नेपाल इमर्जिङबाट बाहिरियो

कान्तिपुर संवाददाता

काठमाडौँ — बंगलादेशसँग ८ विकेटको पराजयपछि नेपाल एसीसी इमर्जिङ टिम्स कप क्रिकेटको समूह चरणबाटै बाहिरिएको छ । बंगलादेशमा भइरहेको प्रतियोगिताको पहिलो खेलमा भारतसँग ७ विकेटले पराजित नेपालले शनिबार हङकङमाथि ४० रनको जित पाएको थियो । 

तीन खेलमा दोस्रो हार बेहोर्दै नेपाल प्रतियोगिताबाट बाहिरिएको हो । यस प्रतियोगितामा नेपाल अहिलेसम्म सेमिफाइनल पुग्न सकेको छैन । बंगलादेश तीनै खेल जित्दै समूह ‘बी’ को विजेता बन्यो । भारत १ हार र २ जित नतिजासहित सेमिफाइनल पुगेको छ । भारतले सोमबार अन्तिम लिग खेलमा हङकङलाई १ सय २० रनले पराजित गर्‍यो । हङकङ सबै ३ खेलमा पराजित भयो ।

ढाकास्थित बीकेएसपी–३ मैदानमा बंगलादेशले टस जितेपछि ब्याटिङमा निम्त्याइएको नेपाल ४४.३ ओभरमा १ सय ३८ रनमा अलआउट भयो । नाजमुल सान्तोले ५६ बलमा अविजित ५९ रन बनाएपछि बंगलादेशले २४ ओभरमै लक्ष्य पूरा गर्‍यो । शान्तोले ६ चौका र २ छक्का प्रहार गरे । अर्का अविजित ब्याट्सम्यान यासिर अली चौधरीले १५ बलमा १ चौका र २ छक्कासहित १८ रन बनाए ।

बंगलादेशका टेस्ट खेलाडी सौम्य सरकार ११ रनमात्र जोड्दै आउट भए । एक छक्का प्रहार गरेका उनलाई करण केसीले आउट गरे । अर्का ओपनर मोहम्मद नइम शेखले ५६ बलमा ५ चौकासहित ४५ रन बनाए । उनलाई सुसन भारीले आउट गरे । सुसनले ३ ओभरमा २४ रन खर्चिए । करणले ६ ओभरमा २ मेडन राख्दै ११ रनमात्र खर्चे । सोमपाल कामीले ३ ओभरमा २४, पवन सर्राफले ६ ओभरमा ३६ र शरद भेषावकरले ५ ओभरमा ३२ रन खर्चिएका थिए ।

यसअघि कप्तान ज्ञानेन्द्र मल्ल र कुशल भुर्तेलले सातौं ओभरमा ३३ रन जोड्दै नेपाललाई राम्रो सुरुआत दिलाए । तर ३ रनको अन्तरमा ३ विकेट गुमाएपछि नेपाल १० औं ओभरमा ३५–३ को स्थितिमा पुग्यो । कुशल २२ बलमा १० रन जोडी आउट भए । प्रतियोगिताको पहिलो दुई खेलमा खाता नखोली आउट भएका ज्ञानेन्द्रले २७ बलमा २२ रन बनाउँदा ४ चौका प्रहार गरे । दुबैलाई सुमोन खानले आउट गरे । शरद १ रनमात्र बनाई तनविर इस्लामको बलमा आउट भए ।

दीपेन्द्रसिंह ऐरी ६, आरिफ शेख ११, पवन ९, सन्दीप जोरा शून्य र विनोद भण्डारी ८ रनमा आउट भएपछि नेपाल २८ ओभरमा ८५–८ को स्थितिमा पुगेको थियो । सोमपाल र करणले नवौं विकेटमा ५० रनको साझेदारी गरे । नवौं खेलाडीका रूपमा आउट भएका करणले ४७ बलमा १ चौका र १ छक्कासहित १८ रन बनाए । सोमुनको तेस्रो सिकार सोमपाल भए । उनले ६३ बलमा ४ चौकासहित ३८ रन बनाए । सुसन १ रनमा अविजित रहे ।

सुमोनले ८.३ ओभरमा २९ रन खर्चेर नेपालको महत्त्वपूर्ण ३ विकेट लिए । मिनहाजुल अबेदिन अफ्रिदीले पनि ३ विकेट लिनेक्रममा १० ओभरमा २९ रन नै खर्चे । इस्लाम र मेहदी हसनले २–२ विकेट लिए ।

प्रकाशित : मंसिर ३, २०७६ ०७:३९
ADVERTISEMENT
प्रतिक्रिया
पठाउनुहोस्
ADVERTISEMENT

त्रियोगलाई दुई स्वर्ण

कान्तिपुर संवाददाता

काठमाडौँ — त्रियोगका दिप्सन बस्नेतले एमआईएस कप–२०१९ अन्तर्गत टेबलटेनिस १२ कक्षामुनि छात्रतर्फको उपाधि जितेका छन् । फाइनलमा उनले सैनिक स्कुलका योगेन्द्रबहादुर पाललाई ३–१ को सेटमा हराए । छात्रातर्फ स्वर्णिमकी आभा पन्तले आफ्नै स्कुलकी स्मृति पन्तलाई ३–१ को सेटमा हराएर स्वर्ण जितिन् । 

टेबलटेनिसकै ८ कक्षामुनिको छात्रातर्फ त्रियोगकी प्रत्याशा थापाले स्वर्णिमकी कृपा महर्जनलाई हराएर स्वर्ण जितिन् । छात्रतर्फ आयोजक मोर्डन इन्डियनका हर्षित केसीले प्रसन्न दाहाललाई ३–२ को सेटमा पराजित गरी स्वर्ण जिते । फुटबलतर्फ सोमबार जेम्सले त्रियोगलाई ७–० ले पराजित गर्दा जेम्सका राज अग्रहरीले ह्याट्रिक गरे । बूढानीलकण्ठविरुद्ध पेनाल्टी शुटआउटमा लिटिल एन्जल्स ३–१ ले विजयी भयो । विजेता दुवै टोली सेमिफाइनल पुगे ।

बास्केटबलतर्फ चाँदबागले लिटिल एन्जल्सलाई २७–२४ र केएमसीले बूढानीलकण्ठलाई २२–१५ ले हराए । एमआईएस कपमा टेबलटेनिस, फुटबल र बास्केटबलमा १२ स्कुलका ३ सय ५० भन्दा बढी खेलाडीले भाग लिएका छन् ।

प्रकाशित : मंसिर ३, २०७६ ०७:३७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×