चीनमाथि सहज जित

कान्तिपुर संवाददाता

काठमाडौँ — नेपाली महिला यू–१९ राष्ट्रिय टोलीले चीनमा जारी बेल्ट एन्ड रोड कप च्याम्पियनसिप ट्वान्टी–२० क्रिकेटअन्तर्गत पहिलो जित हासिल गरेको छ । सोमबार थाइल्यान्डसँग २९ रनले पराजित नेपालले बुधबार घरेलु टोली चीनमाथि ८ विकेटको जित दर्ता गरेको हो । 

सांघाई कम्युनिटी स्पोर्ट्स क्लबको मैदानमा चीनले दिएको ३८ रनको लक्ष्य नेपालले ६.१ ओभरमा २ विकेट गुमाएर पूरा गरेको हो । ओपनर कविता कुँवरले ११ र राजमति ऐरीले ५ रन जोडे । लक्ष्मी साउद ९ र कप्तान डोली भट्ट ५ रनमा अविजित रहे । नेपालले ८ अतिरिक्त रन पाएको थियो ।

यसअघि टस जितेर ब्याटिङ गरेको चीनले १० ओभरमा सबै विकेट गुमायो । चीनका कुनै पनि खेलाडीले दोहोरो अंकमा रन बनाउन सकेनन् । कमजोर प्रतिस्पर्धीविरुद्ध हाबी भए पनि नेपाली बलरले अनुशासित बलिङ गरेनन् । चीनको पूरा टिमले जोडेको रनभन्दा धेरै नेपालले अतिरिक्त रन दिएको थियो ।

चीनका चार खेलाडी खाता नखोली आउट भए भने अरु चारले १–१ रनमात्र बनाउन सके । झाङ रोङ यूको खाता सर्वाधिक ८ रन थियो । उनले एक चौका प्रहार गरिन् । चीनको पूरै टिमले ब्याटबाट १८ रन जोडेको थियो भने १९ अतिरिक्त रन पायो । त्यसमध्ये ९ वाइड तथा ५–५ लेगबाइ र बाइमार्फत आएको थियो ।

नेपालबाट ईश्वरी विष्टले ३ विकेट लिइन् । उनले २ ओभरमा १ मेडनसहित ५ रन खर्चेर ३ विकेट लिएकी हुन् । खुशी डंगोल र कविता कुँवरले २–२ विकेट झारे । कप्तान डोली र कृतिका मरासिनीको नाममा १–१ विकेट रह्यो ।
प्रतियोगिताको आफ्नो तेस्रो खेलमा नेपालले बिहीबार म्यानमारसँग खेल्नेछ । स्पर्धामा ५ देशका टोली सहभागी छन् ।

प्रकाशित : कार्तिक २८, २०७६ ०७:५८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

फर्साटिकर विजयी

कान्तिपुर संवाददाता

रूपन्देही — फर्साटिकर युवा क्लबले ज्ञानबहादुर गुरुङ स्मृति चौथो सयपत्री गोल्डकप नकआउट फुटबलमा बुधबार जित हात पार्दै फाइनल तय गरेको छ । सेमिफाइनलमा फर्साटिकले आयोजक सयपत्री युवा क्लबलाई ३–१ गोलले हरायो । रामनगर खेलमैदानमा भएको खेलको छैटौं मिनेटमा कप्तान मुकेश कुँवरले गोल गर्दै फर्साटिकरलाई अग्रता दिलाए । सोही टिमबाट अमित लामाले ३४ औं मिनेटमा गोल थपे । 

खेलको ६६ औं मिनेटमा फर्साटिकरका टिकराज गुरुङ गोल थपेका थिए । त्यसअघि आयोजकका लागि ५५ औं मिनेटमा सरोज योन्जनले पेनाल्टीमार्फत गरेको गोल सान्त्वनामा परिणत भयो । फर्साटिकरका विश्व थापा म्यान अफ द म्याच भए । बिहीबार दोस्रो सेमिफाइनलमा सुनौलो संगम युवाले भैरव देशभक्त नवलपरासीसँग प्रतिस्पर्धा गर्नेछ ।

प्रकाशित : कार्तिक २८, २०७६ ०७:५७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×