सूर्य नेपाल इस्टर्न ओपन : बलभद्र च्याम्पियन

प्रदीप मेन्याङबो

सुनसरी — धरानस्थित निर्वाणा कन्ट्री क्लबको गल्फ कोर्समा बिहीबार सूर्य नेपाल इस्टर्न ओपनको उपाधि प्रो बलभद्र राईले जितेका छन् । यो सूर्य नेपाल गल्फ टुर २०१९–२० अन्तर्गतको दोस्रो प्रतियोगिता हो । धरानका स्थानीय व्यावसायिक गल्फर बलभद्रले नेपालका नम्बर एक प्रो शिवराम श्रेष्ठलाई ४ स्ट्रोकले पछाडि उपाधि जितेका हुन् ।

ZenTravel

उनले १ लाख २५ हजार रुपैयाँ पुरस्कार प्राप्त गरे । बलभद्रको यो दोस्रो गल्फ उपाधि हो । उनले यसअघि २००८–०९ को वेस्टर्न ओपन उपाधि जितेका थिए । बलभद्रले अन्तिम दिन ३ अन्डर ६७ स्कोर जोड्दै समग्रमा ९ अन्डर २ सय १ को स्कोर बनाएर उपाधिमाथि कब्जा जमाए ।

निर्वाणा कन्ट्री क्लबको गल्फ कोर्समा उनले खेलको पहिलो दिन १ अन्डर ६९, दोस्रो दिन ५ अन्डर ६५, तेस्रो दिन फ्रन्टनाइनको चौथो होलमा बोगीसहित १ ओभर ३७ खेलेका थिए । उनले ११, १६, १७ र १८ औं होलमा उत्कृष्ट पटिङसहित बर्डी गर्दै ब्याकनाइनमा ४ बर्डीसहित ४ अन्डर ३० स्कोर बनाए ।

शिवरामले ६ अन्डर ६४ स्कोर गर्दै दोस्रो स्थानमा चित्त बुझाए । पहिलो र दोस्रो दिन औसत प्रदर्शन गरेका शिवरामले फ्रन्टनाइनमा २ अन्डर ३४ तथा ब्याकनाइनमा ४ अन्डर ३० स्कोरमात्र जोडे । उपविजेतामा सीमित शिवरामले ७५ हजार रुपैयाँ पाए ।

स्थानीय गल्फर नीरज तामाङ एमेच्योरतर्फ च्याम्पियन बने । उनले अन्तिम दिन १ ओभर ७१ स्कोर गर्दै समग्रमा ४ अन्डर २ सय ६ स्कोरसहित उपाधि हात पारे । एमेच्योरतर्फ अर्का स्थानीय गल्फर शुक्रराज राई १३ ओभर २ सय २३ स्कोर जोड्दै दोस्रो भए भने १५ ओभर २ सय २५ स्कोर जोडेका सुन्दर राई तेस्रो भए ।

बिहीबार अपेक्षा विपरीत खराब प्रदर्शन गर्दै ४ ओभर ७४ स्कोरमात्र जोडेका प्रोटर्न गल्फर शुक्रबहादुर तेस्रो स्थानमा रहे । उनले ५५ हजार रुपैयाँ हात पारे । धनबहादुर थापा (२१४) ले चौथो स्थान हासिल गरे । उनले ४५ हजार थापे । शिवकुमार माझी र सूर्यप्रसाद शर्माले ६ ओभर २ सय १६ स्कोरसहित संयुक्त पाँचौं स्थान ओगट्दै जनही ३५ हजार ५ सय रुपैयाँमा चित्त बुझाए । सातौं स्थानमा आएका दिनेश प्रजापतिले ३१ हजार तथा संयुक्त आठौं स्थानका जयराम श्रेष्ठ र रवि खड्काले २८ हजार रुपैयाँ पाए । सन्जय लामा र दीपक मगर संयुक्त दसौं स्थानमा रहेर २३ हजार २ सय ५० रुपैयाँ जित्न सफल भए ।

विजयी खेलाडीलाई सूर्य नेपालका मार्केटिङ म्यानेजर बालकिशन गुरुङ, धरान उपमहानगरका प्रमुख तथा नेपाल गल्फ संघका उपाध्यक्ष तिलक राईलगायतले खेलाडीलाई पुरस्कृत गरे ।

प्रकाशित : माघ १०, २०७६ ०८:५४
प्रतिक्रिया
पठाउनुहोस्
ADVERTISEMENT

मन्त्रिपरिषद् विस्तारको तयारी

कान्तिपुर संवाददाता

मकवानपुर — स्थायी राजधानी र नामकरणको विषय टुंगिएसँगै वागमती प्रदेश सरकार मन्त्रिपरिषद् विस्तारको तयारीमा जुटेको छ । रिक्त रहेको भौतिक पूर्वाधार विकास मन्त्रीसहित केही राज्यमन्त्री थप गर्न नेकपाभित्र आन्तरिक छलफल सुरु भएको छ । यसबारे पार्टीभित्र परामर्श थालिसकेको मुख्यमन्त्री डोरमणि पौडेलले बताए । 

तत्कालीन भौतिक पूर्वाधार विकासमन्त्री केशव स्थापितलाई एक वर्षअघि नै बर्खास्त गरिए पनि हालसम्म मन्त्री नियुक्त गरिएको छैन । मन्त्रालयको जिम्मेवारी मुख्यमन्त्री पौडेल आफैंले लिइरहेका छन् । ‘मन्त्रालय नै थप गर्ने सम्भावना भने छैन, रिक्त मन्त्रालयमा मन्त्री र अन्यमा राज्यमन्त्री थप्ने तयारी भइरहेको छ,’ नेकपाका सांसद दीपक निरौलाले भने, ‘संविधानअनुसार प्रदेशमा मन्त्रालय नै पनि थप गर्न सकिन्छ तर, यसको लागि संघीय सरकारको स्वीकृति चाहिन्छ ।’

एक वर्षदेखि रिक्त रहेको भौतिक पूर्वाधार मन्त्रालयलको जिम्मेवारीमा नेकपा संसदीय दलका प्रमुख सचेतक रामेश्वर फुयाँलको सम्भावना बलियो रहेको बताइएको छ । फुयाँल यसअघि संविधानसभा सदस्य भइसकेका छन् ।
नेकपाभित्र राज्यमन्त्रीका लागि पनि रस्साकस्सी सुरु भएको छ । मन्त्रिपरिषद्मा महिलाको सहभागिता शून्य भएको भन्दै प्रदेशसभामा समेत आलोचना भइरहेको बेला नेकपाकी नेता कुमारी मोक्तानले राज्यमन्त्री पाउने प्रबल सम्भावना रहेको स्रोतको दाबी छ । ०६४ सालको संविधानसभा निर्वाचनमा पनि उनी मकवानपुरबाट निर्वाचित भएकी थिइन् । पूर्वमाओवादीबाट चितवनकी कञ्चन खनाल, दोलखाका विशाल खड्काले पनि राज्यमन्त्रीको दाबी गरिरहेका छन् ।

प्रदेशसभा बस्दै
प्रदेश राजधानी र नामकरणपछि पुस २७ गतेबाट स्थगित प्रदेशसभा बैठक माघ १२ गते बस्ने भएको छ । सभामुख सानुकुमार श्रेष्ठका अनुसार बैठक दिउँसो ३ बजे बस्नेछ । ‘प्रदेशसभामा केही विधेयक दर्ता हुने क्रममा छन् । बैठकको बाँकीे कार्यसूची भने कार्यव्यवस्था परामर्श समितिको बैठक बसेपछि तय हुनेछ,’ उनले भने । प्रदेशसभाले हालसम्म ४५ वटा कानुन निर्माण गरिसकेको छ । प्रदेशसभाको पाँचौं अधिवेशन विशेष गरी निजामति, प्रहरी तथा पर्यटन विधेयक निर्माणमा केन्द्रित हुनेछ । हाल प्रदेशसभाअन्तर्गत समितिमा समेत आवश्यक छलफलका लागि विधेयक उपलब्ध छैनन् ।

प्रकाशित : माघ १०, २०७६ ०८:४९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×