सागलाई उसुबाट २२ छनोट

कान्तिपुर संवाददाता

काठमाडौँ — आसन्न १३ औं दक्षिण एसियाली खेलकुद (साग) लाई उसुबाट २२ खेलाडीको अन्तिम छनोट गरिएको छ । त्रिपुरेश्वरस्थित राखेपको सेमी कभर्डहलमा शनिबार भएको छनोटबाट सान्सौंतर्फ पुरुषमा ८ तथा महिलामा ६ खेलाडी छानिए । थाउलोमा ४–४ पुरुष/महिला खेलाडी छनोट भए ।

सान्सौं पुरुष ५२ केजीमा एपीएफका अशोक खालिङ, ५६ केजीमा एपीएफका अमर सुनार, ६० केजीमा एपीएफका मंगलप्रसाद थारु, ६५ केजीमा सुदूरपश्चिम प्रदेशका सुभाष भुल सेठी, ७० केजीमा आर्मीका चित्रसिंह ठकुरी, ७५ केजीमा आर्मीका पदम राई, ८० केजीमा एपीएफका निकेश श्रेष्ठ र ८५ केजीमा आर्मीका किरणसिंह साउद छनोट भए । महिला ५२ केजीमा आर्मीकी एलिना चौधरी, ५६ केजीमा प्रहरीकी जुनी राई, ६० केजीमा एपीएफकी निशा बिक, ६५ केजीमा एपीएफकी मनीषा रावत, ७० केजीमा आर्मीकी विन्दु पुन मगर र ७५ केजीमा आर्मीकी शिलु डंगोल छानिए ।


थाउलोतर्फ छाङ छ्वानमा विजय सिंजाली र सुस्मिता तामाङ, नान छ्वानमा दीपक हमाल र निमा घर्तीमगर तथा थाइची छ्वानमा हरिप्रसाद गोले र मीना ग्लान छनोट भए । ताओसु/कुन्सुमा विश्व बुढा मगर तथा चेन्सु/चियाङसुमा कविता थापा छनोट भए । दीपक कर्णाली र कविता एपीएफका हुन् भने बाँकी ६ आर्मीमा आबद्ध छन् ।


प्रकाशित : भाद्र १५, २०७६ ०८:०२
ADVERTISEMENT
प्रतिक्रिया
पठाउनुहोस्
ADVERTISEMENT

गण्डकी र डायमन्ड विजयी

कान्तिपुर संवाददाता

(पोखरा) — गण्डकी प्रदेश र न्यु डायमन्ड क्लबले शनिबार राष्ट्रिय महिला भलिबल प्रतियोगितामा विजयी सुरुआत गरेका छन् । 

नवआदर्श सामुदायिक विकास समाजले लामाचौर तीज महोत्सवको अवसरमा आयोजना गरेको प्रतियोगिताको पहिलो खेलमा गण्डकी प्रदेशले पारामाउन्ट बोर्डिङ काठमाडौंलाई २५–१४, २५–११, २५–१५ को सोझो सेटमा हरायो । यु डायमन्ड एकेडेमीले चितवन टाइगर्स क्लबलाई २५–१४, २५–२०, २५–१४ को सोझो सेटै पराजित गरेको हो । पूर्व राष्ट्रिय खेलाडी सिपोरा गुरुङ लामो समयपछि खेलमा फर्किएकी छन् । उनी न्यु डायमन्डबाट यस प्रतियोगितामा सहभागी भएकी छन् ।

शनिबारै अन्य दुई खेल अत्यधिक वर्षाका कारण स्थगित भए । श्रीराम खेलकुद विकास समिति दाङविरुद्ध खेल जारी रहँदा लगातार गण्डकी प्रदेशले दुई सेट लिएसँगै तेस्रो सेटमा पानी परेकाले खेल स्थगित भएको नेपाल भलिबल संघका उपाध्यक्ष यामबहादुर गुरुङले बताए । शनिबार हुने भनिएको न्यु डायमन्ड र नेपाल पुलिस क्लबबीचको खेल पनि स्थगित भएको हो । स्थगित खेल आइतबार हुने संयोजक सुशीलकुमार श्रेष्ठले बताए ।

सोमबारसम्म चल्ने प्रतियोगितामा साबिक विजेता एपीएफ क्लब सहभागी भएन । विजेताले १ लाख १ सय ५५ रुपैयाँ, उपविजेताले ६५ हजार ५ रुपैयाँ र तेस्रो हुनेले २५ हजार ५ रुपैयाँ प्राप्त गर्नेछन् ।

महोत्सवमा शनिबार भएको नरबहादुर बानियाँ स्मृति गण्डकी प्रदेशस्तरीय सितेरियो कराँतेमा गोरखा पहिलो भएको छ । गोरखाले ६ स्वर्ण, १ रजत र ३ कांस्य पदक जित्यो । २ स्वर्ण, ३ रजत र ५ कांस्य साथ कास्की दोस्रो र २ स्वर्ण, १ रजत र ५ कांस्यसाथ तनहुँ तेस्रो भए ।

प्रकाशित : भाद्र १५, २०७६ ०८:००
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×