स्थानीय प्रशिक्षकको करामत

रोयटर्स

कायरो — अफ्रिका कप अफ नेसन्सअन्तर्गत अल्जेरिया र सेनेगलबीच शुक्रबार हुने फाइनलपछि यस क्षेत्रका देशहरूले घरेलु प्रशिक्षकलाई भरोसा गर्न सुरु गर्ने अल्जेरियाका प्रशिक्षक जामेल बेल्माडीले अपेक्षा गरेका छन् । 

जितपछिको खुसीमा सेनेगलका प्रशिक्षक अलियु सिसे (बीच) ।तस्बिर : एपी

दुवै टिमका प्रशिक्षक स्थानीय छन् । उनीहरू ४० वर्ष आसपासका छन् । पूर्व अन्तर्राष्ट्रिय खेलाडीलाईनै दुवैले विश्वास गरेका छन् । सेनेगलले सन् २००२ को संस्करणमा फाइनल यात्रा तय गर्दा अहिलेका प्रशिक्षक अलियु सिसेले टिमको नेतृत्व गरेका थिए ।

‘यो महत्त्वपूर्ण सन्देश हामीले हरेक अफ्रिकी देशमा फुटबलका लागि सरोकारवालालाई पठाएका छौं । यो आश्चर्यजनक छ,’ आइतबार इन्ज्युरी समयमा रियाद महारेजको फ्रिकिक गोलमार्फत नाइजेरियालाई २–१ ले पराजित गरेपछि प्रशिक्षक बेल्माडीले भने, ‘म सिसेलाई लामो समयदेखि चिन्छु । हामी फ्रान्समा व्यावसायिक फुटबल खेल्दा एकअर्काविरुद्ध खेल्थ्यौं । हामीबीच एउटै अन्तर के हो भने उनी ४ वर्षदेखि आफ्नो टिममा छन् र म एक वर्षदेखि । सेनेगलविरुद्ध, मेरा साथीविरुद्धको यो फाइनल खेल आश्चर्यजनक छ । मेरो अपेक्षा के हो भने निर्णयकर्ताहरूले राम्रोसँग विचार गरुन् र आफ्नै देशका युवा प्रशिक्षकमाथि विश्वास गरुन् ।’

सेमिफाइनलमा नाइजेरियाविरुद्धको खेलबारे बेल्माडीले भने, ‘उनको टिमले पहिलो हाफमै एकभन्दा बढी गोल गर्नुपथ्र्यो । तर पुनरागमन गर्नुअघि उनको टिमले आफ्नो लय गुमाउन पुगेको थियो । हाम्रो प्रतिस्पर्धीको क्षमताका आधारमा यो खेल निकै कठिन हो । पहिलो हाफमा मेरा खेलाडीले उत्कृष्ट खेले तर अधिक गोल निस्कन सक्थ्यो ।

दोस्रो हाफको अन्तिम १५ मिनेट हामीले धेरै दबाब सह्यौं, त्यो निकै कठिन समय थियो ।’

नाइजेरियाले बराबरी गोल गर्ने क्रममा पेनाल्टी अवसरका लागि भिडियो असिस्टेन्ट रेफ्री (भार) ले लामो समय लगाएका कारण खेलाडीले आरामको समय पाएको उनले बताए । ‘मेरो विचारमा
खेलको अन्त्यतिर खेलाडीहरू सकारात्मक र मानसिक पमा बलियो बने,’ उनले थपे ।

प्रकाशित : श्रावण १, २०७६ १०:२४
प्रतिक्रिया
पठाउनुहोस्

सिमोनालाई उच्च सम्मान

(एएफपी)

बुखारेस्ट — ग्रान्ड स्लाम टेनिस विम्बल्डन च्याम्पियन सिमोना हालेपलाई उनको देश रोमानियाको राष्ट्रपति कार्यालय तथा अर्थोडक्स चर्चले उच्च सम्मान प्रदान गरेको छ । अमेरिकी सेरेना विलियम्सलाई पराजित गरी पहिलोपल्ट विम्बल्डनको उपाधि जितेकी उनलाई स्वदेशमा सयौं समर्थकले स्वागत गरेका थिए । 

बुखारेस्टस्थित हेनरी कुन्दा अन्तर्राष्ट्रिय विमानस्थलमा स्वागतका लागि राखिएको ब्यानरअगाडि च्याम्पियन सिमोना हालेप ।तस्बिर : एएफपी

२७ वर्षीया हालेप विम्बल्डनमा एकलतर्फ उपाधि जित्ने पहिलो रोमानियानी नागरिक हुन् । शनिबार उनले सातपल्टकी च्याम्पियन सेरेनालाई ६–२, ६–२ को सहज सेटमा ५६ मिनेटभित्रै पराजित गरेकी थिइन् ।

‘मैले अवसरको उपयोग गरें । मैले जति गर्नसक्थे त्यति गरें, त्यसैले मैले खेल जितेँ,’ हातमा ट्रफी र पुष्पगुच्छा लिएकी हालेपले रोमानियाको राजधानीमा अवस्थित बुखारेस्ट अन्तर्राष्ट्रिय विमानस्थलमा पत्रकारसँग भनिन्, ‘म आफ्नो रणनीतिमा केन्द्रित छु । सेरेना इतिहासकै सर्वश्रेष्ठ खेलाडी हुन् ।’ उनको स्वागतमा जम्मा भएका समर्थकले ‘ब्राभो सिमोना’ भन्दै उत्साह मनाएका थिए ।

हालेपको यो समग्रमा दोस्रो ग्रान्ड स्लाम उपाधि हो । यसअघि गत वर्ष उनले रोनाल्ड ग्यारोसमा फ्रेन्च ओपनको उपाधि जितेकी थिइन् ।

राष्ट्रपतिले उनलाई ‘स्टार अफ रोमानिया’ सम्मान प्रदान गरेकी हुन् । चर्चले उनलाई प्याट्रियार्कल क्रस चिन्ह दिएको छ । गत वर्ष फ्रेन्च ओपनको उपाधि जितेपछि हालेपले भनेकी थिइन्, ‘म सधैं क्रसको संकेत गर्छु । किनभने म भगवान्लाई विश्वास गर्छु । यो जे भइरहेको छ त्यो सबै भगवान्कै देन हो ।’

प्रकाशित : श्रावण १, २०७६ १०:१४
पूरा पढ्नुहोस्
प्रतिक्रिया
पठाउनुहोस्