सागको कबड्डी हल्चोक सारियो

कुशल तिमल्सिना

काठमाडौँ — आसन्न १३ औं दक्षिण एसियाली खेलकुद (साग) अन्तर्गत कबड्डीको खेलस्थल परिवर्तन भएको छ । त्रिवि स्मृति कभर्डहलमा आयोजना गर्ने प्रस्ताव गरिएकामा अन्तर्राष्ट्रिय मापदण्ड नपुगेका कारण सशस्त्र प्रहरी बलको मुख्यालय हल्चोकस्थित कभर्डहलमा प्रतियोगिता हुने १३ औं साग प्राविधिक समितिले जानकारी दिएको छ । 


नेपाल कबड्डी संघले त्रिविमा आयोजना गर्ने प्रस्ताव प्राविधिक समितिमा राखेको थियो । प्राविधिकले खेलस्थल निरीक्षण गर्दा खेलस्थल र बाहिरी भाग नपुगेपछि त्यहाँ आयोजना गर्न नसकिने निष्कर्षमा पुगेको प्राविधिक कमिटीका संयोजक गंगाबहादुर थापाले जानकारी गराए ।

‘संघले प्रस्ताव गरेअनुसार १८–१८ मिटरको खेलस्थल चाहिनेमा त्रिवि हलमा १७–१७ मात्र देखियो । विदेशी टिमले प्रश्न उठाउनसक्ने सम्भावना भएपछि हामीले खेलस्थल सारेका हौं,’ संयोजक थापाले कान्तिपुरसँग भने, ‘संघकै प्रस्तावअनुसार १३ औं सागको कबड्डी हल्चोकस्थित एपीएफ कभर्डहलमा हुनेछ । यसलाई प्राविधिक कमिटीले निरीक्षण गरेर टुंगो लगाइसकेको छ ।’

संयोजक थापाले दुई साताअघि नै यस खेलस्थल हल्चोक सार्ने निर्णय गरिसकेको थियो । तर कात्तिक २९ मा राष्ट्रिय खेलकुद परिषद्ले गरेको औपचारिक पत्रकार सम्मेलनमा वितरण भएको खेलस्थल तालिकामा कबड्डी खेल त्रिविपरिसरस्थित स्मृति हलमा हुने उल्लेख छ ।

नेपाल कबड्डी संघको आफ्नै कभर्डहल छैन । संघका महासचिव विनोद प्रजापतिले पनि प्रस्तावित खेलस्थलमा मापदण्ड नपुगेपछि संघकै प्रस्तावमा प्राविधिक समितिले हल्चोक मैदान निश्चित गरेको जानकारी दिए । प्राविधिक समितिका संयोजक थापाका अनुसार उनको समितिमार्फत सागमा समावेश सबै खेलस्थलको निरीक्षण सम्पन्न भएको छ । कबड्डीबाहेक सबै खेलस्थल प्रस्थावित स्थानमै टुंगो लागिसकेको छ ।

फाइनल खेल्ने लक्ष्य
सागमा गत संस्करण कांस्य जितेको नेपाली कबड्डीले यसपल्ट फाइनल खेल्ने लक्ष्य लिएको छ । चारमहिने बन्द प्रशिक्षण र भारतमा तीन साताको विशेष प्रशिक्षणले खेलाडीको स्तर बढेको र घरेलु मैदानको फाइदा उठाउने लक्ष्यमा नेपाली टोली रहेको संघले जनाएको छ ।

सागका लागि कबड्डीले साउन १५ देखि बन्द प्रशिक्षण सुरु गरेको थियो । कात्तिक १५ गते विशेष प्रशिक्षणका लागि भारतको कोलापुर गएको टोली शनिबार स्वदेश फर्कनेछ । नेपालका लागि आत्मविश्वासी पक्ष भनेको प्रशिक्षक रमेश बन्डागिरीको मार्गनिर्देश पनि हो । उनी भारतीय कबड्डी टिमका पूर्व प्रशिक्षकसमेत हुन् ।

‘यसपल्ट हाम्रो तयारी राम्रो छ । स्तरीय प्रशिक्षक पाएका छौं र त्यहीअनुसार स्तरीय प्रशिक्षण भइरहेको छ,’ महासचिव प्रजापतिले भने, ‘हामी महिला र पुरुष दुवै टोलीले फाइनल खेलेको हेर्न चाहन्छौं ।’ नेपालको पुरानो खेलमध्ये एक कबड्डीको अन्तर्राष्ट्रिय सहभागिता चाहिँ निकै पातलो छ । २०७३ सालमा बंगलादेश, भारत र नेपाल सम्मिलित अन्तर्राष्ट्रिय आमन्त्रण प्रतियोगितामा नेपालको पुरुष टोली दोस्रो भएको थियो ।

गत वर्ष इन्डोनेसियामा आयोजित १८ औं एसियाली खेलकुदमा पुरुष र महिला टोलीले सहभागिता जनाएका थिए । त्यसयता अन्तर्राष्ट्रिय प्रतियोगिता खेलेको छैन । ‘दक्षिण एसियामा भारत हामीभन्दा धेरै माथिल्लो स्तरको छ । भारत एसियाली च्याम्पियन पनि हो । त्यसबाहेक पाकिस्तान, श्रीलंका र बंगलादेशको स्तर हामी सरहकै हो,’ प्रजापतिले भने ।

सागमा कबड्डीतर्फ भुटान र माल्दिभ्सबाहेक ५ टोलीको सहभागिता रहनेछ । प्रजापतिका अनुसार सहभागी देशमध्ये भारतबाहेक अन्यको तयारी राम्रो छैन । यसलाई अवसरका रूपमा उपयोग गर्ने प्रजापतिले दाबी गरे ।
कबड्डी प्रतियोगिता मंसिर १५ देखि १८ सम्म हल्चोक मैदानमा हुनेछ ।

‘हामीसँग एउटैमात्र खेलस्थल छ । महिला र पुरुष दुवैको प्रतियोगिता एउटै स्थलमा आयोजना गर्नुपर्ने भएकाले बिहान/बेलुकाको समय मिलाउने छौं,’ प्रजापतिले भने । उनका अनुसार राउन्ड रोबिन प्रणालीमा प्रतियोगिता हुनेछ । समूहका शीर्ष दुई टोलीले फाइनल खेल्नेछन् । तेस्रो र चौथो स्थानमा रहने टोलीबीच प्लेअफ हुनेछ ।


सागका कबड्डी खेलाडी

पुरुष
कृष्ण लामा,जयबहादुर बोहरा, प्रवीण खड्का, रन्जित गजमेर, विनोद तामाङ,रामु टमाटा,पदमबहादुर विष्ट,प्रदीप मिजार,कल्याण भुजेल,अजय मानन्धर,लालमोहर यादव,रामप्रसाद महतो थारु

महिला
अनुजा कुलुङ राई,मेनुका राजवंशी,मनमती विष्ट, जयन्ती बडु, कोषमाया बस्नेत, कमला थापा,गंगा धामी,
हरिना थापा,सरिता भुजेल,रविना चौधरी,पुस्तिका चौधरी,इसुदा गिरी

प्रकाशित : मंसिर ६, २०७६ १०:३६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

गृहलाई पत्तै नदिई सुरक्षा समितिमा आईजीपी

कान्तिपुर संवाददाता

काठमाडौँ — दक्षिण एसियाली खेलकुद (साग) सुरक्षा समितिको अध्यक्षमा बसेपछि प्रहरी महानिरीक्षक (आईजीपी) सर्वेन्द्र खनालसँग गृह मन्त्रालय असन्तुष्ट बनेको छ । साग सुरक्षा योजनाबारे छलफल गर्न बसेको बैठकमा आईजीपी खनाल नेतृत्वको समिति सम्बन्धित मन्त्रालयलाई जानकारी नै नदिई गठन भएको भन्दै गृहले असन्तुष्टि जनाएको हो ।

गृहमन्त्री रामबहादुर थापाको उपस्थितिमा बिहीबार साग सुरक्षा कार्ययोजनाबारे छलफल भएको थियो । ‘युवा तथा खेलकुद मन्त्रालयको तर्फबाट आइजीपीको नेतृत्वमा सुरक्षा समिति गठन भएको रहेछ, यस विषयमा मन्त्रालयलाई जानकारी नै दिइएन,’ स्रोतले भन्यो, ‘सुरक्षा रणनीति तय गर्ने मन्त्रालयलाई बाइपास गरेर आईजीपीको नेतृत्वमा समिति गठन गर्नु उचित होइन ।’

गृहलाई केही दिनअघि मात्रै आईजीपीको नेतृत्वमा सुरक्षा समिति गठन भएकोबारे औपचारिक जानकारी गराइएको स्रोतको भनाइ छ । गृह मन्त्रालयका प्रवक्ता केदारनाथ शर्माले गृह मन्त्रालय वा आईजीपीको नेतृत्वमा रहेको समिति जसले भए पनि भरपर्दो सुरक्षा व्यवस्थापन गर्नुपर्ने भन्दै त्यसमा ‘डुप्लिकेसन’ हुन नहुने बताए । साग सुरक्षाबारे केही दिनभित्रै रणनीति तय भइसक्ने उनले बताए ।

प्रधानमन्त्रीको अध्यक्षतामा निर्देशक समिति, खेलकुदमन्त्रीको अध्यक्षतामा कार्यकारी समितिसहित विभिन्न १५ विषयगत समिति गठन गरिएको छ । विषयगत समितिमध्ये सुरक्षा समितिको नेतृत्व आईजीपी खनाललाई दिइएको छ ।

मंसिर १५ देखि २४ सम्म दक्षिण एसियाका ७ मुलुकका खेलाडीले भाग लिने खेलमेला १३ औं साग नेपालमा आयोजना हुँदै छ । काठमाडौं, ललितपुर, कास्की र धनुषामा हुने खेलकुदमा सार्कका करिब ४ हजार खेलाडी सहभागी हुने अनुमान छ ।

गृहमन्त्री थापाले खेलकुदको सुरक्षा मुलुककै प्रतिष्ठासग जोडिएकोले चुस्त र प्रभावकारी कार्ययोजना लागू गर्न मातहत निकायलाई निर्देशन दिएका थिए । सागमा काठमाडौंमा १२, ललितपुर र कास्कीमा ९–९ र धनुषामा कुस्ती एक खेल आयोजना हुनेछ ।

प्रकाशित : मंसिर ६, २०७६ १०:३६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT