नेपालको प्रथम श्रेणीको क्रिकेटमा पुनरागमन, शरदबाहेक सबैको ‘डेब्यु’

एमसीसीको राम्रो सुरुआत
विनोद पाण्डे, तस्बिर : हेमन्त श्रेष्ठ

काठमाडौँ — चौध वर्षपछि प्रथम श्रेणीको क्रिकेटमा नेपाल फर्किएको छ । इंग्ल्यान्डको मेरिलेबोन क्रिकेट क्लब (एमसीसी)सँग खेल्दै नेपालले आधिकारिक तीनदिवसीय खेलमा पुनरागमन गरेको हो । नेपालले टस जितेपछि ब्याटिङमा आएको एमसीसीले भोजन समयसम्म २८ ओभर खेलेर १ विकेट गुमाई ८४ रन बनाएको छ ।

विल रोड्स र कप्तान टोम वेस्ट्ली क्रिजमा छन्। रोड्स ४४ र वेस्टली २५ रन बनाई खेलिरहेका छन्। सोमपाल कामीले बिली गोडलम्यान १० रनमा आउट गरे। गोडलम्यानले गरेको प्रहारलाई कभरमा ललितनारायण राजवंशीले दोस्रो प्रयासमा क्याच आउट गरे।

१० खेलाडीले बुधबार नेपालबाट प्रथम श्रेणीको क्रिकेटमा ‘डेब्यु’ गरे। शरद भेषावकरले नेपालले खेलेको सबै ४ प्रथम श्रेणीको क्रिकेटमा खेल्दै आएका छन्। नेपालले २००४ र २००५ मा गरी चार प्रथम श्रेणीको क्रिकेट खेलेको थियो। त्यसपछि नेपालले पहिलोपटक मान्यता प्राप्त तीनदिवसीय खेल खेलेको हो।

कप्तान ज्ञानेन्द्र मल्लसहित दीपेन्द्रसिंह ऐरी, राजु रिजाल, आरिफ शेख, विनोद भण्डारी, सोमपाल कामी, पवन सर्राफ, सन्दीप लामिछाने, ललितनारायण राजवंशी, करण केसीले नेपालबाट प्रथम श्रेणीको क्रिकेटमा पहिलो खेल खेलेका हुन्। सोमपाल कामीले २०१५ र २०१६ मा गरी श्रीलंकामा क्लब क्रिकेट खेल्दा साराकेन्स स्पोर्टस क्लबबाट दुई प्रथम श्रेणीको म्याच खेलेका थिए।

३ वर्षपछि क्यानको लोगो
नेपाली क्रिकेट टोलीले झन्डै ३ वर्षपछि क्यानको लोगो लगाएर मैदानमा उत्रिएको छ। नेपाल क्रिकेट संघ (क्यान)लाई अन्तर्राष्ट्रिय क्रिकेट परिषद् (आईसीसी)ले २०७३ को वैशाखमा निलम्बन गरेको थियो। तर विश्व क्रिकेटको सर्वोच्च निकायले नेपाली क्रिकेट टोलीलाई अन्तर्राष्ट्रिय क्रिकेटमा भने खेल्न दिइरहेको थियो।

नेपाली क्रिकेट टोलीले अन्तर्राष्ट्रिय प्रतियोगितामा खेलिरहे पनि निलम्बनका कारण क्यानको झन्डा लगाएको थिएनन्। यो अवधिमा राष्ट्रिय क्रिकेट टोलीले नेपालको झन्डामात्र लगाएर खेलिरहेको थियो।

एमसीसीसँगको खेलमा कप्तान ज्ञानेन्द्र मल्ल क्यानको लोगो समावेश सेतो शर्ट लगाएर टसका लागि गएका थिए। उनीसँगैं नेपाली टोली सोही किसिमको पोसाक लगाएर मैदानमा खेलिरहेका छन्।


प्रकाशित : कार्तिक २०, २०७६ ११:४९
ADVERTISEMENT
प्रतिक्रिया
पठाउनुहोस्

अदालतमा अहिले आलमसँग बयान लिइँदै   

शिव पुरी

रौतहट — पहिलो संविधानसभा निर्वाचनको अघिल्लो दिन २०६४ चैत २७ गते साँझ रौतहटको राजपुर फरदहवामा भएको बमकाण्डका मुख्या योजनाकार रहेको आरोपमा पक्राउ परेका कांग्रेस नेता एवं पूर्वमन्त्री मोहम्मद आफताब आलमलाई बयानका लागी दोश्रो दिन बुधबार अदालतमा उपस्थित गराइएको छ । 

मंगलबार बयान नसकिएपछि उनलाई पुनः बयानका लागि ल्याइएको हो । प्रहरीले कडा सुरक्षाबीच उनलाई जिल्ला अदालत भित्र प्रवेश गराएको छ । अहिले उनीसँग बयान लिने क्रम जारी छ ।
आलममाथि कर्तव्यज्यान, ज्यानमार्ने उद्योग र बिस्फोटक पदार्थ भण्डारनको अभियोग लगाएर जन्मकैद सजायसहित जिल्ला सरकारी वकिलको कार्यालयले सोमबार अभियोगपत्र दर्ता गराएपछि आलमसँग दोश्रो दिन पनि अदालतमा बयान लिईएको हो । मंगलबार बयान सक्ने भनिए पनि प्राविधिक कारणले ढिला भएको अदालतले जनाएको थियो ।

आज बयान सकेर थुनछेक बहस हुने जिल्ला न्यायाधिवक्ता खडिन्द्रराज कटवालले बताए । गएको असोज २६ गते देखी आलम प्रहरी हिरासतमा छन् । उनलाई जिल्ला अदालतका न्यायाधीश दिपक ढकालले बयान लिइरहेका छन् । आलमलाई प्रहरी हिरासतमा रहँदा प्रहरीको व्यवहार बारे पनि प्रश्न सोधिएको थियो । उनको स्वास्थ्य अवस्था बारे न्यायाधीश ढकालले सोधेका थिए । समय अभावका कारण बमबिस्फोट घटना बारे अदालतले आलमसँग हिजो केही सोध्न पाएको छैन ।
जिल्ला प्रहरीले सदरमुकाम गौरको सुरक्षा व्यवस्था कडा पारेको छ । संविधानसभा निर्वाचनको अघिल्लो दिन राजपुर फरदहवामा भएको बमबिस्फोटको घट्नामा आलमविरुद्ध तिनवटा कसुरमा प्रहरीले अनुसन्धान सकेर सरकारी वकिलको कार्यालयमा गएको शुक्रबार मिसिल बुझाएको थियो ।

बमबिस्फोटमा परी सरुअठाका त्रिलोकप्रताप सिंह र ओसि अख्तरलाई घाईते अवस्थामा लगेर जिउँदै चिम्निभट्टामा हालेर मारेको आरोपमा आलम, उनका भाई महताब आलम लगायत ११ जनालाई प्रतिवादी बनाइएको छ । भाइ महताब लगायत १० जना फरार छन् ।

घटनापछि पीडित परिवारले आलम लगायत ५ जना माथि किटानी जाहेरी दिएका थिए । उनीहरु सबैलाई जिल्ला सरकारी वकिलको कार्यालय गौरले उसै बेला मुद्दा नचल्ने निर्णय गरी जिम्मामा छाडेको थियो । त्यसबेला अदालत समक्ष मुद्दा पुग्न पाएको थिएन ।

घटनाको १२ वर्ष पछि सर्वोच्च अदालतको आदेशले राजपुर घट्नाको पुनः अनुसन्धान गर्न आदेश भए पछि प्रहरीले थप अनुसन्धान गर्दा ६ जनाको संलग्नता भेट्टाएको हो । बम बिस्फोट घटनाको १२ वर्ष पछि राजपुरको मुद्दा अदालतमा अभियोगपत्रसहित पुगेको हो ।

प्रकाशित : कार्तिक २०, २०७६ ११:४०
पूरा पढ्नुहोस्
ADVERTISEMENT
प्रतिक्रिया
पठाउनुहोस्