हिमाल चुम्न ‘याक अट्याक’

मंगलबार प्रतियोगी मनाङतर्फ लागेका छन् । उनीहरूले ७ दिन साइकल कुदाउने छन् । चौथो दिन मनाङको मनाङ गाउँ (३,५४० मि.) मा एकदिन विश्राम गर्नेछन् । ९ दिने यात्राअन्तर्गत अन्तिम दिन म्याग्दीको तातोपानीदेखि पोखरासम्म साइकलमा उनीहरूको ग्रुपराइड र सवारी यात्रा हुनेछ ।

प्रतियोगितामा नेपालसहित बेलायत, फ्रान्स, इटाली, जर्मनी, अमेरिकालगायत १२ देशका २५ अन्तर्राष्ट्रिय साइकल रेसरले भाग लिएका छन् । यसमा नेपाली ५ जना छन् । दुई विदेशी महिला छन् । यसपल्ट दक्षिण एसियाली खेलकुदका कारण बन्द प्रशिक्षणमा रहेकाले नेपाली महिला भने सहभागी छैनन् । पहिलो दिन क्यानडाका कोरी वाल्लेस अगाडि छन् । निर्धारित दुरीलाई उनले १ घण्टा ४९ मिनेट ४० सेकेण्डमा पार गरे । लगातार तीन वर्ष ‘याक अट्याक’ जितेका उनले यसपालि पनि बाजी मार्ने दाबी गरे । ‘मैले ३ वर्ष लगातार जितेर पनि २४ घण्टा साइकल कुदाएर चक्रीय अन्नपूर्ण पार गरेको छु’ उनले भने, ‘मसँग यो यात्रामा रातदिन हिँडेको अनुभव छ ।’

नेपाली साइकल रेसर रोहन तामाङ १ घण्टा ५१ मिनेट ७ सेकेण्डबाट दोस्रामा छन् । उनी गत वर्ष दोस्रो भएका थिए । भारतीय नागरिक सुरज मलिक १ घण्टा ५३ मिनेट १६ सेकेण्डबाट तेस्रो र बेलायती नागरिक राइज भर्नर १ घण्टा ५४ मिनेट १० सेकेण्डबाट चौथो स्थानमा रहे ।

नेपालका रमेश आले १ घण्टा ४३ मिनेट १७ सेकेन्डबाट पाँचौं स्थानमा छन् । दोस्रो दिन चामे, तेस्रो दिन मनाङ, चौथो दिन मनाङ गाउँमा विश्राम हुने माउन्टेन बाइक कम्पनी (एमटीबी) का निर्देशक अजय पण्डित क्षेत्रीले बताए । उनका अनुसार पाचौं दिन थोराङ फेदी, छैटौं दिन पदमार्गमा विश्वकै अग्लो भञ्ज्याङ मानिएको थोराङला (५,४१६ मि.) पास गरेर कागबेनी, सातौं दिन कागबेनीवरपर, आठौं दिन कालोपानी पुगेर प्रतियोगिता सकिनेछ । उनीहरूको बास भने म्याग्दीको तातोपानीमा हुनेछ । प्रतियोगिताभर २२० किमि पार गर्नुपर्ने हुन्छ ।

११ औं संस्करणसम्म प्रतियोगितामा भाग लिएका र ५ पटकसम्म च्याम्पियन बनेका अजय पण्डित क्षेत्रीले गत वर्षदेखि भाग लिएका छैनन् । प्रतियोगिताको सफलताको कामना गर्दै बेंसीसहर नगरपालिकाका प्रमुख गुमानसिंह अर्यालले साइकल पर्यटनलाई विश्वले चिनेको दाबी गरे । ‘यस्ता अन्तर्राष्ट्रिय प्रतियोगिताले भिजिट नेपाल २०२० लाई सघाउ पुग्छ । यसलाई सफल बनाउन आवश्यक छ,’ उनले भने । आयोजक बेलायतस्थित माउन्टेन बाइकिङ वर्ल्ड वाइडका निर्देशक फिल इभान्सले प्रतियोगितामा ५ हजार अमेरिकी डलर पुरस्कार राखिएको बताए ।