साइकल लेन माग्दै र्‍याली

रमेशकुमार पौडेल

चितवन — साइकल चढ्ने बानीको विकास गराउन भन्दै शुक्रबार नारायणगढमा र्‍याली निकालिएको छ । अभियानकर्मीहरुले भरतपुर महानगरपालिकामा ज्ञापनपत्र बुझाएर साइकलको सहज आवागमनका लागि सडकहरुमा साइकल लेन बनाउन माग गरे ।

साइकल व्यवसायी संघ चितवनका निवर्तमान अध्यक्ष धर्मराज सापकोटा ५० को दशकसम्म चितवनमा साइकलको प्रयोग अत्याधिक रहेको बताउँछन् । ‘चितवनमा २०१५ सालबाटै साइकल बिक्री पसल खुलेको हो । समथर क्षेत्र भएका कारण साइकल चलाउन यहाँ सहज भयो’ सापकोटाले भने । ६० को दशकपछि भने साइकल व्यपार ओरालो लाग्यो । कुनै बेला चितवनमा दिनमै पाँच सय साइकल बिक्री हुन्थे ।‘अहिले जनसंख्या बढेको छ । तर चितवनभर दिनमा सवा सयको हाराहारीमा साइकल बिक्री हुन गाह्रो छ’ सापकोटाले भने ।


चितवन उद्योग वाणिज्य संघका अध्यक्ष सहनलाल प्रधान चितवनमा जग्गा कारोबार फस्टाएसँगै मान्छेको हातमा पैसा हुन थाल्यो । पैसा हुने मान्छेले साइकल छाडेर मोटरसाइकल र चार पाङ्ग्रे गाडीहरु किन्न थाले । ‘पहिला एउटै घरमा चार/पाँचवटा साइकल हुन्थे । अहिले मोटरसाइकल र कार हुन थाल्यो । साइकल पैसा हुनेले के चढ्ने भन्ने मान्यता बढ्यो’ प्रधानले भने । तर साइकल मान्छेको स्वास्थय र पर्यावरणका लागि उपयुक्त साधन हो । ‘यसैका कारण हामीले साइकल चढ्ने बानीलाई प्रोत्साहित गर्न थालेका छौं । अहिले साइकल चढ्ने युवाहरु बढ्न थालेका छन्’ चितवन साइकल राइडर्स क्लबका अध्यक्ष नविन खरेलले भने ।


‘स्कुल पढ्ने र कलेज पढ्नेहरुका लागि साइकल नै उपयुक्त साधन हो । तर अभिभावकहरुले छोरो कलेज पढ्न थाले दुई चार लाख रुपैयाँ खर्च गरेर मोटरसाइकल किन्ने गर्दछन्' खरेलले भने, 'कलेज पढ्नेले चलाएको मोटरसाइकल दुर्घटना भएर दुखद घटनाहरु भएका छन्’ । युवाका लागि मात्रै नभएर हरेक उमेरका व्यक्तिका लागि साइकल चलाउनु फाइदा जनक भएको उनले बताए ।


‘साइकल चलाउन इन्धन चाहिँदैन । शारीरिक बलमा चल्ने भएका कारण कसरत हुन्छ । कसरतले मान्छेलाई स्वस्थ बनाउँछ । त्यसैले साइकल चलाउनु फाइदाजनक छ’ खरेलले भने । साइकल चलाउन चाहना भए पनि पूर्वाधार नभएका कारण चलाउन मन नगर्नेहरु पनि छन् । ‘व्यस्त सहरमा एकै रुटमा ठूला गाडी र साइकल चलाउँदा दुर्घटनाको खतरा रहन्छ । त्यसैले साइकल लेन मागेका हौं’ खरेलले भने ।


साइकल लेन बने साइकल चलाउनेहरु बढ्न सक्ने साइकल व्यवसायी संघ चितवन–नवलपुरका अध्यक्ष श्यामप्रसाद खरेलले बताए । ‘साइकल लेन समृद्ध र स्मार्ट सहरको सूचक हो । असुरक्षित सडकमा साइकल चलाउने चाहना धेरैलाई छैन । त्यसैले साइकल लेन मागेका हौं’ अध्यक्ष खरेलले भने । उनले भरतपुर महानगरले बनाउने सडकमा साइकल लेन अनिवार्य रुपमा राख्न माग गरे ।


चितवन उद्योग वाणिज्य संघ, साइकल व्यवसायी संघ चितवन–नवलपुर, चितवन साइकल साइडर्स क्लबले संयुक्त रुपमा ज्ञापनपत्र बुझाएका हुन् । ज्ञापनपत्र बुझ्दै भरतपुर महानगरपालिकाका मेयर रेनु दाहालले साइकल लेन बनाउने कुरा महानगरको नीतिमा परेको जानकारी दिइन् । उनले महानगरले छात्राहरुलाई तीन सय साइकल वितरण गर्ने योजना बनाएको पनि जानकारी दिइन् ।


साइकललाई प्रवर्द्धन गर्ने महानगरको पनि योजना रहेको मेयर दाहालको भनाइ थियो । नारायणगढ बजार घुमेर भरतपुर आएको साइकल र्‍यालीले ज्ञापनपत्र बुझाएपछि गैंडाकोट गएको थियो । गैंडाकोट नगरपालिकाका पनि उनीहरुले मेयर छत्रराज पौडेललाई ज्ञापनपत्र बुझाएर साइकल लेन निर्माणको माग गरेका छन् ।

प्रकाशित : मंसिर २०, २०७६ १६:१९
प्रतिक्रिया
पठाउनुहोस्

निजगढ विमानस्थल यथास्थितिमा राख्न सर्वोच्चको आदेश

कान्तिपुर संवाददाता

काठमाडौँ — बाराको निजगढमा प्रस्तावित अन्तर्राष्ट्रिय विमानस्थल निर्माणका लागि रूख कटान गर्ने योजना यथास्थितिमा राख्न सर्वोच्च अदालतले अन्तरिम आदेश जारी गरेको छ । न्यायाधीश टंकबहादुर मोक्तानको इजलासले शुक्रबार दुवै पक्षलाई छलफलका लागि झिकाउँदै त्यतिन्जेल रूख काट्ने, निर्माणस्थलबाट बुट्यान हटाउने लगायतका काम अघि नबढाउन आदेश दिएको हो ।

बिनायोजना हचुवाको भरमा लाखौं रूख काट्दा वातावरणीय विनाश निम्तिने भन्दै पूर्वसचिवहरू द्वारिकानाथ ढुंगेल, सुकदेव खत्रीलगायतले सर्वोच्च अदालतमा रिट निवेदन दर्ता गराएका थिए ।

हाल नागरिक उड्डयन प्राधिकरणले निजगढ विमानस्थल क्षेत्रमा चार किल्ला र सीमांकन, तारबारको काम गरिसकेको छ । निर्माण क्षेत्रभित्र पर्ने दुइटा नदी नियन्त्रणको काम जारी छ । यस परियोजनाको बाहिरी सडक निर्माणका लागि नेपाली सेनासँग प्राधिकरणले समझदारीपत्रमा हस्ताक्षर गरेको छ । प्राधिकरणले उक्त क्षेत्रमा कार्यालय स्थापना गरेर ९० बिघा निजी जग्गामध्ये ६६ बिघा अधिग्रहण गरिसकेको छ । यसक्रममा करिब ८० करोड रुपैयाँ वितरण भएको छ । रूख काट्न भने सुरु भएको छैन । प्राधिकरणका अनुसार नेपाल सरकारले आन्तरिक स्रोतबाट डेढ अर्ब रुपैयाँ खर्चिसकेको छ । सरकारले काठमाडौंस्थित त्रिभुवन अन्तर्राष्ट्रिय विमानस्थलको विकल्पका रूपमा अघि सारेको यस परियोजना निर्माणका लागि स्वीट्जरल्यान्डको ज्युरिच इन्टरनेसनल एयरपोर्टलाई छनोट गरिसकेको छ । लगानी बोर्डले यो कम्पनीसँग विस्तृत प्रस्ताव मागेको छ ।

नागरिक उड्डयन प्राधिकरणका अनुसार सन् १९९२ मा भएको थाई एयरवेज इन्टरनेसनलको एयरबस र त्यसको दुई महिनापछि पाकिस्तान इन्टरनेसनल एयरलाइन्सको एयरबस ३०० विमान दुर्घटनापछि नेपाल सरकारले काठमाडौं उपत्यकाको विकल्पका रूपमा तराईमा अन्तर्राष्ट्रिय विमानस्थल बनाउने घोषणा गरेको थियो । त्यही घोषणाअनुसार २६ वर्षअघि पूर्ण क्षमताको अन्तर्राष्ट्रिय विमानस्थल निर्माणका लागि उपयुक्त स्थान पहिचान गर्न नेपाल इन्जिनियरिङ कन्सल्टेन्सी सर्भिसेज सेन्टर लिमिटेड (नेपिकोन) लाई जिम्मा दिइएको थियो । नेपिकोनले सन् १९९५ मा निजगढ क्षेत्रलाई भौगोलिक, प्राविधिक तथा आर्थिक सम्भाव्यताको दृष्टिले अन्तर्राष्ट्रिय विमानस्थल निर्माणका लागि सर्वाधिक उपयुक्त रहेको प्रतिवेदन सरकारलाई दिएको थियो ।

प्रकाशित : मंसिर २०, २०७६ १६:१७
पूरा पढ्नुहोस्
प्रतिक्रिया
पठाउनुहोस्
×