लिभरपुल रोकियो

(एएफपी)

लन्डन — लिभरपुलको प्रिमियर लिगमा लगातार १७ खेलको यात्रालाई म्यानचेस्टर युनाइटेडले आइतबार रोकिदिएको छ । आइतबार ओल्ड ट्राफोर्डमा भएको खेल १–१ को बराबरीमा रोकियो ।

सिजनको पहिलो आठै खेल जितेको लिभरपुलको यस नतिजापछि आठ अंकको अग्रता ६ अंमा झरेको छ ।

मार्कुस रासफोर्डको गोल युनाइटेडले घरेलु मैदानमा ३६ औं मिनेटमा अग्रता लियो । खेल समाप्त हुन ५ मिनेट अगाडि वैकल्पिक एडम ललानाले गोल गरी लिभरपुललाई बराबरीमा ल्याए । खराब सिजन बिताइरहेको युनाइटेड १० अंकसहित १३ औं स्थानमा छ ।

म्यानचेस्टर सिटीले क्रिस्टल प्यालेसलाई शनिबारको खेलमा २–० ले हरायो र राहत महसुस गर्‍यो । डिफेन्डिङ च्याम्पियनले लन्डनको भ्रमण गर्दा उसको खेलमाथि शंका कायम थियो । त्यसलाई निस्तेज पार्दै सिटीले पहिलो हाफमा दुई गोल गरे । ग्याब्रिएल जेससको गोलमा अग्रता लिएको सिटीका लागि डेबिड सिल्भाले दोस्रो गोल थपे ।

लेस्टर सिटीले बर्नलीलाई २–१, चेल्सीले न्युकासल युनाइटेडलाई १–० ले हरायो भने टोटनहम वाटफोर्डको हातबाट १–१ को बराबरीमा रोकियो । सिटी अंक तालिकाको दोस्रो स्थानमा छ भने उसको पछाडि लेस्टर र चेल्सी रहेका छन् । सिटीको १९ अंक छ । लेस्टर र चेल्सी समान १७ अंकमा छन् ।

स्पेन म्याड्रिड– बार्सिलोना स्पेनी ला लिगाको शनिबार शीर्ष स्थानमा उक्लियो र यससँगै रियल म्याड्रिडमा तीतो हार पनि फर्केको छ । यसै सिजन मात्र बढुवा पाएको रियल मायोर्काले उसलाई १–० ले हरायो । रियल सन् २००६ मा मार्लोकाकै हातबाट पराजित हुँदा टिममा जिनेदिन जिदान, डेबिड बेकहयाम र रोबिन्होजस्ता खेलाडी थिए । त्यसको १३ वर्षपछि रियल फेरि एकपल्ट सान मोइक्समा पराजित रहेको छ र यसको कारण रहे, जुनियर लागोको उत्कृष्ट गोल ।

खेलको अन्त्यतिर रियल १० खेलाडीमा सीमित रहयो र यसले टिमको खेलमा फर्कने सम्भावना अझ कमजोर बनायो । हारपछि प्रशिक्षक जिदानले भने, ‘रियलको समस्या के हो भने टिमले प्रत्येकपल्ट आफू राम्रो छ भनेर प्रमाणित गर्नुपर्छ ।’ उनले थपे, ‘अहिले टिमको सबैभन्दा ठूलो समस्या रहेको छ, लगातार समान स्तरमा प्रदर्शन गर्न नसक्नु । यो वर्ष केही पाउनु छ भने हाम्रो खेलमा सुधार नल्याएर सुखै छैन ।’

यसअघि बार्सिलोनाले विस्तारै उत्कृष्ट लयमा फर्कन थालेको प्रमाणित गर्दै आइबरलाई सजिलै ३–० ले हरायो । त्यसमा लियोनल मेसी, लुइस स्वारेज एन्टोन ग्रिजमनले गोल गरे ।

प्रकाशित : कार्तिक ४, २०७६ ११:४९
ADVERTISEMENT
प्रतिक्रिया
पठाउनुहोस्

घलेगाउँ डोर्‍याउने गीत

आश गुरुङ

लमजुङ — पर्यटकीय दृष्टिले चर्चित लमजुङको घलेगाउँसम्म पर्यटक डोर्‍याउने गीत निर्माण गरिएको छ । भर्खरै छायांकन सकिएको म्युजिक भिडियो एक साताभित्र सम्पादन गरेर युट्युबमा सार्वजनिक गर्ने तयारी गरिएको छ । 

घलेगाउँको एक युवक काठमाडौं घुमेर फर्किने बेला एक युवतीसँग एउटै सिटमा परेपछि गीत सुरु हुन्छ । काठमाडौंबाट ६ घण्टाको यात्रापछि बेंसीसहरमा खाना खाएर घलेगाउँ उक्लिन्छ । बेंसीसहर–घलेगाउँ बढीमा २ घण्टाको बाटो हो ।

करीब २१ मिनेटको गीत एक सातामा छायांकन सकेर टोली फर्केको छ । म्युजिक भिडियोलाई उनीहरुले ‘म्युजिक डकुमेन्ट्री’ भनेका छन् । यसअघि निर्माण गरिएको ‘मेरो प्यारो घलेगाउँ’ बोलको गीतमा पुरानो घलेगाउँ देखिन्छ । ‘संसारैमा बयान चलेको, लमजुङको घलेगाउँ’ बोलको अहिलेको गीति भिडियोमा स्मार्ट भिलेजउन्मुख राताम्य टीनको छानोदेखि भ्युटावर, गोर्खा पार्क, गुरुङ जतिको अन्तिम राजा क्याल्बोरोजा क्ले पार्क, खेल मैदान, नयाँ संग्रहालय लगायत पछिल्ला समयमा निर्माण गरिएका भौतिक संरचना देख्न सकिन्छ । प्राकृतिक सौन्दर्य र लोपोन्मख कलासंस्कृति भिडियोमा छ ।

‘घलेगाउँमा जे जति छ, सवैलाई समेट्न भिडियोले पनि सकेको छैन । घलेगाउँमा यी कुराहरु छन् । अब तपाइँ यो भन्दा बढी घलेगाउँ नै आएर हेर्नुस् भन्नलाई भिडियो बनाएका हौं,’ क्व्होलासोंथर गाउँपालिका अध्यक्ष समेत रहेका घलेगाउँ पर्यटन व्यवस्थापन समिति, ग्रामीण पर्यटन घलेगाउँका अध्यक्ष प्रेम घलेले भने । उनका अनुसार नेपाल भ्रमणबर्ष २०२० लाई मध्यनजर राखेर उक्त म्युजिक भिडियो बनाइएको हो ।

गणेश गुरुङ र भिमु गुरुङको आवाजमा रेकर्ड गरिएको गीतमा रचना र संगीत गणेशकै छ । एरेन्ज भने तेजेन्द्र गुरुङले गरेका छन् । म्युजिक भिडियोमा गणेशका अलावा गुरुङ फिल्मका नायक खेमराज घले, नायिका निस्ता गुरुङ र भारती घलेलगायतको अभिनय छ । मौसम हिमालीले म्युजिक भिडियोको निर्देशन गरेका छन् । पुस्कर थापाले भिडियो खिचेका छन् । म्युजिक भिडियो साँढे ५ लाख रुपैयाँमा निर्माण गरिएको पर्यटन समितिका सचिव उमलबहादुर विकले बताए ।

घलेगाउँमा अहिले ३७ घरमा होमस्टे छ । करीब २ सय जना पर्यटक यसमा अट्छ । तर, हिजोआज करिव ३ सय पर्यटक दैनिक घलेगाउँ आउने गरेका छन् । ‘सन् २०२० मा हामी ५० घरमा होमस्टे सञ्चालन गर्छौं । ५० हजार पर्यटक भित्र्याउँछौं,’ अध्यक्ष घलेले भने । उनका अनुसार २०५७ देखि घलेगाउँको १० घरमा होमस्टे सञ्चालन सुरुवात गरिएको थियो ।

प्रकाशित : कार्तिक ४, २०७६ ११:४१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT