युभेन्ट्समाथि इन्टरको दबाब, कागलिरीविरुद्ध रोनाल्डोको ह्याट्रिक
मिलान — रोमेलो लुकाकुले दुई गोल गरेपछि इन्टर मिलानले सोमबार राति नेपोलीलाई ३–१ ले हरायो र इटालीको सिरी ए को शीर्ष स्थानमा रह्यो । यस जितसँगै इन्टर डिफेन्डिङ च्याम्पियन युभेन्ट्समाथि दबाब कायम राख्न पनि सफल रह्यो ।
यसअघि युभेन्ट्सले कागलिरीलाई ४–० ले हराएको थियो र त्यसमा क्रिस्टियानो रोनाल्डोले ह्याट्रिक गरे । यो इटालीमा उनको पहिलो तीन गोलको प्रदर्शन हो ।
एन्टोनियो कोन्टेको इन्टरले २३ वर्षयता पहिलो पटक लिगमा नेपोलीलाई हराएको हो र यस सफलतापछि युभेन्ट्ससँग समान अंकमा शीर्ष स्थानमा रह्यो । दुवैको समान ४५ अंक छ, तर इन्टर गोल अन्तरले अगाडि छ ।
लाजियो तेस्रो स्थानमा छ र उसले लिगमा लगातार नवौं जित हात पार्न अर्को खेलमा ब्रेसियालाई २–१ ले हरायो । लाजियोले एक खेल कम खेलेको छ र उसको ३९ अंक भएको छ ।
प्रकाशित : पुस २२, २०७६ ०७:३८