नेपाल तेस्रोपल्ट फाइनलमा

कान्तिपुर संवाददाता

काठमाडौँ — नेपाली युवा टिम पहिलो खेलमा आयोजक भारतविरुद्ध ५–० ले स्तब्ध भएर पनि त्यसपछि लगातार तीन जित निकाल्दै बिहीबार वेस्ट बंगालमा भइरहेको साफ यू–१५ च्याम्पियनसिपको फाइनलमा प्रवेश गरेको छ ।

यो उमेर समूहको दक्षिण एसियाली प्रतियोगितामा नेपाल तेस्रोपल्ट फाइनल प्रवेश गरेको हो । नेपालले आइतबार हुने फाइनलमा भारतको सामना गर्नेछ ।

कल्याणी रंगशालामा बिहीबारको पहिलो खेलमा नेपालले भुटानमाथि ६–० को जित दर्ता गर्‍यो । दिनको दोस्रो खेलमा भारतले डिफेन्डिङ च्याम्पियन बंगलादेशलाई ४–० ले हरायो । यससँगै ५ देश सहभागी प्रतियोगितामा राउन्ड रोबिन लिगका शीर्ष दुई स्थानमा रहँदै भारत र नेपालले उपाधि होड पक्का गरेका हुन् ।

भारत शतप्रतिशत जितसहित शीर्षस्थानमा रह्यो । तीन जित र एक हारसँगै नेपाल लिग चरणमा दोस्रो भयो । नेपाली टिमले भुटानलाई सुरुबाटै दबाबमा राखेको थियो । कप्तान प्रदीप लम्साल र नीराजन खत्रीले समान दुई गोल गरे । पाँचौं मिनेटमै प्राप्त पेनाल्टीमा कप्तान प्रदीपले गोल गर्दै नेपाललाई अग्रता दिलाए । निराजनले नवौं मिनेटमा अग्रता दोब्बर बनाए ।

बाँकी चार गोल दोस्रो हाफमा भएको थियो । त्यसमा प्रदीप (४८ मिनेट), असिम राई (७५), निराजन (८५) र सुगम जिमी (९५) ले गोल गरे । सुगमले फाइनल भने गुमाउने छन् । दुई पहेँलो कार्डका कारण उनले फाइनल खेल्न नपाउने भएका हुन् ।

छैटौं संस्करणको पहिलो खेलमै ठूलो अन्तरले हारेपछि नेपालले श्रीलंकालाई २–० ले हराएर आफ्नो सम्भावना जोगाएको थियो । त्यसपछि बंगलादेशलाई ४–१ र भुटानलाई ६–० ले पराजित गर्दै नेपाल साफ यू–१५ मा तेस्रोपल्ट पुगेको हो । यो उमेर समूहमा पहिलोपल्ट च्याम्पियन हुने दाउमा रहेको नेपालले आइतबार हुने फाइनलमा दुईपल्टको विजेता भारतको सामना गर्नेछ ।

प्रकाशित : भाद्र १३, २०७६ ०७:४१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

च्याम्पियन्स लिग ड्र : लिभरपुलको समूहमा नेपोली

एएफपी

मोनाको — युरोपियन च्याम्पियन्स लिगमा साबिक विजेता लिभरपुलले समूह चरणमा पुनः नेपोलीको सामना गर्नुपर्ने भएको छ । मोनाकोमा बिहीबार गरिएको ‘ड्र’ अनुसार बार्सिलोनाले कठिन समूहमा परेको छ ।

योर्गन क्लोपको लिभरपुलले समूह ‘ई’ मा नेपोलीका साथै अस्ट्रियन च्याम्पियन साल्जबर्ग र बेल्जियन च्याम्पियनगेन्कसँग खेल्नेछ ।
समूह ‘एफ’ मा रहेको बार्सिलोनाले बोरुसिया डर्टमन्ड, इन्टर मिलान र स्लाभिया प्रागसँग प्रतिस्पर्धा गर्नुपर्नेछ । पेरिस सेन्ट जर्मेन (पीएसजी) र रियल म्याड्रिड एकै समूहमा परेका छन् ।

समूह ‘ए’ को अर्को दुई टोलीमा क्लब ब्रुग र गालाटासरे छन् । समूह ‘बी’ मा बायर्न म्युनिख, टोटेनहम, ओलम्पियाकोज र रेडस्टार बेलग्रेड तथा समूह ‘सी’ मा म्यानचेस्टर सिटी, साख्तर डोनेस्क, डिनामो जाग्रेब र एटलान्टा छन् । त्यस्तै समूह ‘डी’ मा युभेन्ट्स, एट्लेटिको म्याड्रिड, बायर लेभरकुसन र लोकोमोटिभ मस्को, समूह ‘जी’ मा जेनिट सेन्ट पिटर्सबर्ग, बेन्फिका, लियोन र आरबी लिपजिङ तथा समूह ‘एच’ मा चेल्सी, अयाक्स,भ्यालेन्सिया र लिले छन् ।

लिभरपुललाई छैटौंपल्ट च्याम्पियन्स लिगको उपाधि दिलाउन प्रमुख भूमिका खेलेका सेन्टर ब्याक भर्जिल भान डाइक यूईएफए वर्षको पुरुष फुटबलर भएका छन् । उनले बार्सिलोनाका लियोनल मेसी र युभेन्ट्सका क्रिस्टियानो रोनाल्डोलाई पछि पार्दै उक्त उपाधि जितेका हुन् । महिलातर्फ लुकी ब्रोन्जले यो उपाधि हात पारिन् ।

उनले लियोनलाई महिला च्याम्पियन्स लिगको उपाधि दिलाउन महत्त्वपूर्ण भूमिका खेलेकी थिइन् भने विश्वकपमा इंग्ल्यान्डलाई सेमिफाइनल पुर्‍याएकी थिइन् ।

नेदरल्यान्ड्सका कप्तान भान डाइकले युरोपको वर्षको उत्कृष्ट रक्षकको उपाधि पनि पाए । त्यस्तै लिभरपुलका एलिसन बेकर उत्कृष्ट गोलरक्षक, अयाक्सका फ्रान्क डी जोङ उत्कृष्ट मिडफिल्डर र बार्सिलोनाका मेसी उत्कृष्ट फरवार्डमाचुनिएका थिए ।

प्रकाशित : भाद्र १३, २०७६ ०७:३९
पूरा पढ्नुहोस्
प्रतिक्रिया
पठाउनुहोस्