डब्लूसीएल फाइनल आज : रुबिना र इन्दुको उपाधि होड

कुशल तिमल्सिना

काठमाडौँ — महिला क्रिकेटको पहिलो फ्रेन्चाइज वुमन्स च्याम्पियन्स लिग (डब्लूसीएल) जित्ने लक्ष्यसहित चितवन राइनोज र क्याट क्विन्स काठमाडौं बिहीबार फाइनलमा प्रतिस्पर्धा गर्दै छन् । ट्वान्टी–२० संरचनामा हुने डब्लूसीएलमा राष्ट्रिय टिमको नेतृत्व गरिसकेकी काठमाडौंकी कप्तान रुबिना क्षेत्रीलाई चितवनकी इन्दु बर्माले पुन: टक्कर दिँदैछिन् । यी दुई टिमबीच डब्लूसीएल उद्घाटन खेल भएको हो । 

चितवन शतप्रतिशत जित निकाल्दै उपाधि दाबेदार हुँदा काठमाडौंले चितवनसँग खेल गुमाएको हो । चितवन शीर्षस्थानमा रहेर सोझै फाइनल पुग्यो । काठमाडौंले क्वालिफायरमा विराटनगर टाइटन्समाथि जित रच्दै चितवनसँग पुन: भेट पक्का गरेको हो । फ्रेन्चाइज क्रिकेटको अन्तर्राष्ट्रिय अभ्यास र प्रतियोगिताको प्रचार उद्देश्यले आयोजक क्विन्स इभेन्ट म्यानेजमेन्टले डब्लूसीएल ट्रफीसहित फाइनलिस्ट कप्तानद्वयलाई चन्द्रागिरिमा लगेर प्रस्तुत गरेको थियो । जहाँ दुवै कप्तान फाइनल जितप्रति आत्मविश्वास देखिएका थिए ।

चितवनकी इन्दुले जितयात्रा उपाधिसहित टुंग्याउने योजना सुनाइन् । काठमाडौंकी रुबिनाले सुरुआती हारबाट पाठ सिक्दै सुखद अन्त्यको प्रयास गर्ने बताइन् ।

‘फाइनललाई हामी निकै उत्साही छौं । सबै खेल जितेर आएका छौं । भोलिको फाइनलमा जितलाई निरन्तर गर्ने प्रयास गर्छौं,’ कप्तान इन्दुले भनिन्, ‘पहिलो खेलमा हामीले हराए पनि काठमाडौं त्यसपछि चार खेलमा उत्कृष्ट प्रदर्शन गरेरै फाइनल आइपुगेको हो । दुवैको आत्मविश्वास उच्च छ । नतिजा जसले राम्रो क्रिकेट खेल्न सक्छ त्यसैले जित्नेछ ।’

इन्दु आफ्नो व्यक्तिगत प्रदर्शनबाट भने सन्तुष्ट देखिइनन् । फाइनलमा एउटा राम्रो इनिङ्सका लागि प्रयास गर्ने उनको भनाइ छ । ‘व्यक्तिगत रूपमा सुरुका खेलमा राम्रो गर्न सकिनँ । पछिल्लो दुई खेलमा ठीकै गरेजस्तो लाग्छ । व्यक्तिगतभन्दा पनि हामी सामूहिक प्रयासबाट फाइनल पुगेका छौं । फाइनलमा सबैले आफ्नो उत्कृष्ट प्रदर्शन दिने प्रयासमा हुनेछन्,’ उनले थपिन् ।

इन्दुले प्रतियोगिताको चार इनिङ्समा ५२ रन बटुलेकी छन् । पोखरा पल्टनसँग २४ रन र विराटनगरसँग अविजित १७ रन बनाएकी उनी काठमाडौंसँग १ र ललितपुर फाल्कोन्ससँग १० रनमै पवेलियन फर्किएकी थिइन् ।

पछिल्ला चार खेलमा चितवनको सन्तुलित प्रदर्शन छ । ऋतु कनौजिया, काजल श्रेष्ठ र कञ्चन श्रेष्ठ ब्याटिङमा जिम्मेवार देखिएका छन् । राष्ट्रिय टोलीकी ओपनर काजलले एक अर्धशतकसहित उत्कृष्ट इनिङ्स खेलेकी छन् । काठमाडौंले सकारात्मक नतिजाका लागि काजललाई रोक्नु अनिवार्य हुनेछ । ४ खेलमा १ सय १३ रन जोडेकी काजल सर्वाधिक रनकर्ताको सूचीमा तेस्रो नम्बरमा छन् । मध्यक्रममा ऋतुले जिम्मेवारी बहन गर्नेछिन् । उनलाई कप्तान इन्दु, सुमन खतिवडा, प्रिया चौधरीसहितको सन्तुलित ब्याटिङलाइनले साथ दिनेछ ।

चितवनको बलिङमा कविता गौतमको प्रदर्शन उत्कृष्ट छ । ४ खेलमा १० विकेट लिएकी उनी धेरै विकेट लिने बलर सूचीमा अगाडि छिन् । ४ खेलमा १५ ओभर बलिङ गर्दा १ मेडनसहित ५३ रन खर्चिएकी छन् । यू–१९ टिमकी उपकप्तानसमेत रहेकी दायाँहाते उनले पछिल्लो खेलमा विराटनगरविरुद्ध ३ ओभरमा ५ रन खर्चेर ३ विकेट झारेकी थिइन् । सरस्वती चौधरी, रेखा रावल, सुमन र ऋतुले उनलाई साथ दिनेछन् ।

चितवनसँग हारेपछि काठमाडौंले त्यसपछि चारै खेलमा सानदार जित निकाल्दा कप्तान रुबिनाकै प्रदर्शन निर्णायक थियो । ब्याटिङतर्फ ५ इनिङ्समा २ अर्धशतकसहित २ सय १२ रन बटुलेकी उनले क्वालिफायरमा विराटनगरसँग उत्कृष्ट बलिङ प्रदर्शन गरिन् । ४ ओभरमा १ मेडनसहित ४ रन खर्चेर ४ विकेट लिएकी रुबिनाको खातामा समग्रमा ५ विकेट छ । पोखरा पल्टनविरुद्ध प्रहार गरेको अविजित ८३ रन पनि प्रतियोगिताको व्यक्तिगत ठूलो स्कोर हो । तेस्रो खेलमा रोमा थापाले अविजित ५३ रन बनाउनुबाहेक काठमाडौंका अन्य खेलाडी अहिलेसम्म आ–आफ्नो जिम्मेवारी बहन गर्न असमर्थ देखिएका छन् ।

कप्तान रुबिनाले फाइनलमा टिमका हरेक सदस्यले आफ्नो जिम्मेवारी सम्हालेको हेर्ने चाहन्छिन् । उनले भनिन्, ‘राष्ट्रिय टोलीको कप्तान भइसकेको नाताले पनि मैले उदाहरणीय प्रदर्शन गर्नुपर्छ । मबाहेक हामीसँग धेरै प्रतिभा छन्, जसले हरेक खेलमा आफैं जिम्मेवारी लिन सक्छन् । उनीहरूले आफ्नो क्षमताअनुसार प्रदर्शन कहिले गर्लान् भनेर प्रतीक्षा गरिरहेको छु । म के चाहन्छु भने रुबिनाभन्दा पनि अरु खेलाडीले राम्रो प्रदर्शन गरोस् । रुबिनाको स्थानमा अन्य खेलाडीको प्रचार हुँदा म खुसी हुनेछु ।’

पहिलो खेलमा पराजित टिमसँग फाइनल खेल्दा आफ्नो कमजोरी सुधार्ने अवसर रहने रुबिनाले बताइन् । ‘हारपछि टिमको कमब्याक निकै राम्रो छ । हामीले आफ्नो आत्मविश्वास बढाएका छौं र विपक्षीमाथि दबाब कायम गरेका छौं,’ उनले थपिन्, ‘फाइनल प्रतिस्पर्धात्मक हुने अपेक्षा गरेको छु । दुवै टिम राम्रो छ र हामी राम्रो खेल प्रदर्शन गर्ने प्रयास गर्नेछौं । पहिलोपल्ट आयोजित प्रतियोगिताको ट्रफी उचाल्न पायौं भने हामी धेरै खुसी हुनेछौं ।’

लामो समयदेखि स्वदेशमै फ्रेन्चाइज क्रिकेटको सपना देखेकी रुबिनाले सबैको साथले देशमा महिला क्रिकेटको माहोल बढेको र यसले विस्तारमा सहयोग पुग्ने तर्क गरिन् । आसन्न दक्षिण एसियाली खेलकुदका लागि पनि महिला खेलाडीलाई आत्मविश्वास र खेल अनुभव हासिल गर्ने अवसरको रूपमा डब्लूसीएललाई पाएको रुबिनाको भनाइ थियो । चितवनकी कप्तान इन्दुले पनि नयाँ र नेपथ्यमा रहेका प्रतिभाले अवसर पाएकाले प्रतियोगिताबाट महिला क्रिकेटको दीर्घकालीन विकासमा सहयोग पुग्ने अपेक्षा गरिन् ।

प्रकाशित : कार्तिक ७, २०७६ ०८:३६
ADVERTISEMENT
प्रतिक्रिया
पठाउनुहोस्
ADVERTISEMENT

अन्नपूर्णमा विश्वका अल्ट्रा खेलाडीहरू

कुशल तिमल्सिना

काठमाडौँ — अल्ट्रा म्याराथनको विश्व सिरिजअन्तर्गत फाइनलका लागि अहिले विश्वभरका उत्कृष्ट अल्ट्रा धावकहरू नेपालमा आएका छन् । खेल सामाग्री उत्पादक कम्पनी सालोमोनको आयोजनामा हुने गोल्डेन ट्रायल वर्ल्ड सिरिजको अन्तिम चरणको दौड शुक्रबार कास्कीको अन्नपूर्ण ट्रायलमा हुँदै छ ।

विश्व सिरिजको स्थानीय आयोजक अल्ट्रा रनिङ नेपालले सम्पूर्ण धावकलाई काठमाडौंमा स्वागतसहित पोखराका लागि बिदाइ गरेको छ । सन् २०१९ को जुन महिनादेखि सुरु यो सिरिजको अघिल्ला चरणको नतिजाका आधारमा शीर्ष १० वरीयताभित्रका महिला र पुरुष खेलाडीलाई आयोजक सालोमोनकै खर्चमा सहभागी गराइएको हो । त्यसबाहेक ३ सय हाराहारीमा सहभागिता अनुमान गरिएको स्थानीय आयोजक नेपालकी अध्यक्ष तथा अल्ट्रा धाविका मीरा राईले बताइन् ।

‘गोल्डेन वर्ल्ड सिरिजअन्तर्गत फाइनल रेस ४२ किलोमिटरको हुनेछ, त्यसबाहेक हामीले शनिबार अन्नपूर्ण अल्ट्रा रनिङको रूपमा ५५ किलोमिटर र १०० किलोमिटरको छुट्टै रेस आयोजना गर्दैछौं । त्यसमा नेपाली खेलाडीको सहभागिता रहनेछ,’ धाविका मीराले भनिन् । सालोमोनको टिममा भए पनि इन्ज्यूरीका कारण मीराले यस सिरिजमा सहभागिता भाग लिएकी छैनन् । अल्ट्रा दौडतर्फ नेपालमा हुन लागेको यो पहिलो ठूलो प्रतियोगिता हो ।

यो सिरिजअन्तर्गत पहिलो प्रतिस्पर्धा जुन २ मा स्पेनमा भएको थियो । जुन ३० म फ्रान्स, जुलाई २१ मा इटाली, अगस्ट ११ मा स्विट्जरल्यान्ड, अगस्ट २५ मा अमेरिका र सेप्टेम्बर २१ मा स्कटल्यान्डमा प्रतियोगिता आयोजना भएको थियो । फाइनलमा स्थान बनाउन अघिल्ला ६ मध्ये कम्तीमा ३ स्पर्धामा सहभागिता जनाउनुपर्ने नियम छ ।

समुद्र सतहदेखि छोटो दूरीमै कम र बढी उचाइका ठाउँहरूको सन्तुलनले अल्ट्रा रनरका लागि नेपाली डाँडापाखा उत्कृष्ट गन्तव्यको रूपमा रहेको छ । सालोमोनले यसैलाई मध्यनजर गरी विश्व सिरिजको दोस्रो संस्करणको फाइनल नेपालमा आयोजना गरेको हो । अन्नपूर्ण म्याराथनको नाममा अघिल्लो वर्ष पनि दौड भएको थियो । त्यसको उपाधि जुम्लाका दुर्गाबहादुर बुढाले जितेका थिए ।

शुक्रबार कास्कीको माछापुच्छ्रे गाउँपालिकास्थित १२ सय मिटर उचाइमा रहेको लुम्रेबाट सुरु हुने दौड ३७ सय ६० मिटर उचाइसम्म पुगेर १ हजार ७ सय मिटर उचाइमा अवस्थित धम्पुसमा समाप्त हुनेछ । ‘सालोमोनको सहयोगमा हामीले सम्पूर्ण व्यवस्थापन गरेका छौं, यसलाई भ्रमण वर्ष २०२० को प्रचारका लागि ‘भिजिट नेपाल २०२०’ सँग सहकार्य गरेका छौं र नेपाल माउन्टेनर्स एसोसिएसनको पनि साथ छ,’ मीराले भनिन् ।

संसारभरका सर्वोत्कृष्ट धावक शुक्रबार कास्कीमा करिब ६ महिना लामो सिरिजको सुखद अन्त्यको पर्खाइमा हुनेछन् । तीमध्ये कतिपय भेट्रान त कति युवा स्टार छन् । महिलातर्फ उपाधिका लागि ३ जनाको प्रतिस्पर्धा हुने सम्भावना छ । तर हाइअल्टिच्युड उनीहरूका लागि सबैभन्दा ठूलो चुनौती हुनेछ ।

अघिल्लो संस्करणमा जस्तै यस वर्ष पनि ११ देशबाट महिला र पुरुषमा १०–१० उत्कृष्ट खेलाडी सिरिजअन्तर्गत प्राप्त गोल्डेन अंकका आधारमा चयन गरिएको हो । ३ सयभन्दा बढी गोल्डेन अंक पाएका स्पेनिस धावक किलियन होर्नेट पुरुषतर्फ र समान ३ सयभन्दा बढी अंक पाएकी स्विस धाविका जुडिथ वेडर महिलातर्फ शीर्षस्थानमा छन् । जुडिथसँगै अर्की स्विस धाविका मोउडी माथिज र न्युजिल्यान्डकी रथ क्रफ्टबीच प्रतिस्पर्धा हुने अनुमान छ ।

पुरुषतर्फ भने टिम सालोमोनका स्पेनिस धावक किलियन उपाधिका लागि सबैभन्दा बलिया दाबेदार हुन् । नेपालमा हुन लागेको स्पर्धा किलियनका लागि अर्को फाइदा पनि छ । उनी नेपालको हाइअल्टिच्युडसँग राम्ररी परिचित छन् । उनले विश्वको सर्वोच्च शिखर सगरमाथाको दुईपल्ट आरोहण गरिसकेका छन् । हालैमात्र पारिवारिक छुट्टीमा नेपाल आएर ८ हजार मिटर उचाइको खुम्बु क्षेत्रसम्म पुगेका थिए । उनी यस सिरिजअन्तर्गत आफू सहभागी अघिल्ला तीनै स्पर्धाका विजेता हुन् ।

‘सन् २०१२ देखि नै मैले वर्षमा दुई पटकसम्म नेपालको भ्रमण गरेको छु, अहिले म दसौंपल्ट नेपाल आएको हुँ । विभिन्न स्थानको ट्रेकिङ र सगरमाथाको चुचुरोसम्म पुगिसकेकाले म यहाँको मौसमबारे राम्रो जानकारी राख्न सक्छु । खुम्बु क्षेत्र, लामटाङ पुगेको छु,’ कालियनले कान्तिपुरसँग भने ।

उनले अन्नपूर्ण क्षेत्रमा पहिलोपल्ट जान लागेको बताए । अन्नपूर्ण म्याराथनमा फाइनल तयारीमा रहेका किलियनले थपे, ‘नेपालमा मैले पहिलोपल्ट प्रतिस्पर्धात्मक दौडमा सहभागिता जनाउँदै छु । हाइअल्टिच्युडमा दौडनु मेरा लागि पहिलो अनुभव हो । अन्नपूर्ण क्षेत्र निकै नै रोमान्चक छ र नयाँ स्थानमा दौडने मेरो सोख पनि पूरा हुँदै छ । खासमा मजस्ता युरोपियन धावकका लागि नेपालको अल्टिच्युडले निकै कठिन बनाउँछ तर मेरो प्रयास जित्नका लागि हुनेछ ।’ यो स्पर्धा जितेको खण्डमा किलियनले सन् २०१९ मा सहभागिता जनाएको चारै रेसमा सफलता हासिल गर्नेछन् ।

टपटेन अल्ट्रा खेलाडी
पुरुष
किलियन होर्नेट (स्पेन)
नादिर मागुएट (इटाली)
डेभिड माग्निनी (इटाली)
बार्टोमिज प्रेवोजेस्की (पोल्यान्ड)
स्टेन एन्गरमड–भिच (नर्वे)
थिवाउट बारोनियन (फ्रान्स)
सेज कानाडाय (अमेरिका)
आर्टिज एजिया (स्पेन)
रेमी बोन्नेट, (स्विट्जरल्यान्ड)
मार्क लुन्स्टेइन (स्विट्जरल्यान्ड)

महिला
जुडिथ वेदर (स्विट्जरल्यान्ड)
माउड मिथ (स्विट्जरल्यान्ड)
रुथ क्रफ्ट (न्युजिल्यान्ड)
एली एन्नी भर्गस्डल (नर्वे)
सिल्भिया राम्पाज्जो (इटाली)
इलिसा डेस्को (इटाली)
मेगान म्याक्केन्जी (दक्षिण अफ्रिका)
यङभिल्ड कास्पर्सेन (नर्वे)
अमान्दिन फेर्राटो (फ्रान्स)
होली पेग (बेलायत)

प्रकाशित : कार्तिक ६, २०७६ ०८:२५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT