युनाइटेडलाई झट्का

एएफपी

म्यानचेस्टर — कमजोर प्रदर्शनबाट ब्युँतिने प्रयासमा रहेको म्यानचेस्टर युनाइटेड शनिबार इंग्लिस प्रिमियर लिगमा बर्नमाउथसँग १–० ले पराजित भएको छ । साउथ कोस्टको प्रतिकूल मौसममा जोस किङले मध्यान्तरको ठीकअघि गरेको गोल नै निर्णायक बनेको थियो ।

ओले गनर सोल्सायरको युनाइटेडले मार्चयता विपक्षी टोलीको मैदानमा गएर खेल जित्न सकेको थिएन । १० दिनअघि मात्र टोलीले यो तथ्यांक चिर्दै लगातार तीन खेल जित्नेक्रममा पार्टिजान बेलग्रेड, नर्विच र चेल्सीमा जित हात पारेको थियो । चेल्सीमाथि पाएको जितले टोलीलाई लिग कपको क्वाटरफाइनल पुर्‍याएको थियो । त्यसलाई सोल्सायरले यसलाई ‘टर्निङ प्वाइन्ट’ हुनसक्ने जनाएका थिए ।

युनाइटेडले यस सिजनमा आफ्नो क्षमताअनुरुप खेल्न सकिरहेको छैन । विपक्षी पोस्टमा आक्रामण गर्न नसक्नु शनिबारको खेल पनि साक्षी बन्यो । प्रिमियर लिगको ११ खेलमा युनाइटेडको यो चौथो हार हो । चर्को हावाहुरी र वर्षाबीच दुवै टोली जम्न नसकिरहेको अवस्थामा युनाइटेडले केही राम्रो सुरुआत गरेको थियो । डानियल जेम्सले लामो प्रहार बाहिर हान्न पुगे भने एन्थोनी मार्सियलको पेनाल्टी अपिल पनि सुनुवाइ भएन ।

मध्यान्तरको अन्तिम सिठी फुक्नुअघि किङले बर्नमाउथलाई अग्रता दिलाएका थिए । किङ तिनै खेलाडी हुन्, जसको खेलजीवन इंग्ल्यान्डमा युनाइटेडबाटै सुरु भएको थियो । किङलाई युनाइटेडमा तत्कालीन व्यवस्थापक सर एलेक्स फर्गुसनसँग पुर्‍याउने अरु कोही नभएर यिनै सोल्सायर थिए । किङले नै आफ्नो पूर्व क्लबलाई शनिबार राम्रो गोल गरी दुखी तुल्याए । युनाइटेडका रक्षक भिक्टोर लिन्डेलोफ र आरोन विसाकाको माझ बल आफ्नो नियन्त्रणमा लिँदै उनले एक्रोब्याटिक प्रहारमा गोल गरेका थिए ।

युनाइटेडले दोस्रो हाफमा बल धेरै समय आफ्नो पकडमा राखे पनि खेलमा भने फर्किन सकेन । मार्सियल र मार्कस रासफोर्डलाई आक्रामण उतारे पनि दुवै फितलो देखिएका थिए ।

बर्नमाउथले लगातार तेस्रो खेलमा कुनै गोल खर्चिएन । युनाइटेडमाथि आफ्नो इतिहासमै बर्नमाउथले तेस्रो जित हात पारेको हो । युनाइटेडलाई उछिन्दै बर्नमाउथ छैटौं स्थानमा उक्लिएको छ । बर्नमाउथसँग १६ अंक छ । युनाइटेड १३ अंकसहित आठौं स्थानमा छ ।

प्रकाशित : कार्तिक १६, २०७६ २१:४१
ADVERTISEMENT
प्रतिक्रिया
पठाउनुहोस्

ब्राजिली राष्ट्रपतिको घोषणा : मुख्य अखबारको ग्राहक बन्दिनँ

एएफपी

ब्रासिलिया — ब्राजिली राष्ट्रपति जेयर बोल्सोनारोले ब्राजिलको प्रमुख अखबारमध्ये एक रहेको ‘फोल्हा’ को ग्राहक नबन्ने घोषणा गरेका छन् । उनले आफ्ना नीतिमाथि मुलुकको प्रमुख सञ्चारमाध्यमले निरन्तर आलोचना गरेको भन्दै आक्रोशित हुँदै उक्त घोषणा गरेका हुन् ।

राष्ट्रपति बोल्सोनारोले फेसबुकबाट प्रत्यक्ष प्रसारित साप्ताहिक सम्बोधन गर्दै भनेका छन्, ‘आज मैले मेरो कार्यकारी शक्तिको प्रयोग गरी ‘फोल्हा’ अखबारको ग्राहक रद्द गरेको छु । फोल्हा पत्रिका पढ्न चाहनेले ब्रासिलियाका बस स्टेसनमा रोकिएर किन्न सक्नेछन् ।’

अमेरिकी राष्ट्रपति डोनाल्ड ट्रम्पले पनि गत साता अमेरिकाका दुईवटा ठूला अखबार ‘दी न्युयोर्क टाइम्स’ र ‘वासिङ्टन पोस्ट’ को ग्राहक नबन्ने घोषणा गरेका थिए । राष्ट्रपति बोल्सोनारो पनि अमेरिकी राष्ट्रपति ट्रम्पकै शैली पछ्याउन रुचाउ छन् ।

उनले फोल्हा, टीभी ग्लोबो र भेजा म्यागाजिनसमेतका ब्राजिली सञ्चारमाध्यममाथि राष्ट्रपति चुनावी अभियानदेखि गत जनवरीमा राष्ट्रपतिको शपथ लिएयता निरन्तर आलोचना गर्दै आएका छन् । ‘हामीले यस्ता अखबारका लागि बढी पैसा खर्च गर्नु आवश्यक छैन । फोल्हामा जसले विज्ञापन गरिरहेको छ सचेत रहनू,’ बोल्सोनारोले भनेका छन् ।

‘फोल्हा’ ले एक विज्ञप्ति प्रकाशन गरी बोल्सोनारोको विभेदकारी कदमप्रति खेद व्यक्त गरेको छ । उसले सरकारका कामकारबाहीमाथि निरन्तर निगरानी राख्ने र गैरपक्षधर पत्रकारितालाई निरन्तरता दिने जनाएको छ ।

प्रकाशित : कार्तिक १६, २०७६ २१:३३
पूरा पढ्नुहोस्
प्रतिक्रिया
पठाउनुहोस्
ADVERTISEMENT