अलिरेजाकाे उत्कृष्ट गोलमा ब्राइटनले चेल्सीलाई बराबरीमा रोक्याे

वैकल्पिक खेलाडीका रूपमा मैदान छिरेका इरानी खेलाडीले क्लबलाई खुसी तुल्याउँदै ८४ औं मिनेटमा गोल गरे । शनिबार उनले क्लबबाट पहिलो गोल गरेका थिए । उनको दोस्रो गोल भने वर्षकै उत्कृष्ट गोलमध्ये एक रहनेछ ।

ब्राइटन सुरुमै सिसर एजपिलक्युटाको गोलले पछाडि परेको थियो । यो चेल्सीलाई धक्का मानिएको छ । चौथो स्थानमा रहेको चेल्सीले पाँचौं स्थानमा रहेको म्यानचेस्टर युनाइटेडमाथि पाँच अंकको अग्रता खोलेको छ । ब्राइटन भने १३ औं स्थानमा उक्लेको छ ।

अर्को खेलमा एस्टन भिल्लाले बर्नलीलाई उसकै घरमा २–१ ले हरायो । यो जितपछि एस्टन भिल्ला रेलिगेसन क्षेत्र छाड्न पनि सफल रहेको छ । उसका लागि ज्याक ग्रेलिस र वेस्लीले गोल गरे । बर्नलीका तर्फबाट भने क्रिस उडले गरे । एस्टन भिल्लाको यो महत्त्वपूर्ण जितपछि २१ अंक भएको छ ।