डब्लूसीएल आजदेखि

आयोजक क्वीन्स इभेन्ट म्यानेजमेन्टले मंगलबार पत्रकार सम्मेलनमार्फत लिगको ट्रफी सार्वजनिक गरी प्रतियोगिताको सम्पूर्ण तयारी पूरा भएको जनाएको छ । प्रतयोगितामा काठमाडौं क्वीन्स, ललितपुर फाल्कोन्स, चितवन राइनोज, पोखरा पल्टन र विराटनगर टाइटन्स गरी ५ टिम प्रतिस्पर्धी छन् । राउन्ड रोबिन प्रणालीमा प्रतियोगिता हुनेछ । राष्ट्रिय टोलीका ५ सिनियर खेलाडीले हरेक टिमको मार्की खेलाडीको जिम्मा पाएका छन् । काठमाडौंमा राष्ट्रिय टोलीकी कप्तान रुबिना क्षेत्री, ललितपुरमा पूर्व कप्तान नेरी थापामगर, चितवनमा इन्दु बर्मा, पोखरामा सीता रानामगर र विराटनगरमा सरिता मगर मार्की खेलाडीमा छन् ।

पत्रकार सम्मेलनमा सबै टिमका मार्की खेलाडीले तयारी राम्रो भएको भन्दै आ–आफ्नो टिमले जित्ने दाबी गरेका छन् । राष्ट्रिय टोलीकी कप्तानसमेत रहेकी काठमाडौंकी कप्तान रुबिनाले पहिलोपल्ट आफ्नै भूमिमा फ्रेन्चाइज लिग खेल्न पाएकोमा खुसी व्यक्त गरिन् ।

विजेताले ७ लाख र उपविजेताले ३ लाख रुपैयाँ पुरस्कार पाउने छन् । सर्वोत्कृष्ट खेलाडीका लागि एउटा स्कुटर र ५० हजार तथा उत्कृष्ट ब्याटर र बलरलाई जनही २५ हजार पुरस्कार दिइनेछ । हरेक खेलको प्लेयर अफ द म्याचले ५ हजार पुरस्कार पाउनेछन् ।