पारा पावरलिफ्टिङ प्रशिक्षण

कान्तिपुर संवाददाता

काठमाडौँ — राष्ट्रिय पारा पावरलिफ्टिङ संघको आयोजनामा पारा महिला पावरलिफ्टिङ प्रशिक्षण शुक्रबार सुरु भएको छ । नेपालमा पारा पावर लिफ्टिङ महिला खेलाडी उत्पादन गर्ने उद्देश्यले आयोजना गरिएको प्रशिक्षण कार्यक्रममा नेपालका कम्मरमुनिका भाग कमजोर रहेका करिब २५ पारा खेलाडी र प्रशिक्षकले तीन दिन प्रशिक्षण लिने छन् । प्रशिक्षण कार्यक्रममा सहभागीलाई अन्तर्राष्ट्रिय टेक्निकल अफिसियल मलेसियन नुर साहिदा माट शाहले सैद्धान्तिक तथा प्रयोगात्मक प्रशिक्षण दिने छिन् । साहिदा १० वर्षदेखि पारा पावरलिफ्टिङमा लागिरहेकी छन् । 

विभिन्न देशमा विकलांग रहेका खेलाडीलाई हौसला प्रदान गर्दै उनीहरूमा आत्मविश्वासको विकास गर्दै पावरलिफ्टिङमा लगाउने उद्देश्यले कार्यक्रम भइरहेको र नेपालमा पनि यसको विकासका लागि आफू आएको उनले बताइन् । पारा खेलाडीको विकासमा आफूलाई अग्रस्थानमा उभ्याएको संस्था एजीआईटीओएस फाउन्डेसनको सहयोगमा कार्यक्रम भएको राष्ट्रिय पारा पावरलिफ्टिङ संघका अध्यक्ष टेकबहादुर गुरुङले जानकारी गराए ।पारा पावरलिफ्टिङको विभिन्न १० शारीरिक तौल समूहमा एसियाली तथा ओलम्पिकमा प्रतियोगिता हुँदै आइरहेको छ ।

प्रकाशित : भाद्र १४, २०७६ ०९:१५
प्रतिक्रिया
पठाउनुहोस्
ADVERTISEMENT

छलाङ मार्दै गौफ

(एएफपी)

न्युयोर्क — अमेरिकी सनसनी १५ वर्षीया कोको गौफले यूएस ओपनमा शनिबार राति डिफेन्डिङ च्याम्पियन नाओमी ओसाकासँग खेल्ने अवसर जुटाएकी छन् । पुरुषतर्फ तेस्रो चरणमा वाकओभर प्राप्त भएपछि राफेल नडालको यात्रा अझ सजिलो भएको छ । 

यसबीच विम्बल्डन च्याम्पियन सिमोना हालेप भने प्रतियोगिताबाट बाहिरिएकी छन् । लगातार तेस्रो वर्ष चाँडै चुनौती हुने क्रममा उनी तीन सेटको कडा प्रतिस्पर्धात्मक खेलमा १ सय १६ औं वरीयताकी टेलर टाउन्सेन्डसँग पराजित रहिन् । विम्बल्डनमा चौथो चरणसम्मको यात्रा तय गरेकी गौफ त्यसमा हालेपसँग नै पराजित रहेकी थिइन् । उनले हंगेरीकी क्वालिफायर टिमा बाबोसलाई ६–२, ४–६, ६–४ ले पराजित गरिन् । यसक्रममा उनी सन् १९९६ यता अन्तिम १६ पुग्ने सबैभन्दा कम उमेरकी खेलाडी भएकी छन् । त्यस वर्ष रुसी अन्ना कोर्निकोभाले त्यस्तो उपलब्धि हात पारेकी थिइन् । ‘म निकै रमाइरहेको छु र अहिलेसम्म तय गरेको यात्रामा खुसी पनि छु,’ गौफले भनिन् ।

तीनपल्टका यूएस ओपन विजेता नडालले भने अगाडि बढ्न कोर्टमै उत्रनुपरेन । उनका प्रतिद्वन्द्वी अस्ट्रेलियाली थानासी कोकिनकिस काँधको चोटका कारण आर्थर एस स्टेडियममा खेल्न असमर्थ रहे । अब १८ पल्टका ग्रान्ड स्लाम विजेता नडालले अन्तिम १६ मा प्रवेश गर्न दक्षिण कोरियाली क्वालिफायर चुङ हियोङको सामना गर्नेछन् । फाइनलसम्मको यात्रामा नडालले ठूला तीन नाममध्ये नोभाक जोकोभिच र रोजर फेडेररको सामना गर्नुपर्ने छैन ।

नडालको ‘पुल’ मा रहेकामध्ये सबैभन्दा माथिल्लो वरीयताका जर्मनीका एलेक्जान्डर जेरेभले अमेरिकाका फ्रान्सिस टिफोएलाई ६–३, ३–६, ६–२, २–६, ६–३ ले हराए । यूएस ओपनमा आफ्नो सबैभन्दा उत्कृष्ट यात्रा बराबरीको उपलब्धि हात पारेका जेरेभलाई छैटौं वरीयता प्राप्त छ । महिलातर्फ रोमानियाकी हालेप भने अमेरिकी टाउन्सेन्डसँग २–६, ६–३, ७–६ ले पराजित रहिन् । यसअघिका दुई संस्करणमा हालेप पहिलो चरणमै पराजित भएकी थिइन् । ‘मैले फेरि एकपल्ट राम्रो खेल्न सकिनँ,’ हालेपले खेलपछि भनिन्, ‘तर मैले अन्त्यसम्म भने संघर्ष गरिरहेँ ।’ अर्कोतर्फ जितमा टाउन्सेन्ड भने निकै खुसी देखिइन् । उनले भनिन्, ‘यो जितको मेरा लागि धेरै अर्थ छ । मैले यहाँसम्म पुग्न निकै लामो यात्रा तय गरेकी छु ।’

प्रकाशित : भाद्र १४, २०७६ ०९:१५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×