महिला ह्यान्डबल सेमिफाइनलमा
पोखरा — १३ औं दक्षिण एसियाली खेलकुद (साग) अन्तरगत नेपाल महिला ह्यान्डबल टिम सेमिफाइनल प्रवेश गरेको छ । समूह ‘बी’मा रहेको नेपालले लगातार २ खेल जित्दै सेमिफाइनलको यात्रा तय गरेको हो ।
पोखरा रंगशाला बहुउद्देश्यीय कभर्ड हलमा भएको दोस्रो खेलमा बिहीबार नेपालले बंगलादेशलाई २६–२४ ले हराउँदै जित हात पार्यो । नेपालका लागि उमा राईले सर्वाधिक ८ गोलको योगदान दिइन् । उनले ७ गोल पेनाल्टीबाट गरेकी हुन् । नेपालले आफ्नो पहिलो खेलमा श्रीलंकालाई २९–१९ ले हराएको थियो ।
पुरुष ह्यान्डबलमा भने नेपाल बाहिरिएको छ । लिग चरणमा लगातार दुई खेलमा पराजय ब्यहोरेपछि नेपाल बाहिरिएको हो ।
बिहीबारको खेलमा नेपाल पाकिस्तानसँग ४३–१९ अन्तरले पराजित भयो । यसअघि नेपालले पहिलो खेल श्रीलंकासँग गुमाएको थियो । समूह ‘बी’ मा पाकिस्तानले पहिलो खेलमा जित निकाल्दै ३ अंक जोडेको छ ।
पाकिस्तानले शुक्रबार श्रीलंकासँग खेल्नेछ । मोहम्मद जुबेरले पाकिस्तानका लागि सर्वाधिक १० गोल गरे । नेपालका कप्तान विशाल बस्नेतले टोलीका लागि सर्वाधिक ५ गोल गरे ।
प्रकाशित : मंसिर १९, २०७६ २०:२१