पूर्णविरामतर्फ धोनी युग- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

पूर्णविरामतर्फ धोनी युग

एएफपी

नयाँ दिल्ली — भारतीय प्रमुख छनोटकर्ताले दिएको संकेत मान्ने हो भने महेन्द्रसिंह धोनीको लोभलाग्दो अन्तर्राष्ट्रिय खेलजीवनमा पूर्णविराम लाग्दैछ  । ती छनोटकर्ताले बिहीबार भनेका छन्, ‘भारतीय टिम अब अगाडि बढ्ने छ  । टोलीको नीति हुनेछ, नयाँ युवा खेलाडीलाई मौका दिने ।’

पूर्व कप्तान तथा एकदिवसीय क्रिकेटका विशेषज्ञ धोनीले जुलाईको विश्वकपपछि भारतका लागि खेलेका छैनन् । धेरैको अनुमान के छ भने ३८ वर्षीय धोनीले ढिलो चाँडै संन्यास लिनेछन् । भारतले अब बंगलादेशविरुद्ध अर्को महिना तीन ट्वान्टी–२० को शृंखला खेल्दै छ । त्यसका लागि घोषित टिममा धोनी छैनन् ।

दक्षिण अफ्रिकाविरुद्ध हालै टुंगेको शृंखलामा पनि उनको कुनै भूमिका रहेन । भारतीय टिमको छनोट कमिटीका प्रमुख एमएसके प्रसादले टिमको विकेटकिपर भूमिकामा नयाँ खेलाडीलाई नै मौका दिने नीति भएको बताए । उनको स्पष्ट संकेत ऋषभ पन्ततर्फ थियो । ‘विश्वकप पछि हाम्रो सम्पूर्ण ध्यान ऋषभ पन्तमै केन्द्रित छ,’ प्रसादले पीटीआईलाई बताएका छन् ।

उनले यो धोनीको भविष्यलाई लिएर सोधिएको प्रश्नमा दिएका थिए । उनले भने, ‘विश्वकपपछि हामी अगाडि बढ्न चाहन्छौं । हाम्रो ध्यान युवा खेलाडीमा हुनेछ र तिनलाई टिममा स्थापित गर्ने हुनेछ ।’ सन् २०११ को विश्वकपमा नेतृत्व गर्दै भारतलाई विश्वकप दिलाएपछि धोनी नयाँ नायक साबित भएका थिए ।

धोनीले सन् २०१४ मै टेस्ट क्रिकेटबाट संन्यास लिएका थिए । ९० खेलमा ४ हजार ८ सय ७६ रन बनाएका थिए । यिनै धोनीले एकदिवसीय क्रिकेटमा भने ३ सय ५० खेल खेलेर १० हजार ७ सय ७३ रन बनाएका छन् । पछिल्लो विश्वकपमा उनले राम्रो गर्न सकेनन् र भारत सेमिफाइनलबाटै बाहिरिएको थियो । ‘कप्तान कुल’ को उपनाम पाएका धोनीले भारतका लागि तीनै ढाँचाको क्रिकेटमा नेतृत्व गरे ।

उनको आगमनले टिमको अन्तिम समयसम्म संघर्ष गर्ने बानी बसेको थियो । तर भारतीय क्रिकेट प्रमुखमा सौरभ गांगुलीको उदय र टिममा विराट कोहलीको पकडपछि धोनीको संन्यास उनले घोषणा गर्नमात्र बाँकी रहेको स्थिति बनेको छ । ‘अब आफ्नो भविष्यबारे धोनीले मात्र अन्तिम निर्णय गर्न सक्छन्,’ प्रसादले भने, ‘हामीले भारतीय क्रिकेटको भविष्यलाई लिएर खास योजना बनाएका छौं र त्यसैअनुसार टिम बनाउने छौं ।’

प्रकाशित : कार्तिक १०, २०७६ ०९:४८
प्रतिक्रिया
पठाउनुहोस्

सिलेन र अंकिता उत्कृष्ट बक्सर

कान्तिपुर संवाददाता

मकवानपुर — दसौं जिल्लास्तरीय पुरुष तथा महिला बक्सिङ प्रतियोगितामा सिलेन वाइबा र अंकिता उत्कृष्ट बक्सर भएका छन्  । शनिबार सम्पन्न प्रतियोगितामा पुरुषतर्फ सिलेन र महिलातर्फ अंकिता उत्कृष्ट बक्सरबाट सम्मानित भएका हुन्  ।

पिप्ले युवा क्लबद्वारा आयोजित प्रतियोगितामा पुरुषतर्फ १० र महिलातर्फ दुई तौल समूहमा प्रतिस्पर्धा भएको थियो ।

पुरुषतर्फ ६४ केजीमा बुद्ध लामा, ६० केजीमा कृष्ण भोम्जन, ५६ केजीमा सीताराम काफ्ले, ५२ केजीमा महेन्द्र राई, ४९ केजीमा विक्रम राई, ४० केजीमा स्वीकार कुवँर, ३५ केजीमा झलक स्याङ्तान, ३० केजीमा सिलेन वाइबा, २५ केजीमा सुदीन चौलागाईं तथा २० केजी तौलमा विकल्प गौतमले स्वर्ण पदक जितेका थिए ।

महिलातर्फ ५२ केजी तौलमा अंकिता श्रेष्ठ र ४९ केजी तौल समूहमा पूर्णिमा भण्डारीले स्वर्ण जितेका थिए । विजेतालाई नगदसहित पुरस्कृत गरिएको थियो ।

प्रकाशित : कार्तिक १०, २०७६ ०९:४८
पूरा पढ्नुहोस्
प्रतिक्रिया
पठाउनुहोस्
×