पाथीभरा गोल्डकप : रेडस्टार लगातार फाइनलमा

आनन्द गौतम

ताप्लेजुङ — पाथीभरा गोल्डकप फुटबल प्रतियोगिताको फाइनलमा साबिक विजेता रेडस्टार क्लब झापा र एलेभेन एरोज सुनसरी भिड्ने भएका छन् । फाइनल शुक्रबार हुनेछ । 

पाथीभरा गोल्डकप फुटबलमा बिहीबार प्रतिस्पर्धा गर्दै रेडस्टार र डाँगीहाटका खेलाडी । तस्बिर : आनन्द/कान्तिपुर

बिहीबार दोस्रो सेमिफाइनलमा रेडस्टारले डाँगीहाट फुटबल क्लब मोरङलाई टाइब्रेकरमा ४–३ ले पराजित गर्दै एलेभेन एरोजसँगको भेट पक्का गरेको हो । निर्धारित समयमा बराबरी १–१ गोल भएपछि खेलको नतिजा टाइब्रेकरबाट छिनोफानो गरिएको थियो । अन्तिम समयमा पानी परेको थियो । वर्षाको प्रवाह नगरी खेललाई भने निरन्तरता दिइएको थियो ।

रेडस्टारको तर्फबाट निशान लिम्बुको पेनाल्टी निर्णायक बन्यो । झापाका कर्ण लिम्बुको ठाउँमा मैदान छिरेका उनले छैटौं पेनाल्टी प्रहार गरेका थिए । ५–५ जनाले हानेको पेनाल्टीमा दुवै टिम ३–३ गोल मात्रै गर्न सफल भयो । डाँगीहाटको तर्फबाट पेनाल्टी हानेका मानबहादुर चुकेका थिए ।

त्यसअघि रेडस्टारका बुद्ध चेम्जोङ, पुजन उपरकोटी, योगेश गुरुङ गोल गर्न सफल भए भने मनोज राई र निरज बस्नेतले पेनाल्टी असफल भयो । डाँगीहाटबाट विनम लिम्बु, विकेश लिम्बु र विक्रम धिमाल गोल गर्न सफल भए भने प्रविन मैनाली र दिलेन मोक्तानले पेनाल्टी शुटआउटमा गोल गर्न सकेनन् ।

पहिलो हाफ गोलरहित भएको थियो । दोस्रो हाफको लगत्तै योगेश गुरुङको गोलबाट रेडस्टारले अग्रता लियो । फ्रिकिकबाट आएको बलमा उनले गोल गरेका थिए । रेडस्टारको यो खुसी आठौं मिनेटमै डाँगीहाटका विकेश लिम्बुको गोलबाट खोसिएको थियो ।

विकेशले पेनाल्टी बक्स नजिकैबाट देब्रे खुट्टाले हानेको बलले जाली चुमेको थयो । म्यान अफ द म्याच रेडस्टारका गोलकिपर विवश चौधरी भए । उनले दुई पेल्नाल्टी बचाएका थिए ।

प्रकाशित : भाद्र ६, २०७६ ०७:४१
प्रतिक्रिया
पठाउनुहोस्

दुवै विधामा इनोभेटिभ सफल

कान्तिपुर संवाददाता

काठमाडौँ — इनोभेटिभले सातौं उपत्यकाव्यापी रेडियन्ट कप बास्केटबल प्रतियोगितामा बिहीबार सिनियर ब्वाइजमा ज्योति एकेडेमीलाई २९–१४ स्कोरले पराजित गरेको छ । 

इनोभेटिभका श्रृजल अवालेले १७ स्कोर गरेका छन् । सिनियर गर्ल्समा इनोभेटिभले ग्यालेक्सीलाई १६–१० ले हराउँदा स्वच्छता थापाले ६ स्कोर जोडिन् ।

सिनियर ब्वाइजमै द एक्सेल्सियरले आयोजक रेडियन्ट ‘ए’ लाई ३१–३०, ग्रिनफिल्डले अद्वितीयलाई ३६–२७, जेनियमले एलआरआईलाई २९–२५ र डेनेबले विल्सन एकेडेमीलाई २१–१२ स्कोरले हराए ।

एक्सेल्सियरका सुशान्त डंगोलले १२, ग्रिनफिल्डका अमृत भट्टराईले १०, जेनिअमका दीपेश कार्कीले ११ र डेनेबका शम्भु ओझाले ६ स्कोर गरे । गर्ल्सतर्फ न्यु भिजनले एक्सेल्सियरलाई १३–५ र एलआरआईले रेडियन्टलाई १८–१२ ले हराए । भिजनकी आरती मगरले ७ र एलआरआईकी सन्जिला भण्डारीले ६ स्कोर जोडे ।

जुनियर ब्वाइजमा ग्रिनफिल्डले न्यु भिजनलाई ३०–२०, हिमालयले एलआरआईलाई २४–१२ र रेडियन्टले सेबलाई ३३–१७ ले पराजित गरे । ग्रिनफिल्डका महेश दाहालले १५, हिमालयका जेन लामाले १० र रेडियन्टका राज रोकाले १३ स्कोर जोडे ।

प्रकाशित : भाद्र ६, २०७६ ०७:३९
पूरा पढ्नुहोस्
प्रतिक्रिया
पठाउनुहोस्