, त्यो १३ गोलको रेकर्ड तोड्छु भन्ने आत्मविश्वास छ ।’ कीर्तिमान १४ गोल कि लिगको उपाधि ? उनी सचेत देखिए, ‘आर्मीलाई लिग जिताउने ।’

उनले १३ वर्षमा सात सिजन लिग खेल्दै ५० गोल पूरा गरेका हुन् । गत वर्ष ७ गोल गर्दै लिगकै सर्वोत्कृष्ट फरवार्डको पुरस्कार जितेका भरत यो सिजन सर्वाधिक ८ गोल गरेका आशिष लामा (एपीएफ) भन्दा ४ गोल पछाडि छन् । केही वर्षयता भरत विपक्षीको पेनाल्टी क्षेत्रमा पहिलाजस्तै खतरनाक देखिन छाडेका छन् । यसैपालि पनि नवौं चरणमा जावलाखेलविरुद्ध १–० को जितमा गोल गरेपछि उनले अर्को गोलको लागि १२ औं चरण कुर्नुपर्‍यो ।

‘दुई वर्ष क्याडेट कोर्स गरें, त्यसले फुटबललाई अलि बिगार्‍यो नै,’ उनले भने, ‘हरेक खेलमा गोल गर्न गाह्रो हुन्छ । ५० गोल गरें । १०० गोल गर्न गाह्रै हुन्छ, अबको लक्ष्य ६० राखुँला । कोसिस गर्नेछु ।’ उनले थपे, ‘कहिले हात भाँच्चियो र स्टिल राखेरै खेलें । खुट्टाको शल्यक्रिया गरें । जण्डिस भयो । टाउको फुट्यो । चोटले पनि धेरै असर गर्‍यो मलाई ।’

भरत खवासको ५० गोल