कप्तानमा सुजल

कान्तिपुर संवाददाता

काठमाडौँ — राष्ट्रिय फुटबल टोलीका मुख्य प्रशिक्षक योहान कालिनले मलेसियन सुपर लिग च्याम्पियन जोहर दारुल ता’जिमविरुद्ध हुने मैत्रीपूर्ण खेलका लागि सुजल श्रेष्ठलाई कप्तान बनाएका छन् ।

नियमित कप्तान विराज महर्जन २३ सदस्यीय टिममा स्थान बनाउन असफल भएपछि सुजलले एक खेलका लागि नेपालको कप्तानी गर्ने अवसर पाएका हुन् ।

‘आशा थियो, पाएँ । यो मेरो लागि सम्मान हो,’ कप्तानको जिम्मेवारीबारे सुजलले शुक्रबार मलेसियातर्फ लाग्नुअघि भने, ‘तर मलाई मैदानमा खेल्ने टिमका ११ खेलाडी नै कप्तान हो जस्तो लाग्छ ।’ जोहर दारुलविरुद्ध सोमबार मलेसियामा हुने खेलबारे २७ वर्षीय उनले भने, ‘सबै खेलाडीले मिहिनेत गरेका छन् । त्यसैले विश्वकप छनोटको तयारी खेलमा राम्रै गर्ने आशा गरेका छौं ।’

गत वर्षको बंगबन्धु गोल्डकपमा प्यालेस्टाइनविरुद्ध १–० ले पराजित भएको खेलमा पनि उनले नीराजन खड्का (विराजबाहिर हुँदाका कप्तान) मैदानबाट बाहिरिएपछि ‘आर्मब्यान्ड’ लगाउने अवसर पाएका थिए । विंगर सुजलले मार्च ११ २०११ मा भुटानविरुद्ध पोखरामा भएको मैत्रीपूर्ण खेलमार्फत् अन्तर्राष्ट्रिय फुटबलमा डेब्यूगरेका थिए । उनले एएफसी सोलिडारिटी कप २०१६ को फाइनलमा मकाउविरुद्ध १–० को जितमा निर्णायक गोल गर्दै नेपाललाई ऐतिहासिक सफलता दिलाएका थिए ।

नयाँ कप्तानबारे प्रशिक्षक कालिनले भने, ‘सुजल कुशल खेलाडी हुन् । ट्रेनिङमा एकदमै मिहिनेत गर्छन् । अनुशासित छन् । उनी टिमका रोल मोडल नै हुन् । त्यसैले उनलाई जोहर दारुलविरुद्धको खेलमा कप्तान बनाइएको हो,’ उनले थपे, ‘मेरा लागि टिमका २३ खेलाडी नै कप्तान हुन् । यी सबै खेलाडीले कुनै दिन आर्मब्यान्ड लगाउने छन् ।’

पछिल्लोपल्ट विराज बेन्चमा छँदा उनले गोलकपिर किरण चेम्जोङलाई कप्तान बनाएका थिए । जापानी क्लबमा ट्रायल दिन पुगेकाले किरण मलेसिया यात्रामा सहभागी छैनन् । उनीसँगै इन्डोनेसियन लिग वान क्लब पर्सिजा जकार्तामा व्यस्त रहेका मिडफिल्डर रोहित चन्द विश्वकप छनोटमा मात्रै नेपाली टिममा फर्कने छन् ।

प्रकाशित : भाद्र ७, २०७६ ०७:५३
प्रतिक्रिया
पठाउनुहोस्

एलेभेन च्याम्पियन

आनन्द गौतम

ताप्लेजुङ — सुनसरीको एलेभेन एरोज क्लब दुहबीले पाथीभरा गोल्डकप फुटबल प्रतियोगिताको उपाधि जितेको छ । साबिक विजेता रेडस्टार फुटबल क्लब बिर्तामोडलाई टाइब्रेकरमा ४–२ ले पराजित गर्दै एलेभेन एरोज नयाँ च्याम्पियन बनेको हो । 

निर्धारित समयमा २–२ गोल भएपछि खेल पेनाल्टी शुटआउटमा पुगेको थियो । टाइब्रेकरमा सुनसरीका लागि रुपेश केसी, जीवन धामी, विश्व एप्स र उमेश कार्की गोल गरे । रेडस्टारका पूजन उपरकोटी र विशाल लिम्बुले मात्र गोल गरे । रेडस्टारका योगेश गुरुङ र विकास थुलुङ गोल गर्न चुके । पहिलो पेनाल्टी हान्ने अवसर पाएका योगेशको पेनाल्टी बाहिरियो ।

पहिलो हाफ गोलरहित बनेको खेलको मध्यान्तरपछि दुवैले २–२ गोल गरेका थिए । रेडस्टारबाट दोस्रो हाफको १५ औं मिनेटमा योगेश गुरुङले गोलको खाता खोले । लामो दुरीबाट उनले हानेको फ्रिकिक सिधै गोलमा परिणत भएको थियो । त्यसको १० मिनेटपछि सुनसरीले गोल फर्कायो ।

२९ औं मिनेट हुँदा सुनसरीका यानिक ओनाले गोल गरे खेल बराबरी बनाए । प्रवेश दनुवारले हेडबाट मिलाइदिएको बल यानिकले सदुपयोग गरे । उनले दुई डिफेन्डर छक्याएर गोल गरेका हुन् । उनी प्रतियोगितामा बढी गोलगर्ने खेलाडी पनि भए । उनले कुल ४ गोल गरेका छन् । यानिकले समान गोलमा रहेका रेडहर्स क्लब इलामका फोफोना (३) लाई उछिने ।

रेडस्टारका मिलन राईले ४३ औं मिनेटमा दोस्रो गोल गरेर टोलीलाई पुनः अग्रता दिलाए । तर ९० मिनेटसम्म अग्रता लिएको रेडस्टार इन्ज्युरी टाइममा चुक्यो । थपिएको अन्तिम तथा चौथो मिनेटमा सुनसरीका सुसन तामाङले झापाली टोलीको खुसी खोसिदिए । सुसनले गोल गर्दै खेल बराबरी ल्याए । टाइब्रेकरमा अन्ततः सुनसरी सफल बन्यो ।
विजेताले ३ लाख ११ हजार र उपविजेताले १ लाख ५१ हजार रुपैयाँ पुरस्कार पाए । सर्वोत्कृष्ट खेलाडी प्रवेश दनुवार भए । उनले १० हजार प्राप्त गरे । गोलकिपरमा सुनसरीका प्रिसो एप्स, डिफेन्समा विष्णु सुनुवार, प्रशिक्षकमा विश्ववन्धु पोखरेल उत्कृष्ट भए ।

मिडफिल्डरमा रेडस्टारका योगेश गुरुङ, फरवार्डमा मिलन राई उत्कृष्ट चुनिए भने उदीयराज खेलाडी ताप्लेजुङका मणिराज लिम्बु भए । विजेतालाई संस्कृति, पर्यटन तथा नागरिक उड्डयनमन्त्री योगेश भट्टराईले पुरस्कृत गरे ।

प्रकाशित : भाद्र ७, २०७६ ०७:५०
पूरा पढ्नुहोस्
प्रतिक्रिया
पठाउनुहोस्