बार्सिलोनाको पुनरागमन जित
म्याड्रिड — लियोनल मेसीले गोल सहयोगीको ह्याट्रिक भूमिका निभाएपछि बार्सिलोनाले तनावपूर्ण सप्ताहको अन्त्य गर्दै आइतबार राति स्पेनी ला लिगामा रियल बेटिसलाई ३–२ ले हरायो ।
यो जितले बार्सिलोना शीर्ष स्थानमा रहको रियल म्याड्रिडसँग तीन अंकको दूरीमा कायम रहन सफल रह्यो । यसअघि रियलले ओसासुनालाई ४–१ ले हराएर बार्सिलोनामाथि दबाब सिर्जना गरेको थियो ।
बेटिसले खेलमा दुई पल्ट अग्रता लिएपछि बार्सिलोना पुनरागमनमा जित रच्न बाध्य रहेको हो । बेटिसका लागि सर्जियो कानालेस र नबिर फकिरले गोल गरे ।
बार्सिलोनका तर्फबाट भने फ्रेन्क डे जोङ, सर्जियो बास्क्वेट क्लेमेन्ट लेन्गलेटले गोल गरे । तीन गोलमा मेसीले अवसर सिर्जना गरेका थिए ।
२३ खेलबाट ५२ अंकसहित रियल म्याड्रिड शीर्ष स्थानमा रहेको छ भने समान खेलबाट ४९ अंकसहित बार्सिलोना दोस्रो स्थानमा छ । तेस्रो स्थानमा रहेको गेटाफेको ४२ अंक छ ।
प्रकाशित : माघ २७, २०७६ ०७:१८