विश्वकप २०२२ छनोट : थिम्पुमा अंकको आस

राजु घिसिङ

काठमाडौँ — राष्ट्रिय खेलकुद परिषद्ले २०७२ को महाभूकम्पले जीर्ण बनाएको दशरथ रंगशालाको सबलीकरणको कामलाई १३ औं दक्षिण एसियाली खेलकुद (साग) का लागि रातारात तीब्र पारेको थियो । तर, विश्वकप २०२२ छनोटमा कुवेतविरुद्धको खेल आयोजनालाई सम्भव भएन । त्यसैले नेपाली राष्ट्रिय फुटबल टिम विश्वकप छनोटको पहिलो घरेलु खेल (होम म्याच) तटस्थ भूमिमा खेल्न बाध्य भयो । घरेलु मैदानमा खाडी मुलुकविरुद्ध प्रतिस्पर्धा गर्ने अवसरबाट वञ्चित भए पनि नेपाली टिमले भुटानको राजधानी थिम्पुस्थित चाङलिमिथाङ रंगशालामा मंगलबार खेल्दा अंक जोड्ने आशा गरेको छ ।

‘यो (कुवेतविरुद्ध) खेल हाम्रा लागि महत्वपूर्ण छ,’ नेपाली टिमका मुख्य प्रशिक्षक योहान कालिनले भने, ‘हामी वास्तवमै खेलमा फर्कन चाहन्छौं । हामी कडा मिहिनेत गर्दै चुनौती दिन चाहन्छौं । अरु खेलमा जस्तै यसमा पनि राम्रो प्रदर्शन गर्ने लक्ष्य बनाएका छौं ।’ छनोटको पहिलो खेल (५ सेप्टेम्बर) मा कुवेत सिटीमा नेपालले अनपेक्षित रूपमा ७–० को हार बेहोरेको थियो । त्यो खेलमा नेपाली टिम मैदानको सबै क्षेत्रमा निरीह बनेको थियो । त्यो प्रदर्शन र नतिजाबाट उक्सिन चाहेको छ कालिनको टिम ।

आजको खेल
नेपालविरुद्ध कुवेत
समय : १४ :४५ बजे

फिफा वरीयतामा ११ स्थानमाथिको प्रतिद्वन्द्वीबारे कालिनले भने, ‘यो छनोटमा कुवेतले धेरै राम्रो गरिरहेको छ तर हामी आत्मविश्वासी छौं ।’ मान्डलयमा नोभेम्बर ७ मा भएको मैत्रीपूर्ण खेलमा नेपाली टिम ३–० ले म्यानमारविरुद्ध हारेको थियो । उक्त खेलमा पहिलो रोजाइका अन्जन विष्ट, विमल घर्तीमगर, दिनेश राजवंशी र सन्तोष तामाङ शुक्रबार राति ठमेलका विभिन्न नाइटक्लबमा मोजमस्तीमा रहेको पाइएपछि चारै खेलाडीलाई टिमबाट बर्खास्त गर्दै कालिन २० खेलाडी लिएर शनिबार थिम्पु पुगेका थिए । उक्त नाइट क्लब काण्डबारे उनी बोल्न चाहेनन् । भने, ‘हामीसँग यहाँ थिम्पु) मा रहेका खेलाडीप्रति केन्द्रित हुनु आवश्यक छ । मेरा खेलाडीहरू विमानस्थलबाटै सबै किसिमले राम्रो मनस्थितिमा छन् र कडा संघर्ष गर्न तयार छन् ।’ चार खेलाडीलाई टिमबाट हटाएको केही घण्टामै मिडफिल्डर सुवास गुरुङलाई लिएर कालिनको टिम भुटानतर्फ उडेको थियो ।

कुवेतमा ७–० ले हारेको पाँचौं दिनमै ताइवानमा चाइनिज ताइपेईविरुद्ध २–० को जित रचेको खेलमा अन्जन विष्टले दुवै गोल गरे । त्यसैले उनीसहित चार खेलाडीको अभाव नेपाललाई भुटानी रंगशालामा हुनसक्छ । तर, स्विडिस प्रशिक्षक कालिन अनुशासनलाई प्राथमकिता दिन चाहन्छन् । त्यसपछि आफ्नो रणनीति खेलाडीमार्फत् मैदानमा उतार्न चाहन्छन् । खाडी मुलुकको टिमविरुद्ध थिम्पुको काठमाडौंसँग मिल्दोजुल्दो मौसम पनि नेपाली खेलाडीनिम्ति अनुकूल बन्नसक्छ ।

कुवेतले आफ्नो घरेलु मैदानमा नेपालविरुद्ध ७–० को जित निकालेको पाँचौं दिनमै पाहुना टिम अस्ट्रेलियाले कुवेत सिटीमै ३–० को सफलता रचेको थियो । त्यो हारसँगै कुवेत फुटबल संघले क्रोएसियाली प्रशिक्षक रोमियो जोज्याकलाई बर्खास्त गर्दै थामेर एनादलाई टिम हेर्ने जिम्मेवारी दियो । एनादको टिमले अम्मानमा जोर्डनविरुद्ध गोलरहित खेल्यो भने पाँच दिनअघिमात्रै कुवेत सिटीमा ताइपेईलाई ९–० ले हरायो । ताइपेईविरुद्ध सात खेलाडीले गोल गरे । त्यसैले थिम्पुमा अंक जोड्न नेपाललाई त्यति सजिलो भने छैन ।

‘हामीले राम्रो खेल खेल्ने र ३ अंक जोड्ने आस गरेका छौं,’ कुवेतका प्रशिक्षक थामेर एनादले प्रि–म्याच कन्फ्रेन्समा भनेका छन्, ‘नेपाललाई सजिलो प्रतिद्वन्द्वीका रूपमा लिएका छैनौं । नेपाल कमजोर टिम होइन । उस्तै किसिमको मौसम काठमाडौंको भएकोले यहाँ (थिम्पु) को माहोलले नेपाललाई साथ दिने निश्चित छ ।


मैदानबाहिरको खेल
एसियन कप २०२३ छनोटको रूपमा पनि रहेको यस विश्वकप छनोटको खेलमा नेपाल र कुवेती टिम मैदानमा ओर्लनुअघि नै दुई देशको फुटबल संघबीच मैदानबाहिर ठूलै प्रतिस्पर्धा चलेको थियो । त्यो आयोजनास्थल (रंगशाला) लाई लिएर भएको ‘खेल’ थियो । कुवेतले दशरथ रंगशाला तयार नभएको भन्दै यहाँ खेल्न अस्वीकार गरेपछि एसियाली फुटबल महासंघ (एएफसी) ले प्रतिस्पर्धा समितिका पदाधिकारीलाई रंगशाला निरीक्षण गर्न काठमाडौं पठायो । ती प्रतिनिकिकै प्रतिवेदनअनुसार दशरथ रंगशाला अन्तर्राष्ट्रिय मापदण्डको नभएको भन्दै एएफसीले नेपालको ‘होम म्याच’ तटस्थ भूमिमा सञ्चालन गर्न एन्फालाई निर्देशन दियो ।

वास्तवमा कुवेती टिम विश्वकप छनोटको तेस्रो चरणमा पुग्ने आशामा रणनीतिक रूपमा यो चिसो मौसममा काठमाडौंमा खेल्न चाहँदैनथ्यो । तर, एन्फाले उस्तै चाल चाल्यो काठमाडौंभन्दा जाडो हुने थिम्पुमा खेलाउने प्रस्ताव गर्दै । त्यसविरुद्ध कुवेती फुटबल संघले एएफसीमा लबिइङ गर्‍यो । अन्त्यमा आएर नेपालको पहिलो घरेलु खेल थिम्पुको रंगशालामा गर्न एएफसीले स्वीकिृति दियो । १० हजार दर्शक क्षमताको यो रंगशालामा विंगर सुजल श्रेष्ठलगायत केही नेपाली खेलाडीले क्लब फुटबलमा प्रतिस्पर्धा गरिसकेका छन् । स्वदेशमा आर्टिफिसियल टर्फमा गरिएको अभ्यास र थिम्पुको उस्तै टर्फमा हुने खेल र त्यो मैदानमा अनुभवी खेलाडीको संलग्नताले कुवेतविरुद्ध नेपाली टिमलाई फाइदा गर्नसक्छ ।


प्रकाशित : मंसिर ३, २०७६ ०७:३५
प्रतिक्रिया
पठाउनुहोस्
ADVERTISEMENT
ADVERTISEMENT

कारागारबाट समेत धम्की

स्थानान्तरण माग गरिएको पत्रमै आलमले लेखे, ‘वो एसपी (भूपेन्द्र खत्री, रौतहट) ने मेरे साथ गलत किया, उसका भी बुरा होगा ।’ 
मातृका दाहाल

काठमाडौँ — कर्तव्य ज्यान मुद्दामा नख्खु कारागारमा रहेका पूर्वमन्त्री तथा कांग्रेस सांसद मोहम्मद आफताब आलमले रौतहट कारागार जान चलखेल थालेका छन् । आफूलाई जबर्जस्ती नख्खु कारागार ल्याइएको भन्दै आलमले रौतहट स्थानान्तरणका लागि कांग्रेस नेता रामचन्द्र गिरीलाई परिचालन गरेका छन् । 

गिरीले आइतबार दिउँसो नख्खु कारागार पुगेर आलमसँग भेट गरेका थिए । भेटपछि आलमले कारागार स्थानान्तरणका लागि हिन्दीमा लेखेको मागपत्र कारागार प्रशासनलाई बुझाएका छन् । उक्त मागपत्र कारागार प्रशासनले कारागार व्यवस्थापन विभागमा पठाएको छ ।

स्थानान्तरणका लागि आलमको माग आफ्ना समर्थक भड्काएर मुद्दा प्रभावित बनाउने खेलअनुसार आएको हुन सक्ने सुरक्षा निकायको विश्लेषण छ । मागपत्रमा रौतहटका प्रहरीप्रति टिप्पणी गर्दै आलमले उनीहरूलाई राम्रो नहुने चेतावनी दिएका छन् । वो एसपी (भूपेन्द्र खत्री, रौतहट) ने मेरे साथ गलत किया, उसका भी बुरा होगा,’ आलमले लेखेका छन् ।

प्रहरीले आलमलाई भेट्न आउनेमाथि विशेष निगरानी राखेको छ । नख्खु कारागार आफ्ना लागि सहज नभएको उल्लेख गर्दै आलमले आफन्त र नातेदारबाहेक अरूलाई भेट्न नदिइएकोप्रति पनि असन्तुष्टि जनाएका छन् । ‘मेरा सारा दोस्त मेरा रिस्तेदार है,’ उनले लेखेका छन्, ‘यहाँ (रौतहट) सुरक्षा दिन सकिँदैन भनेर रातारात कारागार स्थानान्तरण (नख्खु) गरियो, सुरक्षा दिने काम प्रशासनको हो न कि स्थानान्तरण ।’ असोज २६ मा पक्राउ गर्न गएका प्रहरीलाई समेत दुर्व्यवहार गरेका आलमले एसपी खत्री र डीएसपी नवीन कार्कीलाई हत्कडी लगाउने र जिल्ला अशान्त पार्ने धम्की दिएका थिए । त्यस क्रममा आलमले आफूलाई पक्राउ गरिएको प्रतिशोधमा जिल्ला अशान्त पार्ने र त्यसको जिम्मेवारी प्रहरीले नै लिनुपर्ने बताएका थिए ।

आफू रौतहट कारागारमा बस्न चाहे पनि सुरक्षाको कारण देखाउँदै नख्खु ल्याइएकोप्रति पनि उनको आक्रोश छ । उनले नेता गिरीलाई कारागार विभागका महानिर्देशकसँग कुरा गरेर रौतहट स्थानान्तरणको व्यवस्था मिलाउन आग्रह गरेका थिए । गिरीले यसबारे ‘माथि कुरा गर्छु’ भन्ने आश्वासन दिएको स्रोतको भनाइ छ । शान्तिसुरक्षा र परिस्थितिको विश्लेषण गरेर नै उनलाई रौतहटबाट नख्खु ल्याइएको र तत्काल स्थानान्तरणको अवस्था नरहेको विभाग स्रोतले बताएको छ ।

पक्राउपछि ३ साता लामो अनुसन्धान गरेर प्रहरीले आलमलाई कर्तव्य ज्यान, ज्यान मार्ने उद्योग र विस्फोटक पदार्थ भण्डारण कसुरमा कैद सजाय हुने रायसहितको प्रतिवेदन जिल्ला सरकारी वकिलको कार्यालय रौतहटमा बुझाएको थियो । सोही प्रतिवेदनकै आधारमा जिल्ला न्यायाधिवक्ता खडिन्द्रराज कटवालले अदालतमा कात्तिक १८ मा मुद्दा चलाएका थिए । १० दिन लामो थुनछेक बहसपछि जिल्ला न्यायाधीश दीपक ढकालको इजलासले गत शुक्रबार आलमलाई पुर्पक्षका लागि कारागारमा राख्न र पीडित एवं साक्षीको संरक्षण गर्न आदेश दिएको थियो । आदेशलगत्तै शुक्रबार राति नै प्रहरीले उनलाई नख्खु कारागार ल्याएको थियो । ०६४ चैत २७ गते राजपुर बम विस्फोटका घाइतेलाई इँटाभट्टामा हालेर मारेको अभियोग आलममाथि छ ।

यसैबीच आलमलाई सोमबार उनका छोरा तथा आफन्तले नख्खु कारागारमा पुगेर भेटेका छन् । आलमका छोरा मोहम्मद फिरोज आलम प्रहरी अस्पताल महाराजगन्जमा प्राविधिक (चिकित्सक) निरीक्षक (इन्स्पेक्टर) का रूपमा कार्यरत छन् । उनी एमबीबीएस चिकित्सक हुन् ।

प्रकाशित : मंसिर ३, २०७६ ०७:३२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×