ओलम्पिक टर्च सातै प्रदेशमा पुर्‍याइने

कान्तिपुर संवाददाता

काठमाडौँ — १३ औं दक्षिण एसियाली खेलकुद (साग) अघि ओलम्पिक टर्च सातै प्रदेशका मुख्य सहरमा पुर्‍याइने भएको छ । ओलम्पिक टर्च भ्रमणको जिम्मा राष्ट्रिय अन्तर्राष्ट्रिय खेलाडी संघले पाएको छ । बिहीबार आयोजित पत्रकार सम्मेलनमा संघका अध्यक्ष दीपक श्रेष्ठले टर्च भ्रमणको तालिका सार्वजनिक गरे । 

राष्ट्रिय खेलकुद परिषद्का सदस्य–सचिव एवं १३ औं दक्षिण एसियाली खेलकुद कार्यकारी समितिका संयोजक रमेशकुमार सिलवालले स्वयम्भू मन्दिर परिसरबाटमा शुक्रबार बिहान ८ बजे ओलम्पियन एवं नेपाललाई पहिलो अन्तर्राष्ट्रिय पदक दिलाएका धावक जितबहादुर केसीलाई टर्च हस्तान्तरण गरेपछि र्‍याली सुरु हुनेछ ।


त्यसपछि प्रदेश १ को राजधानी विराटनगरबाट टर्च र्‍याली सुरु हुनेछ । जनकपुर, हेटौंडा, बुटवल, सुर्खेत, धनगढी र पोखरा हुँदै र्‍याली काठमाडौं आउने तालिका छ ।


पत्रकार सम्मेलनमा सागका कीर्तिमानी म्याराथन धावक वैकुण्ठ मानन्धरले नेपालमा भएका विगतका दुई सागभन्दा १३ औं साग भव्य हुने बताए । ‘मैले दौड्न थालेको ५० वर्ष भयो, सुरुदेखि अहिलेसम्मको साग हेरेको छु । नेपालले आयोजना गरेको पहिलो र आठौं संस्करणभन्दा यसपल्ट भव्य हुन्छ भन्ने विश्वास छ,’ उनले भने ।


र्‍याली मंसिर ७ मा प्रदेश १ को विराटनगर, त्यही दिन प्रदेश २ को जनकपुर, ८ गते प्रदेश ३ को हेटौंडा र चितवन, ९ गते प्रदेश ५ को लुम्बिनी र बुटवल, १० गते कर्णाली प्रदेशको सुर्खेत र प्रदेश ५ को नेपालगन्ज, ११ गते सुदूरपश्चिम प्रदेशको धनगढी तथा १२ गते गण्डकी प्रदेशको पोखरा सहर परिक्रमा गराइने छ । १३ गते पोखराबाट टर्चलाई काठमाडौं ल्याइने छ । मंसिर १५ गते उद्घाटनका दिन काठमाडौंको विभिन्न स्थान परिक्रमा गराई उद्घाटनस्थल त्रिपुरेश्वरको दशरथ रंगशालामा दीप प्रज्वलन गरिने कार्यक्रम छ ।


र्‍यालीमा १३ जना हुनेछन् । खेलाडी संघका अध्यक्ष एवं सागका दोहोरो स्वर्णधारी कराँतेका दीपक श्रेष्ठबाहेक १२ ओलम्पियन खेलाडी छन् । ओलम्पियनमा तेक्वान्दोका दीपक विष्ट, एथलेटिक्सका वैकुण्ठ मान्धर र राजेन्द्र भण्डारी, पौडीकी नयना शाक्य, बक्सिङका उमेश मास्के, जुडोकी देवु थापा, एथलेटिक्सका जितबहादुर केसी र ज्ञानबहादुर बोहरा, सुटिङका टीकाराम श्रेष्ठ, एथलेटिक्सकै राजकुमारी पाण्डे, कान्छीमाया कोजु र मुकुन्दहरि श्रेष्ठ छन् ।


प्रकाशित : मंसिर ६, २०७६ १०:३६
प्रतिक्रिया
पठाउनुहोस्

‘याक अट्याक’ साइक्लिङ प्रतियोगितामा क्यानडाका वालेस च्याम्पियन

आश गुरुङ

(लमजुङ) — हिमाली क्षेत्रमा गरिएको ‘याक अट्याक’ साइक्लिङ प्रतियोगितामा क्यानडाका ३५ वर्षे कोरी वालेसले कीर्तिमान कायम राखेका छन् ।याक अट्याक उच्च हिमाली भेगमा गरिने अन्तर्राष्ट्रियस्तरको साइकल दौड हो । चक्रीय अन्नपूर्ण पदमार्गमा गरिएको १३ औं संस्करणमा १२ देशका २४ प्रतिस्पर्धी उछिनेर उनले बाजी मारे ।

यसपालिसँगै उनी लगातार चौथोपल्ट याक अट्याक च्याम्पियन बनेका छन् । संसारकै अग्लो हिमाली भञ्ज्याङ थोराङला (५,४१६ मिटर) लाई फन्को मारेर उनले यसपालि पनि आफ्नो कीर्तिमान जोगाए । ७ दिने दौडको २ सय २० किलोमिटर उनले १४ घण्टा ४१ मिनेट १८ सेकेन्डमा पूरा गरे ।

यसवर्ष बेसीसहर वरपर एकदिन रेस गरी प्रतियोगी दोस्रो दिन मनाङ प्रवेश गरेको थियो । नोभेम्बर १३ मा सुरु प्रतियोगिता सातौं दिन नोभेम्बर १८ मा मुस्ताङको कालोपानी पुगेर टुंगिएको थियो । आठौं दिन पोखरा आएको टोली दसौं दिन बिहीबार काठमाडौं पुगेको छ । ‘लगातार चौथोपल्ट जित्दा आफैंलाई भाग्यमानी ठानेको छु । यो मेरो संघर्षको फल हो,’ पोखरामा पुरस्कार थापेपछि उनले खुसी व्यक्त गरे । प्रतियोगितामा १६ घण्टा ५९ मिनेट ४३ सेकेन्डबाट नेपाली साइक्लिस्ट २५ वर्षे रोअन तामाङ दोस्रा भए । उनी गतवर्ष पनि सोही स्थानमा थिए ।

‘अन्तर्राष्ट्रिय रेसरसँग प्रतिस्पर्धामा उत्रनु नै ठूलो हो । पहिलो दोस्रोभन्दा यति लामो बाटोमा साइकल दौडाउनु नै जित हो,’ उनले भने । उनलाई पछ्याउँदै बेलायती नागरिक राइज भर्नर १७ घण्टा ३६ मिनेट २४ सेकेन्डमा दूरी पार गरी तेस्रो भए ।

खुलातर्फ पहिलो, दोस्रो र तेस्रोलाई क्रमशः १ हजार, ५ सय र २ सय ५० अमेरिकी डलरबराबरको सुविधा आयोजक बेलायतस्थित माउन्टेन बाइकिङ वर्ल्ड वाइडका निर्देशक फिल इभान्सले प्रदान गरेको छ । यसपालि नगद पुरस्कार नदिएर प्रतियोगीलाई विदेश जाँदा वा कहीं प्रतियोगितामा भाग लिँदा उक्त रकम बराबरको सहयोग गर्ने भएको छ ।

महिलातर्फ दुई सहभागी भएकामा फ्रान्सकी क्लियर डिमारक्वेट २२ घण्टा ५७ मिनेट १४ सेकेन्डमा विजेता भइन् । इटालीका लेटिजिया फ्रान्कोले २५ घण्टा, ५२ मिनेट ३३ सकेन्डमा दूरी पार गरेर दोस्रो भइन् । यसपालि नेपाली महिला बन्द प्रशिक्षणमा रहेकाले भाग लिन नपाएको माउन्टेन ट्रेल बाइक (एमटीबी) नेपालका निर्देशक अजय पण्डित क्षेत्रीले बताए ।

४० वर्ष माथिको उमेर समूहमा नेपालका हर्क लामाले १९ घण्टा २१ मिनेट १५ सेकेन्डबाट विजेता भए । इटालीका अल्बर्ड किचर २१ घण्टा ५ मिनेट ५ सेकेन्डबाट दोस्रा भए । २६ घण्टा १४ सेकेन्डबाट जर्मनीका माइकल पिटर्स तेस्रो भए । ।

५० भन्दा माथि अस्ट्रियाका पिटर उल २१ घण्टा २२ मिनेट १८ सेकेन्डबाट विजेता भए । जर्मनीका फारुक बायर र अमेरिकाका जेफ स्मेरलर दोस्रा र तेस्रो भए ।

प्रकाशित : मंसिर ६, २०७६ १०:३६
पूरा पढ्नुहोस्
प्रतिक्रिया
पठाउनुहोस्
×