कहाँ चुक्दैछन् जिदान ?

बीबीसी

गुइलम बालाग — गत साता आफ्नैबारे टीभी सिरियल सार्वजनिक कार्यक्रममा सर्जियो रोमासले पत्रकारसँगै ख्याल–ख्यालमा भने, ‘रियल म्याड्रिडमा भन्दा एमेजनमै अब मैले धेरै सिजन बिताउने छु ।’ स्पेनी सेन्टर ब्याकको बेर्नाबेउमा दुई सिजन बाँकी छ । रियलले यस अनुबन्ध लम्ब्याउन खोजिरहेको छैन ।

पछिल्लो १४ वर्षयता रोमास लगातार रियलमा छन् । उनको यसबीच उपस्थिति पनि तगडा छ । पछिल्लो ६ च्याम्पियन्स लिग संस्करणमध्ये चारमा रियल विजयी छ ।

व्यवस्थापकका रूपमा जिदान गत सिजनको अन्त्यतिर फेरि टिममा फर्के । त्यसयता टिमको जित प्रतिशत छ, ५० त । यस सिजनको सुरुआतदेखि यो आँकडामा सुधारको कुनै संकेत छैन । रियलको प्रदर्शनमा एकरूपता छैन । युरोपेली च्याम्पियन्स लिगमा पेरिस सेन्ट जर्मेन (पीएसजी) विरुद्धको खेल गुमाएयता रियलले दुई ठूला खेल खेल्नु छ । लिगमा शीर्षस्थानको एट्लेटिको म्याड्रिडविरुद्ध तथा च्याम्पियन्स लिगमा ला लिगा प्रतिद्वन्द्वी सेभियाविरुद्ध ।

रियलका लागि यस्तो अवस्था केही नयाँ होइन । मैदानभित्र र बाहिर धेरै उतारचढाव भइरहन्छ । तर एउटा तथ्य के निश्चित छ भने युरोपेली क्लब फुटबलको सबैभन्दा सफल टिमले प्रतियोगिताको पहिलो खेलमै नमज्जाको हार बेहोर्छ भने टिममा केही कमजोरी छ । हुन सक्छ, जिदान आफैंले पनि कुनै पनि बेला आफ्नो पद गुमाउन सक्ने छ । सायद जिदानले यस्तो स्थिति आउने छ भनेर केही समय अगाडि नै भविष्यवाणी पनि गरिसकेका थिए ।

सन् २०१७–१८ को च्याम्पियन्स लिग जितेलगत्तै जिदानले प्रशिक्षक पदबाट राजीनामा दिए । उनले त्यति बेला भनेका थिए, टिममा व्यापक परिवर्तन गर्नुपर्नेछ । यस्तै परिवर्तन गर्न क्लब व्यवस्थापनले उनलाई सहयोग पनि गरिरहेको छैन । पछिल्लो मार्चमा उनी फेरि क्लबमा फर्के अध्यक्ष फ्लोरेन्टिनो पेरेजको अनुरोधमा । यसअघि उनै पेरेजले टोटेनहमबाट माउरिसियो पोचेटिनो र चेल्सीका पूर्व व्यवस्थापक एन्टोनियो कोन्टेलाई ल्याउने प्रयास गरेका थिए ।

जिदानले नयाँ नियुक्ति पाउँदा उनलाई भनिएको थियो, क्लबमा परिवर्तन ल्याउने अधिकार र रकम दुवै उनलाई दिइनेछ । यस्तो आवश्यकता स्वाभाविक पनि थियो, किनभने ला लिगामा पनि रियल विजेता बार्सिलोनाभन्दा १७ अंकले पछाडि थियो । तर स्थिति अहिलेसम्म सुध्रिएको छैन । उनी आएयता लिगका १५ खेलमध्ये रियल ७ मा मात्र विजयी छ । यो जितको ४६.७ प्रतिशत सफलता मात्र हो । उनी अगाडिका प्रशिक्षक सान्टियागो सोलारीको जित प्रतिशत बरू राम्रो थियो, ६८.८ प्रतिशत ।

यसपल्ट प्रदर्शन खराब हुनुपछाडि मार्को एसेन्सियो र इडेन हाजार्डको चोट पनि प्रमुख कारण बनेको छ । यो सिजन नयाँ खेलाडीका रूपमा भित्रिएका हाजार्डले केही देखाउन सकेका छैनन् । फेरि जिदानले पनि रणनीतिक रूपमा टिममा कुनै परिवर्तन गर्न सकेका छैनन् । जिदानलाई कहिले पनि फुटबलका आइन्सटिन प्रशिक्षक भनिएको छैन । उनको सबैभन्दा बलियो विशेषता भनेकै खेलाडीसँग कायम राख्न सक्ने सुमधुर सम्बन्ध हो । अहिले यो पक्ष पनि जिदानको कमजोर हुँदै छ । हल्ला चल्न थालेको छ, फेरि आउँदै छन् उनै जोसे मोउरिन्हो ।

प्रकाशित : आश्विन ३, २०७६ ०९:२४
प्रतिक्रिया
पठाउनुहोस्

अमेरिकाको टेक्ससमा फेरि गोली हानेर ५ जनाको हत्या

बीबीसी

काठमाडौँ — अमेरिकाको टेक्सस राज्यमा भएको गोलीकाण्डमा कम्तीमा ५ जना मारिएका छन् भने कैयौँ घाइते भएको प्रहरीले बताएको छ।

तस्बिर : रोयटर्स

एक बन्दुकधारीले गाडीमा चढेर वरपरका मानिसहरूमाथि जथाभावी गोली प्रहार गरेको बीबीसीले लेखेको छ। टेक्ससका पश्चिमी नगरहरू ओडिसा तथा मिडल्यान्डमा उक्त घटना भएका हुन् । प्रहरीका अनुसार एकजना संदिग्ध पुरुषलाई गोली हानेर मारिएको छ।

ओडेसा नगर प्रहरीका अनुसार सबभन्दा पहिले ती संदिग्ध पुरुषले उनको गाडी रोक्ने ट्राफिक प्रहरीलाई गोली हानेका थिए। करिब ३० वर्ष हाराहारीका ठानिएका ती बन्दुकधारीले त्यसपछि हुलाक सेवाको एउटा ट्रक खोसेका थिए। फेरि नजिकैको मिडल्याण्ड नगर आवतजावत गर्दै लगातार गोली प्रहार गरेका थिए।

उनलाई प्रहरीले एउटा सिनेमा घर नजिकै गोली हानेर मारिदिएको छ। प्रहरी प्रवक्ताले बताए अनुसार कम्तीमा १६ जना घाइते भएका छन्। घाइतेमध्ये केही प्रहरी पनि छन्।

ओडेसाको अस्पतालले दुई वर्षभन्दा कम उमेरको एक शिशु पनि घाइते अवस्थामा ल्याइएको छ। त्यहाँ भर्ना गरएिकामध्ये ७ जनाको अवस्था गम्भीर रहेको अन्तर्राष्ट्रिय सञ्चारमाध्यमले जनाएको छ ।

प्रकाशित : भाद्र १५, २०७६ १२:२२
पूरा पढ्नुहोस्
प्रतिक्रिया
पठाउनुहोस्