विधान संशोधन, विवाद समाधानतिर

एनओसी चुनाव भदौ २० मा
कान्तिपुर संवाददाता

काठमाडौँ — अन्तर्राष्ट्रिय मान्यताप्राप्त नेपाल ओलम्पिक कमिटी (एनओसी) का अध्यक्ष जीवनराम श्रेष्ठले ओलम्पिक विवाद समाधानका लागि विधान संशोधन गरिएको जानकारी दिएका छन् । मुख्यतः कार्यसमिति सदस्य संख्या र पदमा हेरफेर गरी ओलम्पिक कमिटीको विधान सोमबार सम्पन्न विशेष साधारणसभाले पारित गरेको छ । 

‘ओलम्पिकका नाममा अहिले जति पनि विवादहरू छन् । रुक्म शम्शेर राणाजीको नेतृत्वमा रहेको ओलम्पिक कमिटीसँग समन्वय र सहमतिको आधार तय गर्न हामीले विधान संशोधन गरेका हौं,’ अध्यक्ष श्रेष्ठले भने, ‘अन्तर्राष्ट्रिय ओलम्पिक कमिटी (आईओसी) ले पारित गरेपछि विधान लागू हुनेछ । आईओसीले हुबहु पारित नगर्न पनि सक्छ ।’

कार्यसमितिमा दुई सदस्य संख्या थप्ने र केही नयाँ पद सिर्जना गर्ने गरी अघिल्लो महिना सम्पन्न कार्यसमिति बैठकले अन्तिम रूप दिएको विधानलाई सोमबारको विशेष साधारणसभाले पारित गरेको हो ।

आईओसीमा प्रस्ताव गरिने नयाँ विधानमा कमिटीको कार्यसमिति १७ बाट बढाएर १९ सदस्यीय पुर्‍याइएको छ । त्यस्तै सचिवमा दुईको ठाउँमा ३ जना हुने र उपाध्यक्ष ५ जना हुने व्यवस्था गरिएको अध्यक्ष श्रेष्ठले बताए । त्यस्तै कमिटीका पूर्व अध्यक्षलाई मानार्थ अध्यक्षको पद दिइनेछ । उनीहरूले कुनै जिम्मेवारी पाउने छैनन् भने आवश्यकता अनुसार कार्यसमिति बैठकमा भाग लिन पाउनेछन् ।
त्यस्तै ओलम्पिक कमिटीमा मानार्थ उपाध्यक्षको नयाँ व्यवस्था राखिएको छ । मानार्थलाई कार्यसमितिको बैठकले नै निर्णय गरेर कार्यसमिति बैठकमा सहभागी गराउने वा केही जिम्मेवारी दिनसक्ने व्यवस्था छ । ओलम्पिक कमिटीमा सल्लाहकार पनि नियुक्त गरिनेछ । ओलम्पिक मुभमेन्टमा योगदान दिने व्यक्तिमध्येबाट सल्लाहकार नियुक्त हुने अध्यक्ष श्रेष्ठले बताए ।

विशेष साधारणसभाले गल्फलाई पनि आधिकारिक मान्यता दिएको छ । योसँगै ओलम्पिक कमिटीमा आबद्ध खेलसंख्या २७ पुगेको छ । सबै संघलाई ओलम्पिक कमिटीको निर्वाचनमा मताधिकार हुनेछ ।

ओलम्पिक कमिटीको नयाँ नेतृत्व चयनका लागि भदौ २० मा निर्वाचन गर्ने निर्णय पनि साधारणसभाले गरेको छ । वर्तमान अध्यक्ष जीवनराम श्रेष्ठले अर्को कार्यकालका लागि पनि उम्मेदारी दिने बताएका छन् । ‘विधानतः म अर्को कार्यकालका लागि पनि योग्य हुनेछु, त्यसैले देशको ओलम्पिक मुभमेन्ट अझै प्रभावकारी बनाउनका लागि मेरो उम्मेदारी रहनेछ,’ श्रेष्ठले कान्तिपुरसँग भने ।

प्रकाशित : श्रावण २१, २०७६ ०८:०२
प्रतिक्रिया
पठाउनुहोस्

नेपालमा डब्लूटीको ट्रेनिङ सेन्टर 

कान्तिपुर संवाददाता

काठमाडौँ — विश्व तेक्वान्दो महासंघ (डब्लूटी) ले सातदोबाटोस्थित तेक्वान्दो एकेडेमीलाई क्षेत्रीय ट्रेनिङ सेन्टरको मान्यता दिएको छ । नेपाल भ्रमणमा रहेका महासंघका अध्यक्ष चुङ वो चोई र राष्ट्रिय खेलकुद परिषद्का सदस्यसचिव रमेशकुमार सिलवालले सोमबार संयुक्त रूपमा ट्रेनिङ सेन्टरको उद्घाटन गरे । 

विश्व तेक्वान्दो महासंघले क्षेत्रीय तालिम केन्द्रको मान्यता दिएको काठमाडौं १२ औं सहर हो । यसअघि चीनका ३, अजरबैजान, उज्वेकिस्तान, इरान, जर्मनी, बेलायत, दक्षिण कोरिया, क्रोएसिया र इटलीमा पनि क्षेत्रीय ट्रेनिङ सेन्टर स्थापना भएका छन् ।

क्षेत्रीय ट्रेनिङ सेन्टर सञ्चालनमा आउँदा नेपाली खेलाडीको स्तरोन्नतिमा सहयोग पुग्ने विश्वास अध्यक्ष चोईले व्यक्त गरे । उनका अनुसार विश्व तेक्वान्दो महासंघमा आवद्ध सबै देशका खेलाडीले ट्रेनिङ गर्न सक्नेछन् । त्यसका लागि विश्व तेक्वान्दो महासंघले समन्वय गर्नेछ भने ट्रेनिङ सेन्टरको सञ्चालन नेपाल तेक्वान्दो संघले गर्नेछ ।

सदस्यसचिवले दक्षिण एशियामा पावरहाउसको रूपमा रहेको नेपाली तेक्वान्दोको स्तर यस ट्रेनिङ सेन्टर सन्चालनमा आएपछि अझै बढ्ने दाबी गरे ।

महासंघका अध्यक्ष दक्षिण कोरियाली नागरिक चोईले अन्तर्राष्ट्रिय ओलम्पिक कमिटीद्वारा मान्यताप्राप्त तेक्वान्दो महासंघ आफ्नो नेतृत्वमा मात्र रहेको र यस महासंघले नेपालमा नेपाल तेक्वान्दो संघलाई मात्र आधिकारिता दिएको प्रस्ट पारे ।

प्रकाशित : श्रावण २१, २०७६ ०८:०२
पूरा पढ्नुहोस्
प्रतिक्रिया
पठाउनुहोस्