गौतमबुद्ध क्रिकेट रंगशालाको डिपिआर तयार, लागत २ अर्ब ६० करोड

रमेशकुमार पौडेल

चितवन — धुर्मुस सुन्तली फाउण्डेशनले चितवनको रामपुरमा बनाउने प्रस्तावित गौतमबुद्ध अन्तर्राष्ट्रिय बहुउद्देश्यीय क्रिकेट रंगशालाको विस्तृत परियोजना प्रतिवेदन (डिपिआर) तयार भएको छ । भरतपुर महानगरपालिका कार्यालयमा बुधबार उक्त डिपिआर प्रस्तुत गरेर सुझाव लिने काम भएको छ । केही परिमार्जन भए पनि डिपिआर निर्माण सकिएको फाउण्डेशनका अध्यक्ष कलाकार सिताराम कट्टेल धुर्मुसले बताए ।


कृषि तथा वन विज्ञान विश्वविद्यालयले भोगचलन गर्दै आएको रामपुरको २२ विघा १७ कट्ठा जमिनमा रंगशाला बन्दै छ। विश्वविद्यालयलाई सट्टाभर्ना दिने गरेर भरतपुर महानगरले उक्त जग्गा प्राप्त गरेको हो। धुर्मुस सुन्तली फाउण्डेशनले जनस्तरमा सहयोग अभियान सञ्चालन गरेर रंगशाला निर्माण गर्ने छन्। रंगशाला भरतपुर महानगरपालिकालाई हस्तान्तरण हुने छ।

रंगशाला निर्माणका सम्बन्धमा फाउण्डेशन र भरतपुर महानगरपालिकाबीच गएको माघ १६ गते सहमतिपत्रमा हस्ताक्षर भएको थियो। त्यो बेला ६ महिनाभित्र डिपिआर बनाउने र दुई वर्षभित्र निर्माण पुरा गर्ने घोषणा भएको थियो। तर सहमतिपत्रमा हस्ताक्षर भएको नौ महिना २० दिनपछि डिपिआर सार्वजनिक गरिएको छ। रंगशाला निर्माणका लागि चाहिने सहयोग पनि सोचे जस्तो जुटेको छैन। यो बीचमा बार भत्काउने जस्ता काम पनि भए।

डिपिआर अनुसार ३० हजार दर्शक अटाउने क्षमताको रंगशाला निर्माणका लागि भ्याट बाहेक दुई अर्ब ६० करोड रुपैयाँ खर्च हुने अनुमान छ। क्रिकेट मैदान ७० मिटर रेडियसको हुने छ। पाँचवटा पिच हुने छन्। क्रिएटिभ डिजाइन आर्किटेक प्रालिले डिपिआर तयार पारेको हो। भारतीय र अमेरिकन परामर्श कम्पनीको पनि सहयोग लिएको प्रालिका शेरबहादुर केसीले जानकारी दिए।

कमलको फुलको आकार अनुरुप मल्लकालीन नेपाली वास्तुकलाको मिश्रण रंगशालामा देख्न पाइने छ। अन्तर्राष्ट्रिय क्रिकेट आउन्सिल (आईसीसी)को प्रवधान अनुरुपको रंगशालाको डिजाइन गरेको केसीले बताए।
सन् २०१७ पछि बनेका र बन्दै गरेका भारतका क्रिकेट स्टेडियमहरु हेरेर र अध्ययन गरेर डिजाइन गरेको उनको भनाइ छ। सबै खाले संरचना र डिजाइनको बारेमा अमेरिकाको मियामोतोसँग परामर्श लिएको उनले बताए।

डिपिआर तयार भएका कारण आर्थिक स्रोत जुटे आउँदो १८ महिनाभित्र संरचना बनाएर सक्ने फाउण्डेशनका अध्यक्ष सिताराम कट्टेलले बताए। तर आर्थिक स्रोत जुटाउन फाउण्डेशनलाई हम्मे हम्मे परेको छ।
रंगशाला निर्माण क्षेत्रमा अस्थायी बार लगाउँदै गर्दा गएको जेठ १५ गते बाटो सम्बन्धी विवाद झिकेर स्थानीयले डोजर चलाएर बार भत्काए। त्यसपछि यो अभियानका बारेमा देश/विदेशमा गलत सन्देश गएको छ।

फाउण्डेशनका अध्यक्ष कट्टेल चितवनकै बलमा धेरै आर्थिक स्रोत जुटेमा मात्र रंगशाला निर्माण सम्भव हुने धारणा राख्न थालेका छन्। रंगशालाको बार भत्काएपछि चितवनमा भएका केही गतिविधिले देश/विदेशमा रहेका नेपाली माझ राम्रो सन्देश नगएको उनको अनुभव छ। जिल्लामा आर्थिक संकलन अभियानलाई जोड दिन स्थानीय तहसम्म नै समितिहरु बनेका छन्। तर त्यसले सोचे अनुरुप काम नगरेको उनले बताए।

‘पछिल्लो समय चितवनमा काण्डैकाण्ड हुन थाले त्यहाँ रंगशाला किन बनाउने भन्ने भावना देश/विदेशका नेपाली माझ जागेको छ। त्यसैले अब पनि चितवन आर्थिक संकलनका लागि जागेन भने मैले पनि यो परियोजना स्थगित गरें है भनेर घोषणा गर्ने दिन नआओस्,’ कट्टेलले कार्यक्रममा भने। फाउण्डेशनलाई अहिलेसम्म सात करोडको हाराहारीमा सहयोगको घोषणा भएको छ। पैसा झनै कम उठेको छ।

प्रकाशित : कार्तिक ६, २०७६ १८:३६
प्रतिक्रिया
पठाउनुहोस्
ADVERTISEMENT

बञ्चरो प्रहार गरी वृद्धलाई हत्या गरेको आरोपमा दुई वर्षपछि पक्राउ

देवनारायण साह

मोरङ — रंगेली नगरपालिका ९ दर्बेशाका ६५ वर्षीय पहाडचन्द राजवंशीको हत्या आरोपमा स्थानीय एक किशोरलाई प्रहरीले दुई वर्षपछि पक्राउ गरेको छ ।

स्थानीय १९ वर्षीय भरतलाल राजवंशीलाई पक्राउ गरेको हो । दुई वर्षदेखि भारतमा लुकेर बस्दै आएका भरतलाई प्रहरीले मंगलबार ८ बजे राति उनको घरबाटै पक्राउ गरेको प्रहरी उपरीक्षक विश्व अधिकारीले बताए ।

गाउँमा धामीझाँक्रीको काम गर्दै आएका पहाडचन्द राजवंशीलाई भरतलालले दर्वेशा–बनकोल जोड्ने सडकखण्डमा ०७४ असार ११ गते साँझ बञ्चरो प्रहार गरी हत्या गरेका थियो ।

तत्कालीन पूर्वाञ्चल क्षेत्रीय प्रहरी कार्यालय रानी, विराटनगरले प्रहरी निरीक्षक लेखनाथ दाहाललाई उक्त घटना छानबिनको जिम्मा दिएको थियो । दाहालले छानबिन गरेर निकालेको निष्कर्षको आधारमा मृतक पहाडचन्दकी बुहारी चिन्ताकुमारीबाट भरतलाल विरुद्ध किटानी जाहेरी लिएर फायल ईलाका प्रहरी कार्यालय रंगेलीमा बुझाएका थिए ।

रंगेली प्रहरीले हत्या आरोपितको खोजीमा चासो नदिँदा कारबाही प्रक्रिया अघि बढ्न सकेको थिएन् । उक्त घट्नाको छानबिन गरेका दाहालले इलाका प्रहरी रंगेलीको प्रमुख भएर गएपछि पहिले त्यही फायल खोलेर भरतलालको खोजी सुरु गरेको बताए । उनलाई खोज्दै गएपछि भारतबाट कहिले काँही घर आउने गरेको सूचना पाएपछि मंगलबार पक्राउ गर्न सफल भएको दाहालले सुनाए ।

धामीझाँक्रीको काम गर्दै आएका पहाडचन्दलाई दर्बेशाका स्थानीयबासीले बोक्सी भएको आरोपमा ०६९ असोज १३ गते मानव मलमूत्र खुवाएका थिए । उक्त घटनामा पहाडचन्दले स्थानीय ९ जना विरुद्ध मुद्दा दिएका थिए । ९ जनामध्ये २ जना महिलाले जिल्ला अदालत मोरङबाट सफाई पाएका थिए भने ६ जना पुरुषलाई २/२ हजार जरिवानाको फैसला भएको थियो ।

उक्त ९ जनामा हत्या आरोपी भरतलालका बुवा हरी राजबशी पनि थिए । जिल्ला अदालतको फैसला भएको केही दिनमै हरीको मृत्यु भयो । उनीसँगै अन्य २ जनाको समेत आफ्नै कालगतिले मृत्यु भएपछि स्थानीयले पहाडचन्दले नै सबैलाई बोक्सी गुण लगाएर हत्या गरेको आरोप लगाउन थालेको छानबिनमा देखिएको प्रहरी निरीक्षक दाहालले बताए ।

‘१७ वर्षीय भरतलालले आफ्नो बुवा हरीलाई बोक्सी गुण लगाएर हत्या गरेको भन्दै पहाडचन्दलाई हत्या गरेको बयान दिएका छन्,’ दाहालले भने, ‘पहाडचन्द साइकलमा गाउँकै हटियाबाट आउँदै गरेको बेलामा भरतलालले हत्या गर्नका लागि बाटोमा बञ्चरो लिई प्रतिक्षा गरेर बसेको र उनी आएपछि बञ्चरो प्रहार गरेर हत्या गरी भारततर्फ फरार भएका थिए ।’

प्रहरी उपरीक्षक अधिकारीले घटनाको थप छानबिन गरी कर्तव्य ज्यान मुद्दामा कारबाही अघि बढाएको बताए । भरतलालाई जिल्ला प्रहरीमा थुनामा राखेर अनुसन्धान भइरहेको उनले बताए । उक्त घटनामा प्रहरी असफल भएको भन्दै यसअघि निकै टिप्पणी हुँदै आएको थियो ।

प्रकाशित : कार्तिक ६, २०७६ १८:०४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×