१३ औं दक्षिण एसियाली खेलकुद  : पोखरा रंगशालाको आधा दुबो फेर्नुपर्ने

दुबो आयातमा भारतीय क्वारेन्टाइनको अड्चन
फुटबल हुनेमा अन्योल
दीपक परियार

(पोखरा) — आसन्न १३ औं दक्षिण एसियाली खेलकुद (साग) अघि सक्नुपर्ने पोखरा रंगशाला फुटबल मैदान निर्माणमा ढिलाइ भएको छ । भारतबाट ल्याउने प्रक्रिया लम्बिँदा दुबो बाटैमा सुकेकाले त्यही ल्याएर मैदानमा बिछ्याइँदा अहिले आधाभन्दा बढी फेर्नुपर्ने देखिएको छ । 

पोखरा रंगशालामा सागअन्तर्गत महिला फुटबल हुँदै छ । साग सुरु हुन २० दिन बाँकी रहँदा मैदानमा बिछ्याइएको दुबो बिग्रिएर फेर्नुपर्ने भएपछि महिला फुटबल हुने/नहुने अन्योल उत्पन्न भएको छ ।

भारतको कोलकोलाबाट झिकाइएको माटोसहित बर्मुडा दुबोको चपरी भारतीय क्वारेन्टाइनले भन्सारमा रोक्दा पोखरा ल्याउन ८ दिन लागेको थियो । तिनै दुबो पोखरा रंगशालामा बिछ्याइयो । फुटबल मैदानको ८७ हजार वर्गफिट क्षेत्रमा दुबोको चपरी बिछ्याइएको थियो । तर आधाभन्दा बढी दुबो उम्रिएन । नउम्रिएको दुबो झिकेर निर्माण कम्पनीले थप ६३ हजार वर्गफिट दुबो बिछ्याइसकेको छ । थप १२ हजार वर्गफिट दुबो मगाइएको छ ।

निर्माणको जिम्मा पाएको भारतको ग्रेट स्पोर्टस इन्फ्रा (जीएसआई) र नेपाली कम्पनी एमए कन्स्ट्रक्सन जेभीका प्रोजेक्ट म्यानेजर दीपक बरालले दुबोको ढुवानीमा समय लाग्दा बाटोमै बिग्रिएको स्वीकारे । ‘भारतले कानुनी रूपमा आफ्नो देशको माटो बाहिर पठाउन नदिँदो रहेछ,’ उनले भने, ‘दुबोको जरासँगै माटो मिसिएको भनेर क्वारेन्टाइनले हरेकपल्ट रोक्यो ।’

उनले कम्पनीको प्रयासले मात्रै दुबो भित्र्याउन सम्भव नभएपछि खेलकुदमन्त्री, सचिव र राष्ट्रिय खेलकुद परिषद् गुहारेको खुलासा गरे । ‘डेढ लाख वर्गफिट दुबो ल्याइसक्यौं, थप १२ हजार वर्गफिट आउँनै बाँकी छ,’ उनले भने, ‘भारतीय पक्षले नरोके ३ दिनभित्र आउँछ ।’ ताजा दुबो ल्याएर मरिसकेको दुबोलाई बदल्ने उनले जनाए । बिछ्याएको दुई सातामा फुटबल खेल्न मिल्ने उनी बताउँछन् ।

‘शनिबार आइपुग्ने भनेको सामान अझै आएको छैन । बाटोमै छ । रेलमा छ । यो कुरा सरकारलाई पनि भन्यौं,’ म्यानेजर बरालले भने, ‘सरकारकै प्रयासमा फास्ट ट्र्याकमा ल्याउन लागिएको छ ।’ सरकारले दिल्ली दूतावास र दूतावासले भारतीय महावाणिज्य दूतलाई भनेर चाँडै गर्दागर्दै पनि सामान आइनपुगेको उनले गुनासो गरे । इन्टरलक प्रविधिको ग्रान्ड स्ट्यान्ड जोड्न फ्रान्सबाट दुई प्राविधिक पोखरा आइसकेका छन् । २० हजार दर्शक क्षमताको प्यारापिटमध्ये १० हजार सिट जोड्ने कम्पनीको लक्ष्य छ । चारमध्ये दुई ब्लक जोड्न एक साता लाग्ने प्राविधिकले बताए ।

उनका अनुसार स्टेडियमको संरचनातर्फ ७० प्रतिशत काम सकिएको छ । १७ ट्वाइलेट ब्लकमध्ये १२ वटा बनेका छन् । चेन्जिङ रुम भने यसपल्ट मैदान नजिकैको बहुउद्देश्यीय कभर्डहलबाट काम चलाउन लागिएको छ । ट्र्याक एन्ड फिल्डमा आइतबारदेखि रबर दाना हाल्न सुरु गरएको छ । सिन्थेटिक ट्र्याकको सामान पोखरा आइसकेको छ । प्यारापिटका लागि ग्रान्ड स्ट्यान्डको फाउन्डेसन तयार भएको छ । फ्रान्सबाट ल्याइएको ग्रान्ड स्ट्यान्ड भारतको विशाखापट्टनम बन्दरगाहमै रहेको बरालले बताए । त्यहाँबाट वीरगन्ज भन्सार आइपुग्न समय लाग्ने उनले सुनाए ।

सागका प्रतियोगिता गर्न मिल्ने गरी मैदान सम्पन्न गर्ने निर्माण कम्पनीको दाबी छ । ‘अन्तर्राष्ट्रिय मान्यता पनि के छ भने मैदान ७० प्रतिशत ठिक छ भने खेल्न मिल्छ,’ कम्पनीका प्रोजेक्ट म्यानेजर बरालले भने, ‘इमान्दारीपूर्वक काम गर्दै गर्दा कहिलेकाहिँ त्रुटि हुन्छ । सबै दुबो हरियो नै चाहिन्छ भन्ने हो भने हामीले केही गर्न सक्दैनौं ।’

राखेपका सदस्य–सचिव रमेशकुमार सिलवालले भारतले रोक्दा दुबो र ग्रान्ड स्ट्यान्ड ल्याउन ढिलाइ भएको बताएका छन् । ‘विगतमा कहिल्यै दुबो ल्याइएको थिएन । दुबो ल्याउन पाउने, माटो ल्याउन नपाउने भनेर भारतीय साइडबाट रोकियो,’ आइतबार पोखरामा उनले भने, ‘पहिलोपल्ट नेपालको तर्फबाट रोकिएको थियो, हामीले त्यहीं दिन क्लियर गर्‍यौं । दोस्रोपल्ट भारतीय पक्षबाट रोकियो । त्यो पनि अनुरोध गरेर फास्ट ट्र्याकमा ल्याउने कुरा भएको छ । हाम्रो कारणले दुबो रोकिएको होइन ।’

दक्षिण एसियाली ओलम्पिक काउन्सिल र सेभ द मिसनको टोलीसहित पोखरा आएका सदस्यसचिवले ५ दिनभित्र ग्रान्ड स्ट्यान्डका सामान पोखरा उतार्ने दाबी गरे । ग्रान्ड स्ट्यान्ड छुटाउन भारतीय पक्षसम्म पत्राचार गरिसकेको उनले पत्रकार सम्मेलनमा बताए । ‘सामान ल्याउने कन्टेनर क्यूमा बस्नुपर्छ । क्यूमा नबसी फास्ट ट्र्याकमा ल्याउने व्यवस्था गरेका छौं,’ उनले भने, ‘पहिला पनि राखेपकै पहलमा दुबो छुटेको थियो ।’ दुबोको अवस्थाले गर्दा म्याच नरोकिने उनले स्पष्ट पारे । ‘पोखराको उद्घाटन गर्ने नै त्यहीं ठाउँमा हो,’ उनले भने, ‘सकिएन भने उद्घाटन हुँदैन ।’
ह्यान्डबलको सामान पनि भन्सारमा आइसकेको उनले बताए ।

पोखरामा हुने ब्याडमिन्टन, भारोत्तोलन, ट्रायथलन, आर्चरी, ह्यान्डबल, बिच भलिबल र महिला क्रिकेटको सम्पूर्ण तयारी मंसिर ५ सम्म सकिने सदस्य–सचिवले उल्लेख गरे ।

नेपाल ओलम्पिक कमिटीका अध्यक्ष जीवनराम श्रेष्ठले साग नहुने प्रश्नमा शनिबारदेखि पूर्णविराम लागेको बताए । ‘फेरि पनि खेल सर्ने हो कि भन्ने धेरैलाई शंका थियो,’ उनले भने, ‘साग ओलम्पिक काउन्सिलको बैठकपछि शतप्रतिशत निर्धारित समयमा हुने निश्चित छ ।’ उनले सहभागिताका लागि अझै प्रयास भइरहेकाले प्याराग्लाइडिङ नहुने निष्कर्षमा नपुग्न आग्रह गरे । प्याग्लाइडिङमा सहभागी हुने खेलाडीलाई दुईतर्फी हवाई भाडा, नि:शुल्क खानेबस्ने सुविधा र दर्ताका लागि नोभेम्बर २० सम्म समय दिएको उनले उल्लेख गरे ।

गत पुस १३ मा स्टेडियम बनाउन सम्झौता भएको थियो । फागुनमा शिलान्यास भएको स्टेडियम ६ महिनाभित्रै बनाउने भनिए पनि अन्तिम समयमा मात्रै कामको गति बढाइएको छ । स्टेडियमको लागत १ अर्ब २८ करोड रुपैयाँ छ ।



प्रकाशित : कार्तिक २६, २०७६ ०८:४८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

लिभरपुललाई ८ अंकको अग्रता

(एएफपी)

लन्डन — लिभरपुलले आइतबार राति इंग्लिस प्रिमियर लिगमा डिफेन्डिङ च्याम्पियन म्यानचेस्टर सिटीलाई ३–१ गोलले हराएको छ । अंकतालिकामा ८ अंकको अग्रता लिएको लिभरपुल एनफिल्डमा प्राप्त यो जितले ३० वर्षयता पहिलोपल्ट लिग उपाधि जित्ने बाटोमा अघि बढेको छ । 

सुरुआती १३ मिनेटभित्र फाबिन्हो र मोहम्मद सलाहले गोल गरेपछि लिभरपुलले ठोस अग्रता लिएको थियो । साडियो मानेले हेडबाट तेस्रो गोल गरे । अन्त्यतिर बर्नान्डो सिल्भाले एक गोल फर्काए । हारले सिटी चौथो स्थानमारह्यो । लिभरपुलसँग सिटी ९ अंकको दूरीमा छ । अब सिटीले लगातार तेस्रोपल्ट लिग उपाधिका लागि चुनौती पेस गर्न कडा मिहिनेत गर्नुपर्नेछ ।

खेलपछि लिभरपुल व्यवस्थापक योर्गन क्लोपले भने, ‘हामीलाई पक्कै ८ अंकको अग्रता प्राप्त भएको छ, तर हामीले तय गर्नुपर्ने यात्रा अझै लामो छ । नोभेम्बरमा को अगाडि रहन्छ, त्यसले खासै अर्थ राख्दैन । मेमा को अगाडि हुन्छ, त्यो मात्र निर्णायक हुन्छ ।’ चोटग्रस्त आयमेरिच लापोर्टको अनुपस्थितिमा पछिल्लो समय सिटीको डिफेन्स कमजोर रहेको छ । त्यसको झलक फेरि एकपल्ट लिभरपुलविरुद्धको खेलमा पनि देखियो ।

सुरुमै दुई गोल खाएपछि सिटीलाई खेलमा फर्कन गाह्रो भएको हो । रेफ्री र ‘भार’ का केही निर्णय सिटीको पक्षमा पनि रहेन । सिटी व्यवस्थापक पेप ग्वार्डिओलाले भने, ‘के भयो, यसबारे मलाई सोध्ने होइन । रेफ्रीलाई हो । म टिमको प्रदर्शनबारे मात्र बोल्न सक्न सक्छु र म यसमा गर्व गर्छु ।’

आइतबारै म्यानचेस्टर युनाइटेडले ब्राइटन एन्ड होभलाई ३–१ ले हरायो भने उल्भसले एस्टन भिल्लामाथि २–१ को जित निकाल्यो । युनाइटेडले यो जितपछि अंकतालिकाको सातौं स्थान कब्जा गरेको छ । दुई महिनायता क्लबको यो सबैभन्दा राम्रो स्थिति हो । प्रशिक्षक ओले गन सोल्सारले टिमको प्रदर्शन अहिलेसम्मकै सबैभन्दा राम्रो भएको दाबी गरे । उल्भस पनि जितपछि आठौं स्थानमा उक्लन सफल रह्यो ।

इटाली
मिलान– पाउलो डिबालाले गरेको निर्णायक गोल मदतमा युभेन्ट्सले इटालीको सिरी ‘ए’ मा आइतबार राति एसी मिलानलाई १–० ले हरायो । क्रिस्टियानो रोनाल्डोको स्थानमा मैदानमा छिरेका डिबालाको यो गोलपछि युभेन्ट्स अंकतालिकाको शीर्षस्थानमा उक्लन सफल भएको छ । टुरिनमा भएको खेलमा अर्जेन्टिनी खेलाडी डिबालाले ७७ औं मिनेटमा गोल गरे ।

त्यसको २० मिनेटअगाडि उनले रोनाल्डोलाई स्थानान्तरण गरेका थिए । डिफेन्डिङ च्याम्पियन युभेन्ट्सलाई एन्टोनियो कोन्टेको इन्टर मिलानमाथि एक अंकको अग्रता प्राप्त छ । एसी मिलानका लागि यो १२ खेलमा सातौं हार हो । टिम खराब प्रदर्शन गर्दै १४ औं स्थानमा छ । यो रेलिगेसन क्षेत्रबाट ४ अंकको दूरीमात्र हो । अर्को खेलमा पार्माले भने एएस रोमामाथि २–० को जित दर्ता गर्दै छैटौं स्थानमा आयो । अन्य खेलमा लाजियोले लेचेलाई ४–२ र कागलिरीले फियोरेन्टिनालाई ५–२ ले हराएर शीर्ष चारमा स्थान बनाएका छन् ।

स्पेन
म्याड्रिड– एट्लेटिको म्याड्रिडले आइतबार स्पेनी ला लिगामा स्पान्योललाई ३–१ ले हरायो । एट्लेटिको २४ अंकसहित तालिकाको तेस्रो स्थानमा कायम रह्यो । यो शीर्षस्थानमा रहेको बार्सिलोनासँग १ अंकको दूरी हो । बार्सिलोनासँग २५ अंक छ । रियल म्याड्रिड समान अंकसाथ दोस्रो स्थानमा छ । रियल बेटिसलाई उसकै घरमा २–१ ले पन्छाएर सेभिया चौथो स्थानमा रह्यो । सेभियाको पनि २४ अंक छ ।

प्रकाशित : कार्तिक २६, २०७६ ०८:४०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT