स्वर्णको महत्त्व बुझ्दै सरु

स्वर्ण जितेको झन्डै महिना दिनपछि अभिभावक भेट्न घर आएकी सरुले सैनामैनामा विशेष सम्मान थापिन् । नगरपालिकालाई विश्वसामु चिनाएको र स्थानीय युवालाई खेलकुदमा अग्रसर गर्न हौसला मिलेको भन्दै सैनामैना नगरपालिकाले उनलाई २५ हजार नगदसहित सम्मान गरेको थियो । सैनामैना–६ शान्तिनगरकी सरुले करातेको कातातर्फ स्वर्ण जितेकी थिइन् । गृहजिल्लामा पाएको सम्मानले आफूलाई खेल लागिरहन थप हौसला बढेको उनले सुनाइन् । ‘आमाबुवा काठमाडौं जान पाउनु भएको थिएन । आफ्नै नगरमा उहाँहरूसहित सम्मान थाप्न पाएँ,’ उनले भनिन्, ‘यो क्षण अविस्मरणीय रह्यो ।’

०५१ साल भदौमा पाल्पाको बल्डेङगढीमा जन्मिएकी उनी नेपाल प्रहरीमा आबद्ध छन् । गाउँकै विद्यालयबाट एसएलसी उत्तीर्ण गरिन् । त्यसपछि परिवार बसाइँ सरेर रूपन्देहीको सैनामैना आयो । सानैबाट प्रहरी बन्ने धोको थियो । प्रहरी कतै देखिहाले उभिएरै हेर्ने गरेको उनले सुनाइन् । अध्ययनलाई निरन्तरता दिन सकिने भएकाले प्रहरीमा भर्ती हुने इच्छा थियो ।

०७० सालमा भर्ती खुल्यो । उनले आवेदन भरिन् । छनोट भइन् । त्यसपछि मात्र हो उनले कराते खेलबारे देख्न र बुझ्न पाएको । ‘प्रहरीभित्र खेलाडी र अन्यको फरक पाटो हुने रहेछ,’ उनले भनिन्, ‘अरुले कराते खेलेको देखेपछि मेरो मन पनि त्यतै गइहाल्यो ।’

विद्यालय होस् या घरमा हुँदा उनको रुचि खेलमा थिएन । प्रहरीमा प्रवेश गरेपछि सुरुमा गर्नुपर्ने तालिम गाह्रो थियो । तर गर्नैपर्थ्यो । उनले भनिन्, ‘तालिम पूरा गरें । जागिर खाएको एक वर्षपछि कराते सिक्न थालें ।’ पहिलोपल्ट ‘गुरु हुस’ सम्बोधन गर्नुपर्दा उनलाई अचम्म लाग्थ्यो । सिक्दै गर्दा रमाइलो हुने उनले बताइन् । प्रशिक्षक योगेन्द्र आचार्य, केदार सिम्खडा र नारायणकाजी राईबाट खारिँदै गइन् । कडा मिहिनेतले यसपालि सागमा सफल भएको उनको बुझाइ छ । प्रहरी टिमबाट खेल्दा कहिले स्वर्ण त कहिले कांस्यमै चित्त बुझाउनुपरेको थियो ।टिम कातामा तीन खेलाडी थिए । सरुसहित पुलिसकै निर्मला तामाङ र आर्मीकी संगीता मगर ।

निर्मला र सरुले धेरैपल्ट सँगै खेले । संगीतासँग मिलेर खेल्दा सहकार्य बलियो तुल्याउन केही समय लागेको सरुले सुनाइन् । ‘सेना र प्रहरीको सिकाइ तरिकामा समय, समन्वयदेखि सामूहिकता मिलाउँदा बढी मिहिनेत गर्नुपर्‍यो,’ उनले भनिन्, ‘मिहिनेतको फल मीठो पाइयो ।’ साग छनोटका लागि मलेसियामा उनीहरूले प्रशिक्षण गरेका थिए । प्रशिक्षणपछि बंगलादेशमा प्रतिस्पर्धात्मक खेल खेलेर उनले स्वर्ण जितेकी थिइन् । त्यसपछि श्रीलंकासँग पाँचौं दक्षिण एसियाली कराते च्याम्पियनसिपमा विजयी भएपछि साग खेलेको उनले बताइन् । थाइल्यान्डमा भएको प्रतियोगिता खेलेर अन्तर्राष्ट्रिय डेब्यु गरेको अनुभव उनले सुनाइन् । ‘देश, प्रहरी र आफ्नो पहिचान बनाउन प्रतिस्पर्धामा उत्रेकी थिएँ,’ उनले भनिन्, ‘आफ्नो क्षमताअनुसार प्रदर्शन गर्न सफल भएँ ।’

उनलाई पाल्पाको बल्डेङगढी–७ मा वडा कार्यालयले पनि नगदसहित सम्मान गरेको थियो । पाल्पाकै रैनादेवी छहरा गाउँपालिकामा समेत नगदसहित सम्मान थाप्न भ्याइन् । विभिन्न संचारमाध्यममा अन्तर्वार्ताका लागि बोलाउन थालेपछि महत्त्व अझै बढेको महसुस भएको उनले सुनाइन् । उनको मनमा अब सकुन्जेल खेल्ने दृढ संकल्प जागेको छ । प्रहरीको खेल विभागमा रहेर खेल खेल्ने र आवश्यक परे अन्य काममा पनि खटिने सरुका परिवारमा अन्य खेलाडी छैनन् । उनकी बहिनी प्रहरीमै छन् । बहिनीले प्रहरीकै जागिर रोजेकामा आफूलाई खुसी लागेको सरुले बताइन् । समयसँगै प्रहरीको जागिर झनै मनपर्ने र देशप्रति भावना बढ्दै गएको उनले बताइन् ।