भावी कार्यक्रम बनाउन समिति

कान्तिपुर संवाददाता

काठमाडौँ — नेपाल क्रिकेट संघ (क्यान) को केन्द्रीय समितिको पहिलो बैठकले क्यानको भावी कार्यक्रम बनाउनका लागि विभिन्न समिति गठन गरेको छ । ठीक एक महिनाअघि चतुरबहादुर चन्दलाई अध्यक्षमा चुन्दै क्यानको निर्वाचित साधरणसभा सम्पन्न भएको थियो । 

अन्तर्राष्ट्रिय क्रिकेट परिषद् (आईसीसी) ले केही दिनअघि मात्र क्यानलाई लगाएको निलम्बन ससर्त फुकुवा गरेको थियो । त्यसलगत्तै क्यानको कार्यसमिति बैठकले विभिन्न कार्यक्रम प्रस्तुत गरेको हो । आईसीसीले निलम्बन फुकुवा गरे पनि आर्थिक पक्षको बारेमा अझै नखुलाएकाले कार्यलय सञ्चालनको अवस्थामा कठिनाइ रहेको क्यानका महासचिव अशोकनाथ प्याकुर्‍यालले जनाए ।

क्यानको बैठकले प्राविधिक, प्रतियोगिता, मिडिया र आर्थिक समिति गठन गरेको छ । त्यसमध्ये प्राविधिक, प्रतियोगिता र आर्थिक समितिले क्यानको १ वर्षको भावी योजना कार्यक्रम बनाउने प्याकुर्‍यालले बताए । क्यानका सदस्य सञ्जयराज सिंहलाई प्राविधिक, प्रशान्त मल्ललाई प्रतियोगिता र कोषाध्यक्ष रोशन सिंहलाई आर्थिक समितिको संयोजक तोकिएको छ । प्राविधिक समिति ५ सदस्य हुनेछ र त्यसमा संघभित्रका ३ र बाहिरका २ जना बस्न पाउनेछन् ।

प्रतियोगिता समिति पनि ५ सदस्यीय र आर्थिक समिति ३ सदस्यीय हुनेछ । त्यस्तै प्याकुर्‍यालको संयोजकत्वमा मिडिया समिति हुनेछ र उनी स्वयं क्यानको प्रवक्ता हुनेछन् । अध्यक्ष, महासचिव र कोषाध्यक्षको हस्ताक्षरमा क्यानको खाता सञ्चालन हुनेछ । आर्थिक वर्ष २०१४/१५ को अडिट रिपोर्टलाई साधारणसभामा अनुमोदनका लागि पठाइने भएको छ ।

क्यानको निर्वाचनअघि सार्वजनिक प्रतिवेदनमा बेरुजु देखिएपछि क्यानका तत्कालिन पदाधिकारीहरू उत्तम कर्माचार्य, दिवाकर घले, नरेश श्रेष्ठ, शैलेश चौधरी, रतन कठायत, किरण राणा, सुनीलसिंह हमाललगायत प्रतिनिधि बन्नबाट रोकिएका थिए ।

पारसको राजीनामा !
नेपाल क्रिकेट टोलीको कप्तानबाट पारस खड्काले दिएको राजीनामाका बारेमा बैठकले ठोस निर्णय लिन सकेन । आईसीसीले क्यानको निलम्बन फुकुवा गरेको भोलिपल्ट पारसले कप्तान पदत्याग गरेका थिए ।

‘पारसको राजीनामाको विषयमा बैठकमा छलफल भएको थियो । हामीले आधिकारिक रूपमा उनको राजीनामा पाएका छैनौं । मिडियामा उनको राजीनामा आएपछि हाम्रो गम्भीर ध्यानाकर्षण भएको छ । मिडियामा आएको विषयलाई हामीले आधार मान्ने कुरा भएन,’ प्याकुर्‍यालले भने, ‘राजीनामा क्यानलाई जानकारी दिनुपर्ने हो । क्यान निलम्बन हुँदा राजीनामा कहाँ दिने भनेर अन्योल भएको हुन सक्छ ।’

इंग्ल्यान्डको मेरिलेबोन क्रिकेट क्लबले गर्न लागेको नेपाल भ्रमणको बारेमा पनि क्यान बैठकले ठोस निर्णय लिन नसकेको प्याकुर्‍यालले जनाए । उनका अनुसार नोभेम्बर ३ मा एमसीसी नेपाल आउने भनिए पनि आफूहरूलाई त्यसबारेमा कुनै आधाकारिक जानकारी दिइएको छैन ।

आईसीसीले प्रोजेक्ट म्यानेजरमा नियुक्त गरेका रौनक मल्लको बारेमा पनि क्यानले कुनै निर्णय लिन सकेन । नेपाली यू–१९ टोली भारत भ्रमणमा र यू–१९ टोली चीन भ्रमणमा जाँदै छ । दुवै टोलीले नोभेम्बर ३ बाट सुरु हुने प्रतियोगितामा खेल्ने छन् । त्यसको संयोजन मल्लले गर्ने भनेर आईसीसीले तोकेको छ । ‘मल्लको भुमिका के हो भनेर हामी अझै अस्पष्ट छौं, आईसीसीलाई उनको भूमिकाबारेमा सोधेका पनि छौं,’ प्याकुर्‍यालले भने ।

बैठकले क्यानको निलम्बन फुकुवा गर्न भूमिका खेल्ने आईसीसी, राष्ट्रिय खेलकुद परिषद् सबैलाई धन्यवाद दिएको छ । प्याकुर्‍यालले क्यान सञ्चालन गर्ने विषयमा जोड दिएको जनाउँदै भने, ‘क्यानका कर्मचारीले ३ वर्षदेखि तलब पाएका छैनन । त्यसैले कार्यालय सञ्चलानलाई
प्राथमिकतामा राखेका छौं ।’

प्रकाशित : कार्तिक ४, २०७६ ११:५३
ADVERTISEMENT
प्रतिक्रिया
पठाउनुहोस्
ADVERTISEMENT

‘मृत्युपछि महान् नभन्नू’

कान्तिपुर संवाददाता

काठमाडौँ — विश्व फुटबल महासंघ (फिफा) को प्रतिबन्धमा रहेका अखिल नेपाल फुटबल संघ (एन्फा) का पूर्वअध्यक्ष गणेश थापाले आफ्नो मृत्युपछि आफूलाई राम्रो मान्छेको रूपमा स्तुति नगाउन अपिल गरेका छन् ।

पछिल्लो समय नेपाली खेलकुदमा खलनायकको रूपमा देखिएका थापाले आफूमाथिका आरोपको स्पष्टीकरणसमेत दिन नदिई अन्याय गरिएको बताए ।

‘लेखा समितिको निर्णयदेखि अख्तियारले सफाइ दिएकोसम्मका कुरामा तथ्य बंग्याएर प्रचार भएको छ,’ आत्मकथा प्रकाशनको अन्तिम तयारीमा रहेका थापाले आवरण सार्वजनिक समारोहमा भने, ‘म मरेपछि मेरो शरीर राष्ट्रिय खेलकुद परिषद् र एन्फामा राखेर जग हसाउँने काम नगरियोस्, आफूमाथि लागेको आरोपको सत्यतथ्य छानबिन र निर्णय म जीवित हुँदैमा पाउन चाहन्छु ।’

बुकहिल प्रकाशनले थापाको आत्मकथा सार्वजनिक गर्न लागेको हो । केही अस्वस्थ रहेका थापा परीक्षणका लागि देशबाहिर जाने भएकाले आत्मकथा प्रकाशन मिति केही पर धकेलिने भएको छ । बुकहिलले फागुनमा सार्वजनिक गर्ने तयारी गरेको छ । आत्मकथामा मुख्य: आफूमाथि लागेका आरोपको स्पष्टीकरणको रूपमा उल्लेख्य ध्यान दिएको थापा आफैंले प्रस्ट पारेका छन् । पत्रकार हिमेशरत्न बज्राचार्यको सहलेखनमा आत्मकथा आउने घोषणा गरिएको हो ।

७/८ वर्षदेखि नै पुस्तकको तयारीमा थिएँ तर त्यसयताका केही गम्भीर घटनाक्रमका कारण यो योजना स्थगित भयो,’ पत्रकार सम्मेलनमा थापाले भने, ‘पछिल्लो १ वर्षदेखि त्यसलाई तीव्रता दिइएको छ र लगभग तयारी सकिएको । यसमा मैले ममाथि भएको अन्यायको खुलासा गरेको छु र नेपाली खेलकुद र फुटबलप्रतिको गुनासो र चिन्ताहरू प्रस्तुत गरेको छु ।’

३५ वर्ष फुटबलका लागि योगदान गर्दा आफूमाथि चरित्रहत्या गर्ने काम मात्र भएको थापाको दावी छ । ‘अख्तियारले सफाइ दिएको मुद्दामा राजनीतिक प्रभावमा उन्मुक्ति भनियो, लेखा समितिले निर्णय नै नगरेका कुराहरू निर्णय भएको भनेर प्रचार भयो र नेपालको मुद्दा र फिफाले लगाएको आरोपलाई एउटै रूपमा प्रचार गरियो,’ उनले थपे ।

‘मेरो बालककालदेखि फुटबलमा प्रवेश, राष्ट्रिय टोली र कप्तान, २०५२ सालमा एन्फा अध्यक्षको रूपमा प्रशासनिक निकायमा प्रवेश र त्यसयताका सम्पूर्ण कार्यलाई समेट्ने प्रयास गरेको छु, यो पुस्तक गणेश थापालाई चिन्ने र मेरो कार्यकालमा नेपाली फुटबलको अवस्थालाई
चित्रण गर्न लामो समयसम्म प्रभावकारी रहनेछ ।’

प्रकाशित : कार्तिक ४, २०७६ ११:५१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×