लन्डन — म्यानचेस्टर युनाइटेडले बुधबार राति इंग्लिस प्रिमियर लिगमा बर्नलीको हातबाट लाजमर्दो २–० हार बेहोरेको छ । यसले व्यवस्थापक ओले गन सोल्सारमाथि चर्को दबाब बढेको छ।
टोटनहमले अर्को खेलमा नर्विचलाई २–१ ले हरायो र यस जितले उसको शीर्ष चारमा उक्लने सम्भावना जीवन्त राख्यो । म्यानचेस्टर भने लिगका पछिल्ला चार खेलमा पराजित रहेको यो तेस्रो पल्ट हो ।
बर्नलीले भने सन १९६२ यता म्यानचेस्टरलाई ओल्ड ट्रायफोर्डमा पहिलो पल्ट हरायो । यससँगै म्यानचेस्टरले सन् १९८९–९० यता पहिलो पल्ट लिगमा सर्वाधिक खराब सुरुवात पनि लिएको छ ।
म्यानचेस्टर चौथोमा रहेको चेल्सीसँग ६ अंकको दूरीमा रह्यो । बर्नलीको जितमा क्रिस उड र जय रोड्रिग्वेजले गोल गरे । टोटनहमको जितमा भने सन ह्वेङ–मिनले खेलको अन्त्यतिर निर्णायक गोल गरे ।
यस्तै आयोज पेरेजको दुई गोल मद्दतले तेस्रो स्थानमा रहेको लेस्टर सिटीले वेस्ट ह्यामलाई सजिलै ४–१ ले हरायो र लगातार दुई खेलको जितहीन यात्रामा पूर्णविराम लगायो ।
प्रकाशित : माघ ९, २०७६ ०७:२४