साग फुटबलको स्वर्ण प्रतिस्पर्धाअघि रंगशालामा सांसद र कर्मचारी भिड्ने

कान्तिपुर संवाददाता

काठमाडौँ — दशरथ रंगशालामा मंगलबार ३ बजे १३औं दक्षिण एसियाली खेलकुद (साग) को स्वर्ण पदकका लागि आयोजक नेपाल र भुटानबीच प्रतिस्पर्धा हुँदैछ । सोही रंगशालामा आजै १२ बजे संघीय संसद्का सांसद र संसद् सचिवालयका कर्मचारीले मैत्रीपूर्ण फुटबल प्रतिस्पर्धा गर्ने कार्यक्रम छ । सांसद र कर्मचारीहरूले संसद्‍ सेवा दिवस (मंसिर २८ गते) को अवसरमा उक्त मत्रैपूर्ण फुटबल प्रतिस्पर्धा गर्न लागेका हुन् ।

ZenTravel

सांसदहरूका तर्फबाट राष्ट्रियसभाका अध्यक्ष गणेशप्रसाद तिमिल्सिना र कर्मचारीहरूका तर्फबाट संघीय संसद् सचिवालयका महासचिव मनोहरप्रसाद भट्टराईले नेतृत्व गर्नेछन्। संसद् सचिवाललयका सूचना अधिकारी दशरथ धमलाले साग चलिरहेको भए पनि राष्ट्रिय खेलकुद परिषद् र साग सञ्चालन कमिटीसँगको सहकार्यमा नै उक्त खेलको समय मिलाइएको जानकारी दिए। राखेप सदस्य सचिव रमेशकुमार सिलवालसँग सहकार्य गरेर नै समय व्यवस्थापन गरिएको उनले बताए।
सागको स्वर्ण पदकका लागि प्रतिस्पर्धा गर्न नेपाली र भुटानी फुटबल टिम २ बजे दशरथ रंगशाला प्रवेश गर्ने कार्यतालिका छ। वार्मअपका लागि दुवै टोली खेल मैदानमा प्रवेश गर्नेछन्। सांसद र कर्मचारीहरूको खेल २ बजे अगाडि नै सम्पन्न गर्ने कार्यतालिका छ।

Meroghar


प्रकाशित : मंसिर २४, २०७६ ०९:५३
ADVERTISEMENT
प्रतिक्रिया
पठाउनुहोस्
ADVERTISEMENT

लुम्बिनीमा चिङ र मनीषा

मनोज पौडेल

(लुम्बिनी) — नेपाल भ्रमण वर्षकी सद्भावना दूत चिनियाँ अभिनेत्री सु–चिङ र बलिउड अभिनेत्री मनीषा कोइरालाले सोमबार बुद्ध जन्मस्थल लुम्बिनीको भ्रमण गरेका छन् । 

चिङ बर्दिया निकुञ्ज भ्रमण गरेर यहाँ आएकी हुन् । कोइराला पनि यही बेला भ्रमणमा आएकी छन् । बिहान साढे ११ बजे मायादेवी मन्दिर प्रवेश गरेकी चिनियाँ अभिनेत्री चिङले दुई घन्टा बिताएकी थिइन् । दिउँसो उनी निस्कनासाथ अभिनेत्री कोइराला मायादेवी मन्दिर पुगेकी थिइन् । उनले एक घन्टा मन्दिरमा बिताइन् ।

चिनियाँ अभिनेत्री चिङ मायादेवी मन्दिरभित्र बुद्ध जन्मस्थलको पदचिह्न (मार्क स्टोन) नजिक ध्यान बसिन् । अशोक स्तम्भमा पूजाआजा गरिन् । परिसरभित्र रहेको मन्दिर, स्तूप र विहार भग्नावशेषको अवलोकन गरिन् । पुष्करणी पोखरी परिक्रमा गरिन् । उनलाई लुम्बिनी विकास कोषका सूचना अधिकृत राजन बस्नेतले मायादेवी मन्दिरको उत्खनन्, संरक्षण र गुरुयोजनाबारे जानकारी गराएका थिए । उनलाई मातृत्व दर्साउने मायादेवीको मूर्ति मायाको चिनो प्रदान गरिएको थियो । चिनियाँ कलाकार चिङ बौद्ध धर्मावलम्बी रहेकाले उनले श्रद्धापूर्वक पूजाआजा गरेकी थिइन् । शान्ति, मैत्री र करुणाप्रति समर्पित भई ध्यानमग्न भएको सूचना अधिकृत बस्नेतले बताए । ‘उनी शान्तिको अनुयायी रहेको पाइयो,’ उनले भने ।

बुद्ध जन्मस्थल लुम्बिनीमा सोमबार अभिनेत्री मनीषा कोइराला ।तस्बिर : कान्तिपुर

मन्दिर परिसरमा कोषका कर्मचारीले चिङको स्वागत गरेका थिए । त्यसैगरी सोमबार उनले राजा शुद्धोदनको राजप्रासाद तथा राजकुमार सिद्धार्थले २९ वर्षको युवा अवस्था बिताएको प्राचीन कपिलवस्तु (तिलौराकोट) को पनि अवलोकन गरिन् । त्यहाँ उनलाई कोषका सूचना अधिकृत दिलीपसिंह राईले पथ प्रदर्शन गरेका थिए । सामाजिक सञ्जाल विबोमामा करिब १ करोड ६० लाख मानिसले पछ्याएका छन् । त्यस्तै उनको भ्लगलाई १ अर्ब १३ करोडले पछ्याएको देखिन्छ । सन् १९९० मा ‘लाइफ अन ब स्ट्रिङ’ मार्फत चिनियाँ फिल्मबाट डेब्यु गरेकी चिङले ‘डार्क अब्सेसन’, ‘द इम्पेरर्स स्याडो’, ‘आई लभ यु टु, ‘मिस्टर सिक्स’ लगायत दर्जनभन्दा बढी चिनियाँ र हलिउड फिल्ममा अभिनय गरेकी छन् ।

अभिनेत्री कोइरालाले मायादेवी मन्दिरभित्र ५ मिनेट ध्यान गरिन् । अशोक स्तम्भ, पुष्करणी पोखरी र पुरातात्त्विक भग्नावशेषको अवलोकन गरिन् । उनलाई कोषका सूचना अधिकृत बस्नेतले सम्पदाबारे जानकारी दिएका थिए । कोइरालालाई बुद्धका ज्ञान र उपदेशबारे जानकारी भएकाले अभिरुचि देखिएको सूचना अधिकृत बस्नेतले बताए । पहिलो हिन्दी चलचित्र ‘सौदागर’ बाट हलिउड छिरेकी उनी चर्चित कलाकार हुन् ।

त्यसैगरी पूर्वराजा ज्ञानेन्द्र शाहले पनि आइतबार लुम्बिनीस्थित मायादेवी मन्दिरको भ्रमण गरेका छन् । लुम्बिनी विकास कोषलाई जानकारी नै नदिई उनी मन्दिर पुगेका थिए । आफैं गाडी चलाएर आएका उनले एक घन्टा मन्दिरमा बिताएको मन्दिर स्रोतले जानकारी दिएको छ ।

प्रकाशित : मंसिर २४, २०७६ ०९:४०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×