छानिए ३२ खेलाडी

कान्तिपुर संवाददाता

काठमाडौँ — १३ औं दक्षिण एसियाली खेलकुद (साग) का कराँतेको बिहीबार भएको अन्तिम छनोटबाट एकल कातामा मन्देकाजी श्रेष्ठ र चञ्चला दनुवार छानिएका छन् ।

१३ औं सागका लागि कराँतेको बिहीबार अन्तिम छनोट स्पर्धामा काता प्रदर्शन गरिँदै ।  तस्बिर : हेमन्त श्रेष्ठ/कान्तिपुर

पुरुषतर्फ नेपाल पुलिसका मन्देकाजीले आर्मीका परशुराम बाँस्तोला र महिलातर्फ चन्चलाले एनआरएनएकी शुभद्रा श्रेष्ठलाई पछि पारेका थिए । छानिएका दुवै आठौं राष्ट्रिय खेलकुदका स्वर्णधारी पनि हुन् । स्वर्ण जित्दा मन्देले परशुराम र चञ्चलाले शुभद्रालाई हराएका थिए ।

टिम काताको पुरुषमा मन्देसहित आर्मीका प्रवीण मानन्धर र पुलिसका महसुस तामाङ छानिए । महिला टिमतर्फ पुलिसकी निर्मला तामाङ, आर्मीकी संगीता मगर र पुलिसकी सरु कार्की छनोट भए ।

पुरुष ५० केजीमा पुलिसका सोनाम लामा तथा ५५ केजीमा एपीएफका लक्ष्मण तामाङ छानिए । फाइनलमा सोनामले आर्मीका शिव खत्री र लक्ष्मणले प्रदेश ३का विजय श्रेष्ठलाई हराए ।

पुरुष ६० केजीमा प्रहरीका राजीव पुडासैनीले प्रदेश ४ का राजकुमार रसाइली, ६७ केजीमा प्रदेश ४ का नवीन रसाइलीले प्रदेश ५ का अर्जुन बाघचन्द, ४२ केजीमा प्रहरीका गंगाराम कुशवारले एपीएफका मुकुन्द्र महर्जन, ८४ केजीमुनि पुलिसका दिवस श्रेष्ठले एपीएफका सुशील पौड्याल र ८४ केजीमाथि प्रदेश ३ का विप्लवलाल श्रेष्ठले आर्मीका लेखनाथ मैनालीलाई हराउँदै सागका लागि स्थान पक्का गरे ।

पुरुष ६० देखि ८४ केजीमाथिमा दोस्रो भएका सबै खेलाडी टिम स्पर्धाका लागि भने छनोट भएका छन् । महिला ४५ केजीमा आर्मीकी कुसुम खड्काले प्रदेश ३ की मीरा योञ्जन र ५० केजीमा एपीएफकी अनु अधिकारीले आर्मीकी मिस्ली श्रेष्ठलाई पाखा लगाउँदै छनोट भए ।

महिला ५५ केजीमा एपीएफकी मनीषा चौधरीले प्रदेश ३ की सुस्मिता वाइबा, ६१ केजीमा प्रदेश ४ की अनु गुरुङले प्रहरीकी एस्टर राई, ६८ केजीमुनि प्रहरीकी सुनीता महर्जनले आर्मीकी सनी तामाङ र ६८ केजीमाथि पुलिसकी अुनपमा मगरले आर्मीकी रीता कार्कीलाई पन्छाउँदै छनोट भए । सागका लागि कराँतेको १८ पुरुष र १४ महिला गरी ३२ खेलाडी छानिएका छन् ।

प्रकाशित : भाद्र १३, २०७६ ०७:४२
प्रतिक्रिया
पठाउनुहोस्

नेपाल तेस्रोपल्ट फाइनलमा

कान्तिपुर संवाददाता

काठमाडौँ — नेपाली युवा टिम पहिलो खेलमा आयोजक भारतविरुद्ध ५–० ले स्तब्ध भएर पनि त्यसपछि लगातार तीन जित निकाल्दै बिहीबार वेस्ट बंगालमा भइरहेको साफ यू–१५ च्याम्पियनसिपको फाइनलमा प्रवेश गरेको छ ।

भुटानविरुद्ध गोल गरेका सुगम जिमी (१८) । 

यो उमेर समूहको दक्षिण एसियाली प्रतियोगितामा नेपाल तेस्रोपल्ट फाइनल प्रवेश गरेको हो । नेपालले आइतबार हुने फाइनलमा भारतको सामना गर्नेछ ।

कल्याणी रंगशालामा बिहीबारको पहिलो खेलमा नेपालले भुटानमाथि ६–० को जित दर्ता गर्‍यो । दिनको दोस्रो खेलमा भारतले डिफेन्डिङ च्याम्पियन बंगलादेशलाई ४–० ले हरायो । यससँगै ५ देश सहभागी प्रतियोगितामा राउन्ड रोबिन लिगका शीर्ष दुई स्थानमा रहँदै भारत र नेपालले उपाधि होड पक्का गरेका हुन् ।

भारत शतप्रतिशत जितसहित शीर्षस्थानमा रह्यो । तीन जित र एक हारसँगै नेपाल लिग चरणमा दोस्रो भयो । नेपाली टिमले भुटानलाई सुरुबाटै दबाबमा राखेको थियो । कप्तान प्रदीप लम्साल र नीराजन खत्रीले समान दुई गोल गरे । पाँचौं मिनेटमै प्राप्त पेनाल्टीमा कप्तान प्रदीपले गोल गर्दै नेपाललाई अग्रता दिलाए । निराजनले नवौं मिनेटमा अग्रता दोब्बर बनाए ।

बाँकी चार गोल दोस्रो हाफमा भएको थियो । त्यसमा प्रदीप (४८ मिनेट), असिम राई (७५), निराजन (८५) र सुगम जिमी (९५) ले गोल गरे । सुगमले फाइनल भने गुमाउने छन् । दुई पहेँलो कार्डका कारण उनले फाइनल खेल्न नपाउने भएका हुन् ।

छैटौं संस्करणको पहिलो खेलमै ठूलो अन्तरले हारेपछि नेपालले श्रीलंकालाई २–० ले हराएर आफ्नो सम्भावना जोगाएको थियो । त्यसपछि बंगलादेशलाई ४–१ र भुटानलाई ६–० ले पराजित गर्दै नेपाल साफ यू–१५ मा तेस्रोपल्ट पुगेको हो । यो उमेर समूहमा पहिलोपल्ट च्याम्पियन हुने दाउमा रहेको नेपालले आइतबार हुने फाइनलमा दुईपल्टको विजेता भारतको सामना गर्नेछ ।

प्रकाशित : भाद्र १३, २०७६ ०७:४१
पूरा पढ्नुहोस्
प्रतिक्रिया
पठाउनुहोस्